ލުކާކޫގެ ގޯލަކުން ޖުވެންޓަސްއަށް ސީޒަނުގެ ފުރަތަމަ ލީގު ބައްޔާއި ކުރިމަތިލާން ޖެހިއްޖެ

އިޓާލިއަން ސީރީ-އޭގައި ނަޕޯލީއާއި ޖުވެންޓަސް ބައްދަލުކުރި މެޗު 2-1 އިން ނަޕޯލީ ކާމިޔާބުކޮށް، މުޅިން އަލަށް ޖުވެންޓަސް މި ސީޒަނުގައި ބަލިކޮށްފިއެވެ.

ސީޒަން ފެށުނުއިރު އަލަށް އެ ޓީމާ ހަވާލުވި ތިއާގޯ މޯޓާގެ ބެލުމުގެ ދަށުން ކުޅެމުން އަންނަ ޖުވެންޓަސް ބަލިނުވެ މި ސީޒަނުގައި މިހާތަނަށް 21 މެޗު ހަމަކޮށްފައިވެއެވެ. 

ލީގުގެ އެއްވަނައިގައި އޮތް ނަޕޯލީއާ ކުޅުނު މެޗުގައި ފުރަތަމަ ލީޑު ނެގީ ވެސް ޖުވެންޓަސްއެވެ. ފުރަތަމަ ހާފު ނިމެން ދެ މިނެޓަށް ވެފައިވަނިކޮށް މި ގޯލު އެ ޓީމަށް ކާމިޔާބުކޮށްދިނީ، ލޯނު އެއްބަސްވުމެއްގެ ދަށުން ފްރާންސްގެ ޕީއެސްޖީއިން އެ ޓީމަށް ބަދަލުވި ރެންޑެލް ކޮލޯ މުއާނީއެވެ. މިއީ މުއާނީ ޖުވެންޓަސްއަށް ކުޅެދިން ފުރަތަމަ މެޗު ވެސް މެއެވެ.

ނަޕޯލީ އިން މެޗުގެ ނަތީޖާ ހަމަހަމަކުރީ ދެވަނަ ހާފުގައެވެ. މެޗުގެ 57ވަނަ މިނެޓުގައި މި ގޯލު ކާމިޔާބުކުރީ، ކަނާތްފަރާތުގެ ޕެނަލްޓީ އޭރިއާގެ ރޮނގުމަތިން ކަހަލަ ގޮތަކަށް ގޯލް ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލަށް ފޮނުވާލުމަށްފަހު، ފްރޭންކް އެންގުއިސަރއެވެ. މިއީ އޭނާ ނަޕޯލީއަށް ކާމިޔާބުކޮށްދިން 10ވަނަ ގޯލެވެ. 

ނަޕޯލީއިން މެޗުގައި ލީޑު ނެގީ އެ ޓީމަށް ލިބުނު ޕެނަލްޓީއަކުންނެވެ. ސްކޮޓް މެކްޓޮމިނޭއަށް ޖުވެންޓަސްގެ ޑިފެންޑަރު މެނުއެލް ލޮކަޓެލީ ކުރި މި ފައުލަށް ލިބުނު ޕެނަލްޓީ ކާމިޔާބުކުރީ، މިދިޔަ އަހަރު ޗެލްސީއިން ބަދަލުވި ބެލްޖިއަމްގެ ރޮމޭލޫ ލުކާކޫއެވެ. 

މި ނަތީޖާއާއެކު، ނަޕޯލީވަނީ ލީގުގެ އެއްވަނައިގައި ހަ ޕޮއިންޓުގެ ލީޑެއް ނަގައިފައެވެ. ނަމަވެސް ދެވަނައިގައި އޮތް އިންޓަމިލާނަށް ދެ މެޗުގެ އެޑްވާންޓޭޖެއް އެބައޮތެވެ.