ޤައުމީ އެއަރލައިންގެ  ޗައިނާ ދަތުރުތަކާއި އެކު އެއްދުވަސްނަގާ ދަތުރު 6 ގަޑިއިރަށް : ޕަސިންޖަރުންނަށް ބޮޑު ލުޔެއް

ކޮންމެ ޤައުމެއްގެވެސް ޤައުމީ އެއަރލައިން ވަރުގަދަވެގެން ދިއުމަކީ އެ ޤައުމަކަށް ލިބޭނެ ވަރަށް ބޮޑު ކުރިއެރުމެކެވެ.އަޅުގަނޑުމެންގެ އުދުހުންތައް ދިވެހިންގެ އަތްމަތީގައި އޮތުމުގެ މުހިންމުކަމަށް އިޝާރާތްކުރައްވައި ރައީސުލްޖުމްހޫރިއްޔާ ވިދާޅުވީ، މި ގޮތުގައި ފަތުރުވެރިކަމާއި، އުދުހުމުގެ ސިނާޢަތަށް ކުރިއެރުންތައް ލިބިގެންދާނެކަމަށެވެ. އަދި މި އަހަރު ވެގެންދާނީ، ކުޑަ ދުވަސްކޮޅެއްގެ ތެރޭގައި ވަރަށް ގިނަ ހަރުފަތްތަކެއް ގިރާކޮށްގެން، އައިލެންޑް އޭވިއޭޝަނާއި އެމް.އޭ.ސީ.އެލް އަށް އިތުރު ކުރިއެރުންތަކެއް ގެނެސްދޭނޭ އަހަރެއް ކަމުގައެވެ.

ވައިޑްބޮޑީ އެއަރލައިންއިން ޗައިނާއަށް ކުރި ފުރަތަމަ ދަތުރުގެ ޕަސިންޖަރުންނަށް މަރުޙަބާ ކިއުން

އެގޮތުން ފަތުރުވެރިކަމާއި ވިޔަފާރީގެ ދާއިރާއަށް މުހިންމު ކުރިއެރުިއެރުމެއްގެ ގޮތުގައި، މޯލްޑިވިއަން އެއަރލައިންސްއިން ކުންފުނިން އަލަށް ތައާރަފްކުރި އޭ330-200 ވައިޑްބޮޑީ މަތިންދާބޯޓު ބޭނުންކޮށްގެން ޗައިނާގެ ބެއިޖިން، ޝެންހާއީ އަދި ޗެންޑޫއަށް ފަށަން ނިންމާފައިވާ ސީދާ ދަތުރުތައް ހިމެނެއެވެ. އިއްޔެ ގެ ވަގުތެއްގައި އެންމެ ފުރަތަމަ ދަތުރު ފަށާފައިވަނީ ޗައިނާގެ ޗެންޑޫއަށެވެ.

މީގެ ކުރިން، ދިވެހިރާއްޖެއާއި ޗައިނާއާ ދެމެދު ދަތުރުކުރާ ފަސިންޖަރުން ދިގު ދަތުރުތަކެއް ކުރަންޖެހެއެވެ. އަދި ގިނަ ފަހަރަށް ޓްރާންސިޓް ހުއްޓުންތަކާ ހެދި ދަތުރުގެ މުއްދަތު ގާތްގަނޑަކަށް މުޅި ދުވަހަކަށް ދިގުދެމިގެންދެއެވެ.

ވައިޑްބޮޑީ އެއަރލައިންއިން ޗައިނާއަށް ފުރަން ތައްޔާރުވުމުގެ ތެރެއިން

ޤައުމީ އެއަރލައިންގެ ސީދާ ދަތުރުތައް ތަޢާރަފުކުރުމާއެކު، ދަތުރުގެ މުއްދަތު ގާތްގަނޑަކަށް 6 ގަޑިއިރަށް ކުރުވެގެން ގޮސްފައިވެއެވެ. މި ބަދަލު ވަނީ ފަސިންޖަރުންނާއި ޗައިނާގެ ފަތުރުވެރިން ވަރަށް ބޮޑަށް މަރުޙަބާ ކިޔާފައެވެ.

ދަތުރުތައް ކުރުވުމުގެ ފަސޭހަކަމުން ޗައިނާއިން ރާއްޖެއަށް އަންނަ ފަތުރުވެރިންގެ އަދަދު އިތުރުވާނެ ކަމަށް ބެލެވެއެވެ. 2024 ވަނަ އަހަރުގެ ޑިސެންބަރު 10 ގެ ނިޔަލަށް 255،000 ޗައިނާގެ ފަތުރުވެރިން ރާއްޖެއަށް ޒިޔާރަތްކޮށްފައިވާކަން ފާހަގަކޮށްލެވެއެވެ. މިއީ ރާއްޖެއަށް އެންމެ ގިނަ ފަތުރުވެރިން އަންނަ ޤައުމެވެ.މޯލްޑިވިއަންގެ ވައިޑް-ބޮޑީ މަތިންދާބޯޓުގެ ދަތުރުތަކާއިއެކު ޗައިނާއިން އަހަރަކު 40،000 ފަތުރުވެރިން ރާއްޖެއަށް ގެނެވޭނެކަމަށް ފަތުރުވެރިކަމާބެހޭ ވަޒީރު އިބްރާހީމް ފައިޞަލް ވަނީ ވިދާޅުވެފައެވެ.

