ލިވަޕޫލް އާއި ޗެލްސީއިން ފާރަލަނިކޮށް، ނަޕޯލީގެ ފޯވާޑް ކްވަރާސްކެލިއާ ޕީއެސްޖީއަށް ސޮއިކޮށްފި

ނަޕޯލީގެ ޖޯޖިއާ ފޯވާޑް، ޚަވީޗާ ކްވަރާސްކެލިއާ ފްރާންސްގެ ޗެމްޕިއަން، ޕެރިސް ސެއިންޓް-ޖަމެއިން (ޕީއެސްޖީ)އަށް ސޮއިކޮށްފިއެވެ. ޕީއެސްޖީއިން އޭނާގެ ސޮއި މި ހޯދީ، ލިވަޕޫލް އާއި ޗެލްސީއިން ވެސް އޭނާއަށް ފާރަލަނިކޮށެވެ. 

ޕީއެސްޖީއާއެކު ކްވަރާސްކެލިއާ ހެދި އެއްބަސްވުމުގެ މުއްދަތު 2029ވަނަ އަހަރުގެ ޖޫން މަހާ ހަމައަށް ދެމިގެންދާނެއެވެ.

އިޓާލިއަން ސީރި އޭގެ އެއްވަނައިގައި އޮތް ނަޕޯލީ ދޫކޮށްލުމަށް ކްވަރާސްކެލިއާ ނިންމީ، އެ ޓީމާއެކު ހަދާފައިވާ އެއްބަސްވުމުގެ މުއްދަތު އިތުރުކުރުމުގައި އެއްބަސްވުމަށް ނާދެވުމުންނެވެ. 

ރިޕޯޓުތައް ބުނާގޮތުން، ކްވަރާސްކެލިއާ ޕީއެސްޖީއަށް ގަނެފައިވަނީ 70 މިލިއަން ޔޫރޯއަށެވެ. 

ޕީއެސްޖީއަށް ބަދަލުވުމަށްފަހު އުމުރުން 23 އަހަރުގެ ކްވަރާސްކެލިއާ ބުނީ، ޕީއެސްޖީއަށް ކުޅުމަކީ އޭނާގެ ހުވަފެނެއް ކަމަށާއި، އެ ޓީމުގެ ޖާރޒީލުމަށް ކެތްމަދުވެފައިވާކަމަށެވެ.

ޔޫރޯ 2024ގެ ކުއާޓާފައިނަލަށް ދަތުރުކުރި ޖޯޖިއާގެ ޓީމުގެ 7 ނަންބަރު ޖާޒީގައި ކުޅެފައިވާ ކްވަރާސްކެލިއާ ވަނީ އެ ޓީމުން ގްރޫޕް ސްޓޭޖުގައި ޕޯޗުގަލް 2-0 އިން ބަލިކުރި މެޗުގައި ގޯލެއް ވެސް ކާމިޔާބުކޮށްފައެވެ. 

އަދި ނަޕޯލީއިން 2022/23 ސީޒަނުގައި ލީގު ކާމިޔާބުކުރިއިރު، އޭނާގެ މޮޅު ހުނަރާ ގުޅިގެން ސަޕޯޓަރުން އޭނާއަށް މުހާތަބުކޮށްފައިވަނީ، އެ ޓީމުގެ ލެޖެންޑު، ޑިއޭގޯ މެރެޑޯނާގެ ނަމާ އެއްގޮތްކުރުމަށްފަހު، ކްވަރަޑޯނާގެ ނަމުންނެވެ.

އޭނާ ނަޕޯލީއާ ގުޅުނީ ޖޯޖިއާގެ ކްލަބެއް ކަމުގައިވާ ޑައިނަމޯ ބަޓޫނީއިން 9 މިލިއަން ޕައުންޑުގެ ފީއެއްގައި، 2022 ވަނަ އަހަރުއެވެ. އަދި ނަޕޯލީއަށް 104 މެޗު ކުޅެދީފައިވާއިރު، އެ ކްލަބަށް 30 ގޯލު ކާމިޔާބުކޮށް 24 އެސިސްޓުކޮށްދީފައި ވެއެވެ.

ކްވަރާސްކެލިއާގެ މި ޓްރާންފާއަކީ މި ޖެނުއަރީ ޓްރާންސްފާ ވިންޑޯގެ ވުރަތަމަ ޓްރާންފާއެވެ. އަދި މި ޓްރާންސްފާއާއެކު އޭނާއަކީ ޖޯޖިއާގެ ކުޅުންތެރިއަކު ފުރަތަމަ ފަހަރަށް ޕީއެސްޖީގެ ޖާޒީގައި ކުޅޭނެ ފަހަރު ވެސް މެއެވެ.