އިޒްރޭލުން އިރާނަށް ދޭންއުޅުނު ހަމަލާތަކެއްގެ މަޢުލޫމާތު ލީކުކޮށްލި ސީއައިއޭ އެޖެންޓު ކުށަށް އިޢުތިރާފްވެއްޖެ

މިދިޔަ އޮކްޓޯބަރު މަހު އިޒްރޭލުން އިރާނަށް ދޭންއުޅުނު މިސައިލް ހަމަލާތަކެއްގެ މަޢުލޫމާތު ލީކުކޮށްލި، ސެންޓްރަލް އިންޓެލިޖެންސް އެޖެންސީ (ސީއައިއޭ)ގެ އެޖެންޓު އޭނާގެ ކުށަށް އިޢުތިރާފްވެއްޖެއެވެ.

އެމެރިކާގެ ޖަސްޓިސް ޑިޕާޓްމެންޓުން ހުކުރު ދުވަހު ނެރުނު ބަޔާނެއްގައި ބުނީ، އާސިފް ވިލިއަމް ރަޙްމާން، 34، ގެ މައްޗަށް ޤައުމުގެ ސަލާމަތާބެހޭ ސިއްރު މަޢުލޫމާތު ލީކުކުރި މައްސަލައިގައި ދެ ކުށެއް ސާބިތުވެފައިވާ ކަމަށެވެ. 

ރަޙްމާންއާއެކު ހަދާފައިވާ އިޢުތިރާފްގެ އެއްބަސްވުމާއެކު، އޭނާގެ މައްޗަށް ކުރާ ދެ ތުޙުމަތުގައި 10 އަހަރުގެ ޖަލު ހުކުމެއް އޭނާގެ މައްޗަށް އަންނާނެއެވެ. އަދި އޭނާގެ މައްޗަށް ހުކުންކުރުމަށް ހަމަޖެހިފައިވަނީ މެއި 15 ގައެވެ.

2016ވަނަ އަހަރުން ފެށިގެން ސީއައިއޭގައި މަސައްކަތްކުރަމުން އަންނަ ރަޙްމާން، އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި) އިން ހައްޔަރުކުރީ މިދިޔަ ނޮވެންބަރު މަހު ކެމްބޯޑިއާއިންނެވެ. 

އެމެރިކާގެ މީޑިއާތަކުން ކުރިން ރިޕޯޓުކޮށްފައިވާ ގޮތުގައި، އޭނާ ލީކުކޮށްލާފައިވަނީ އެމެރިކާގެ ނޭޝަނަލް ޖިއޯސްޕަޝިއަލް-އިންޓެލިޖެންސް އެޖެންސީ (އެންޖީއޭ)ގެ ލިޔެކިޔުންތަކެކެވެ. އަދި މި ލިޔެކިޔުންތަކަކީ އެމެރިކާގެ ޖާސޫސީ ސެޓެލައިޓުތަކުން އެއްކޮށްފައިވާ ތަހުލީލީ ރިޕޯޓުތަކެއްކަމަށް ވެސް ރިޕޯޓުކޮށްފައިވެއެވެ.

އޮކްޓޯބަރުމަހު ޓެލެގްރާމްގައި އެ ލިޔެކިޔުންތައް ލީކުވެފައިވާއިރު، އެ ލިޔެކިޔުންތަކުގައި އޮތީ އޮކްޓޯބަރު މަހުގެ 1ވަނަ ދުވަހު އިރާނުން އިޒްރޭލަށް ދިން ބެލިސްޓިކް މިސައިލް ހަމަލާއާ ގުޅިގެން ބަދަލު ހިފުމުގެ ގޮތުން އިޒްރޭލުގެ ހަނގުރާމަމަތީ އާލާތްތައް ތައްޔާރުކުރަމުންދާގޮތުގެ މަޢުލޫމާތެވެ.

އިރާނުން ހާމަކޮށްފައިވާ ގޮތުގައި، އެ ޤައުމުން ދިން އެ ހަމަލާއަކީ ހަމާސްގެ ލީޑަރު، އިސްމާއިލް ހަނިއްޔާ އާއި އިރާނުގެ އިސް އޮފިޝަލުންތަކެއް ޝަހީދުކޮށްލުމުގެ ސަބަބުން ބަދަލުހިފުމަށް ދިން ހަމަލާއެއްކަމަށެވެ.