މިހާރު މި ގެނެވުނު އެއަރކްރާފްޓްއިން 40،000 ފަތުރުވެރިން ޗައިނާއިން ގެނެވޭނެ. އެއީ ވަރަށް ބޮޑު ކުރިއެރުމެއް. މި ރިސްކު ނެގުން އެއީ މީގެ ކާމިޔާބީއަކީ

ފަތުރުވެރިކަމާބެހޭ ވަޒީރު އިބްރާހީމް ފައިޞަލް

ވައިގެ ދަތުރުފަތުރުގެ ގުޅުން ހަރުދަނާވުމުން ވިޔަފާރިއަށްވެސް އިތުރުފުރުސަތުތައް ފަހިވެގެންދާނެއެވެ. ޚާއްޞަކޮށް އަވަހަށް ހަލާކުވާ ޒާތުގެ ތަކެތި އުފުލުމަށް ލުއިގޮތްތަކެއް މަގުފަހިވެގެންދާނެއެވެ. ދަތުރުގެ މުއްދަތު ކުރުވުމުން ކާގޯ އޮޕަރޭޝަންތައް އިތުރަށް ހަރުދަނާވެ، މޭވާއާއި ތަރުކާރީ ފަދަ އަވަހަށް ހަލާކުވާ ތަކެތި ދެ ޤައުމުގެ ދެމެދުގައި އަވަހަށް އުފުލުމަށް މަގުފަހިވެގެންދާނެއެވެ. މި ކުރިއެރުމުގެ ސަބަބުން އިޤްތިޞާދީ ގުޅުން ބަދަހިވެ، އަވަހަށް ހަލާކުވާ ތަކެތި އަވަހަށް ފޯރުކޮށްދިނުމަށް ބަރޯސާވާ ރާއްޖޭގެ ވިޔަފާރިތަކަށް އެހީތެރިވެދޭނެއެވެ.

ޓްރާންސްޕޯޓް މިނިސްޓަރ މުޙައްމަދު އަމީން މި މަޝްރޫޢުގެ ފުޅާ ދާއިރާގެ ފައިދާތަކާއި ގުޅޭގޮތުން ވިދާޅުވީ އޭ330 ވައިޑްބޮޑީ މަތިންދާބޯޓު ބޭނުންކޮށްގެން މި އައު ރޫޓްތައް ފެށުމަކީ ދިވެހިރާއްޖެއާއި ޗައިނާއާ ދެމެދު އޮތް ވަރުގަދަ ގުޅުމުގެ ހެއްކެކެވެ. މި ދަތުރުތަކުން ގުޅުން ބަދަހިވެ، އެއްބާރުލުން އިތުރުވެ، އަދި އަޅުގަނޑުމެންގެ ފަތުރުވެރިކަމުގެ ދާއިރާގެ ކުރިއެރުމަށް މަގުފަހިވެގެންދާނެކަމަށެވެ.

މޯލްޑިވިއަންގެ ޚިދުމަތަށް ވައިޑް-ބޮޑީ މަތިންދާ ބޯޓު ގެނައުމަކީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ރިޔާސީ ވައުދުފުޅެކެވެ. އަންނަ އޮކްޓޯބަރ މަހުގެ ތެރޭގައި އިތުރު ވައިޑް-ބޮޑީ މަތިންދާބޯޓެއް ރާއްޖެ ގެނެސް ޔޫރަޕަށް ދަތުރު ފެށުމަށް ޤައުމީ އެއަރލައިނުން ދަނީ ތައްޔާރުވަމުންނެވެ.

ދިވެހީންގެ ޤައުމީ އެއަރލައިންގެ ރޫޓް ނެޓްވޯކް ތަރައްޤީކުރުމުގެ މި ހަރުދަނާ މަސައްކަތުން  ބައިނަލްއަޤްވާމީ ގުޅުންތައް ހަރުދަނާކުރުމަށާއި އިޤްތިޞާދީ ތަރައްޤީއަށް ދިވެހިރާއްޖެއިން ދޭ އަހައްމިއްޔަތުކަން ފާހަގަވެގެންދެއެވެ. އަމިއްލަ އެއަރލައިން އެއްގައި ދިވެހި މުވައްޒަފުންނާި އެކު ދަތުރުކޮށްލެވޭ އެއަރލައިންއެއް އޮތުމަކީ އަޅުގަނޑުމެން ކޮންމެ ދިވެއްސަކަށްވެސް ލިބޭނެ ފަހުރެކެވެ. ސީދާ އަދި ހަލުވި ދަތުރުފަތުރުގެ ޚިދުމަތްތައް ފޯރުކޮށްދިނުމުގެ ސަބަބުން، ޗައިނާގެ ފަތުރުވެރިންނަށް އެންމެ މަޤްބޫލު މަންޒިލެއްގެ ގޮތުގައި ދިވެހިރާއްޖޭގެ މަޤާމު އިތުރަށް ވަރުގަދަވެ، އަދި ސަރަޙައްދީ ވިޔަފާރީގައި މުހިންމު ބައިވެރިއެއްގެ ގޮތުގައި ދިވެހިރާއްޖެ ހަރުދަނާވެގެންދާނެއެވެ.