މުޅި ރާއްޖެއަށް ކުރިކެޓު ފުޅާކުރުމުގެ ޙާއްސަ ޕްރޮގްރާމެއް ކުރިކެޓު ބޯޑުން ފަށައިފި

މުޅި ރާއްޖެއަށް ކުރިކެޓު ފުޅާކުރުމުގެ ގޮތުން، "ސީޑްސް"ގެ ނަމުގައި ޙާއްސަ ޕްރޮގްރާމެއް ކުރިކެޓު ބޯޑުން ފަށައިފިއެވެ. އެ ބޯޑުން ފާހަގަކުރާ ގޮތުގައި، މިއީ ކުރިކެޓު ކުރިއެރުވުމަށް އިންދޭ އޮށެކެވެ.

ކުރިކެޓު ބޯޑުން މި ޕްރޮގްރާމްތައް ފެށީ، ރާއްޖޭގައި ކުރިކެޓު ކުޅޭ ކުޅުންތެރިން އުފެއްދުމުގެ ގޮތުންކަމަށް ހާމަކޮށްފައިވެއެވެ. 

މީގެ އިތުރުން، މިއީ ކްރިކެޓުގެ ވައިޑީޕީ ޕްރޮގްރާމްތަށް އިތުރުކުރުމާއި، ރާއްޖޭގައި ކްރިކެޓްގެ ހަރަކާތްތައް އިތުރަށް ފުޅާކޮށް ހިންގުމުގެ ގޮތުން ފެށި ޕްރޮގްރާމެކެވެ. އަދި މިއީ ކުރިކެޓް ބޯޑަށް އިންތިހާބުވި އައު ރައީސް މުހަންމަދު ފައިސަލުގެ ވައުދުފުޅެއް ވެސް މެއެވެ.

ކްރިކެޓު ބޯޑުގެ އަމާޒަކީ، ކޮންމެ އަހަރަކު 8 ރަށެއްގައި "ސީޑްސް" ޕްރޮގްރާމް ކުރިޔަށް ގެންގޮސް، އެ ރަށްރަށުން އަހަރަކު 1،200 ކްރިކެޓު ކުޅުންތެރިން އުފެއްދުމެވެ. އަދި ޕްރޮގްރާމް ނިމޭއިރު ޖުމްލަ 5،000 ކުޅުންތެރިން މި ކުޅިވަރުގެ ތެރެއަށް ނިކުތުމަކީ އެ ބޯޑުގެ ދުރުރާސްތާ އަމާޒެވެ.

މި ޕްރޮގްރާމަށް އެ ބޯޑުންދޭ އަހައްމިއްޔަތުކަން ފާހަގަކޮށް، ބޯޑްގެ ނައިބު ރައީސް އަހްމަދު އިސްހާގް ވިދާޅުވީ، މި ޕްރޮގްރާމަށް މުޅި ބަޖެޓުގެ %17 ޙާއްސަކޮށްފައިވާ ކަމަށެވެ. 

ރަށްރަށުގައި އާންމު ގޮތެއްގައި ޒުވާނުން ކުރިކެޓު ކުޅެމުން ނުދިއުމަކީ ވެސް "ސީޑްސް" ޕްރޮގްރާމުގެ ތެރެއިން ޙައްލު ހޯދަން ބޭނުންވާ ކަމެކެވެ. މިހާރަށް ބަލާއިރު، ކުރިކެޓު މުބާރާތްތައް މުޅިން ހެން އޮންނަނީ ވެސް މާލޭގައެވެ. ސަބަބަކީ މި ކުޅިވަރު ކުޅޭނެ ކުޅުންތެރިން ރަށްރަށުގައި ނުތިބުމެވެ.