ހަނގުރާމައިގައި ނަޞްރު ލިބެނީ އީމާންކަމާއި ކެތްތެރިކަމުގެ މައްޗަށް: ޚުޠުބާ

ހަނގުރާމައިގައި ނަޞްރު ލިބެނީ ލަޝްކަރުގެ ޢަދަދު ގިނަކަމާއި ހަތިޔާރުގެ މޮޅުކަމުގެ މައްޗަށް ނޫންކަމަށާއި، އެއީ އީމާންކަމާއި ކެތްތެރިކަމުގެ މައްޗަށް ބިނާވެގެންވާ ކަމެއް ކަމުގައި މިއަދުގެ ޚުޠުބާގައި ބުނެފިއެވެ.

ފަލަސްޠީނުގެ މައްޗަށް ޞަހްޔޫނީން ހިންގަމުންދިޔަ ނަސްލުނައްތާލުމުގެ އަނިޔާވެރި ހަނގުރާމަ މެދުކަނޑާލުމުން، ޣައްޒާގެ ރައްޔިތުންނަށް ލިބުނު މަތިވެރި ނަޞްރުގެ ވާހަކައަށް އަލިއަޅުވާލައި ޚުޠުބާގައި ފާހަގަކުރީ، މި ހަނގުރާމައަކީ އިންސާނީ ތާރީޚު ދެކެފައިނުވާފަދަ އަނިޔާވެރިކަން ބޮޑު ހަނޑުރާމައެއް ކަމަށާއި، މި ހަނގުރާމަ ހުއްޓައިލުމަށް ޞަހްޔޫނީންނަށް މަޖުބޫރުވީ، ދެން އެހެން އެއްވެސް ގޮތެއް ނެތިގެން ކަމުގައެވެ. 

މި ކާމިޔާބަށް އަލިއަޅުވާލަމުން ހާމަކުރީ، މި ނަޞްރުގެ ފަހަތުގައި ވަނީ އީމާންކަމާއި، ހިތްވަރާއި، ކެތްތެރިކަމާއި، އުޚްވަތްތެރިކަމާއި، ނުގުޑާ ފަދަ ޢަޒުމެއްގައި ބަދަހިކަމާ އެކު ތިބެ، ﷲއަށް ވަކީލުކޮށްގެން ތިބެ ހަނގުރާމަކުރުން ކަމުގައެވެ.

އަހަރަކަށް ވުރެން ދިގުމުއްދަތަކަށް ދެމިގެން ދިޔަ މި ހަނގުރާމައިގައި ފަލަސްޠީނުގެ ފަންސާސް ހާސް މީހުންނަށް ވުރެން ގިނަ ބަޔަކު ޝަޙީދުވެފައިވާއިރު، ޣައްޒާވަނީ މުޅިން ބިމާހަމަވެ، އެ ޤައުމުގެ ކުށެއްނެތް ރައްޔިތުންގެ ދިރިއުޅުން، އެފުށް މިފުށަށް ޖެހިފައެވެ. މި ހަނގުރާމައިގައި ކުޑަކުދީންނާއި، މުސްކުޅީންނާއި، ޢިލްމުވެރީންނާއި، ފަލަސްޠީނުގެ މިނިވަންކަމަށް މަސައްކަތްކުރި އެތައް ލީޑަރުންނެއްވެސް ޝަހީދުވެފައިވެއެވެ. 

އަސީރުންނަށް ހެޔޮކޮށް ހިތުމުގެ މުހިންމުކަމަށް ވެސް ޚުޠުބާގައި އަލިއަޅުވާލާފައިވެއެވެ. އެގޮތުން، ދުޝްމަނުންގެ އަސީރުން ދޫކޮށްލިއިރު އެ މީހުންގެ މޫނުމަތިން އުފާވެރިކަން ފެނުމަކީ، އެ މީހުންނާއިމެދު ޢަމަލުކުރެވުނު ރަގަޅު ގޮތް ހާމަކޮށްދިން ކަމެއްކަމަށް ފާހަގަކޮށް، މިއީ އިސްލާމީ އަޚްލާޤުގެ ތެރޭގައި ހިމެނޭކަމެއްކަމަށް ވެސް ހާމަކޮށްފައިވެއެވެ. 

މީގެ އިތުރުން، މި ހަނގުރާމައިން ލިބުނު ޢިބުރަތްތަކުގެ ތެރޭގައި، ﷲއަށް ނަޞްރުދޭ ބަޔަކަށް ﷲ ނަޞްރު ދެއްވާނެކަމާއި، ހަނގުރާމައިގެ ޙާލަތުގައި އަނިޔާވެރިވުމެއްނެތި ރިވެތި އަޚްލާޤު އިސްކުރުމުގެ މާތްކަން ހިމެނޭކަމަށް ޚުޠުބާގައި ބުނެފައިވެއެވެ.

އަދި ކީރިތި ރަސޫލާގެ އިސްރާއާއި މިޢުރާޖުގެ މަތިވެރި މުޢުޖިޒާތުން، އިސްލާމީ އުއްމަތާއި ފަލަސްޠީނާއި ވަކިވެގެން ނުދާނެކަމަށް ވެސް ފާހަގަކުރިއެވެ. އެގޮތުން، އެ ދަތުރުފުޅުން ހާމަކޮށްދޭ އެއް ކަމަކީ، ދުނިޔެ ދެމިއޮތްހައި ހިނދަކު، އަލްމަސްޖިދުލްޙަރާމާއި އަލްމަސްޖިދުލްއަޤްޞާއާ ދެމެދު އޮތް ގުޅުމަކީ ނިމުމެއް ނެތް ވަރުގަދަ ގުޅުމެއްކަމަށް ދޭހަކޮށްދޭކަމަށެވެ. އެހެންކަމުން އަލްއަޤްޞާ މިސްކިތް މިނިވަންކުރުމަށްޓަކައި މަސައްކަތްކުރުމަކީ އިސްލާމީ އުއްމަތުގެ މައްޗަށް އޮތް ދީނީ ވާޖިބެއްކަން ފާހަގަކޮށްފައިވެއެވެ. 

ހަމައެއާއެކު، އަހަރެމެން މުސްލިމުންގެ ހައިސިއްޔަތުން ފަލަސްޠީނުގެ ރައްޔިތުންނާ މެދު އަދާކުރަންޖެހޭ އަޚްލާޤީ ވާޖިބުތަކެއްވާކަމަށާއި، އެއީ ފަލަސްޠީނުގެ ދިފާޢުގައި އަޑުއުފުލުމާއި، އެ ޤައުމުގެ ރައްޔިތުންނަށް ހެޔޮދުޢާކުރުމާއި، އިންސާނީ އެހީތެރިވުންކަމަށް ފާހަގަކޮށްފައިވެއެވެ.