އިޓާލިއަން ސީރީ އޭ: ނަޕޯލީ އިން ވާދަވެރި އެޓެލާންޓާ ބަލިކޮށްފި

އިޓާލިއަން ސީރީ އޭގެ އެއްވަނައިގައި އޮތް ނަޕޯލީ އިން ވާދަވެރި އެޓެލާންޓާ 3-2 އިން ބަލިކޮށް، އެ ޓީމުގެ ލީޑު ފުޅާކޮށްފިއެވެ.

އެޓަލާންޓާގެ ގެވިސް ސްޓޭޑިއަމްގައި ކުޅުނު މި މެޗުގައި ފުރަތަމަ ލީޑު ނެގީ ވެސް އެ ޓީމުންނެވެ. މެޗުގެ 16ވަނަ މިނެޓުގައި،  ގޯލަށް ފުރަގަސްދީގެން ހުރުމަށްފަހު އެނބުރިލާފައި ވަރަށް ހަނި އޭންގަލްއަކުން ބޯޅަ ފޮނުވާލުމަށްފަހު މި ގޯލު ކާމިޔާބުކޮށްދިނީ މެޓެއޯ ރެޓެގުއިއެވެ. 

ނަމަވެސް އޭގެ 11 މިނެޓުފަހުން ނަޕޯލީގެ މަޓެއޯ ޕޮލިޓާނޯ ވަނީ އެ ޓީމަށް މެޗުގެ ނަތީޖާ ހަމަހަމަކޮށްދީފައެވެ. ގޯލުގެ ވާތް ފަރާތުގައި ހުރުމަށްފަހު، ޕޮލިޓާނޯ ކައިރި ކަނަށް ފޮނުވާލި ބޯޅަ ވެސް ގޯލުގެ ތެރެއަށް ވަނީ ހަނި އޭންގަލުންނެވެ.

އަދި ފުރަތަމަ ހާފު ނިމުމުގެ ކުރިން މެކްޓޮމިނޭ ވަނީ ނަޕޯލީއަށް ލީޑު ނަގާދީފައެވެ. ވާތް ފަރާތުން ގޯލުގެ ކުރިމައްޗަށް ހުރަސްކޮށްދިން ބޯޅަ މެކްޓޮމިނޭ ފޮނުވާލީ ކަނާތްފަރާތުގެ މަތީ ކަނަށެވެ. 

ދެވަނަ ހާފު ފަށައިގެން 10ވަނަ މިނެޓުގައި އަޑެމޯލާ ލުކްމާން އެޓަލާންޓާއަށް ނަތީޖާ ހަމަހަމަކޮށްދިނެވެ. މިދިޔަ އަހަރު އެފްރިކާގެ އެންމެ މޮޅު ކުޅުންތެރިޔާގެ މަގާމު ހޯދި ލުކްމާންގެ މި ގޯލަކީ އޭނާ މި ސީޒަނުގައި ކާމިޔާބުގައި 10ވަނަ ލީގު ގޯލެވެ.

މި ގޯލަށްފަހު މެޗުގައި ލީޑު ނެގުމަށް އެޓަލާންޓާއިން ފުލުފުލުގައި ގިނަ ހަމަލާތަކެއް އުފެއްދިއެވެ. ނަމަވެސް އެ ތަނުން ހަމަލާއެއް ގޯލަށް ބަދަލު ނުކުރެވޭނީސް، ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލަށް ފޮނުވާލައި، ނަޕޯލީގެ ރޮމޭލޫ ލުކާކޫވަނީ އެ ޓީމަށް މެޗު ކާމިޔާބުކޮށްދީފައެވެ. 

ސީރީ އޭގެ އެހެން މެޗެއްގައި ހޮނިހިރު ދުވަހު ޔުވެންޓަސްއިން އޭސީ މިލާން 2-0 އިން ބަލިކޮށް، ލީގުގެ ހަތަރުވަނައަށް ކުރިއަށްޖެހިލާފައިވެއެވެ. މި ސީޒަންގައި ލީގު މެޗަކުން އަދި ޔުވެންޓަސް ބަލިވެފައެއް ނުވެއެވެ.