ވިޔަފާރި

މޯލްޑިވިއަންގެ ވައިޑް-ބޮޑީ އެއަރކްރާފްޓުގެ ދަތުރުތައް ތިންވަނަ މަންޒިލަކަށް ފަށައިފި – މި ފަހަރު ޝަންހާއީއަށް

މޯލްޑިވިއަންގެ ވައިޑް-ބޮޑީ އެއަރކްރާފްޓުގެ ދަތުރުތައް ތިންވަނަ މަންޒިލަކަށް ފަށައިފި – މި ފަހަރު ޝަންހާއީއަށް

މޯލްޑިވިއަންގެ މުވައްޒަފަކު އެ އެއާރލައިނުން ޗައިނާގެ ބެއިޖިންގއަށް ދަތުރުކުރަން ޗެކިންކުރި ފަސިންޖަރުންތަކަކާއެކު ނަގާފައިވާ ފޮޓޯއެއް، ފޮޓޯ: މޯލްޑިވިއަން

މިފްތާޙް މުޙައްމަދު

މިފްތާޙް މުޙައްމަދު

27 ޖެނުއަރީ 2025، 06:51

27 ޖެނުއަރީ 2025، 06:51

ހުލާސާ

ފްލައިޓު ޖެއްސުމަށް ހަމަޖެހިފައިވަނީ ޝަންހާއީ ޕުޑޮންގް އިންޓަރނޭޝަނަލް އެއަރޕޯޓަށް.

ޝަންހާއީއަށް ކޮންމެ ހަފްތާއަކު ދަތުރެއް ކުރާނެ.

މޯލްޑިވިއަންގެ ވައިޑް-ބޮޑީ އެއަރކްރާފްޓުގެ ދަތުރުތައް ތިންވަނަ މަންޒިލަކަށް ފަށައިފިއެވެ. އެގޮތުން ޗައިނާގެ ޗެންގްޑޫއާއި ހޮންގްކޮންގްއަށްފަހު، އެ އެއާރލައިނުން ދެން ދަތުރުތައް ފަށާފައި މިވަނީ އެ ޤައުމުގެ ޝަންހާއީއަށެވެ.

އެ އެއަރކްރާފްޓް މި މަހުގެ 6ވަނަ ދުވަހު ރާއްޖެ ގެނައުމަށްފަހު، ފުރަތަމަ މަންޒިލެއްގެ ގޮތުން ޗެންގްޑޫއަށް ދަތުރުތައް ފަށާފައިވަނީ މި މަހު 21ވަނަ ދުވަހުއެވެ. އެއަށްފަހު ޗައިނާގެ ކެޕިޓަލް ސިޓީގެ ދަތުރުތައް ފެށީ މި މަހުގެ 24 ގައެވެ. 

ޝަންހާއީއަށް ކުރަން ފެށި ދަތުރުތަކުގައި ފްލައިޓު ޖެއްސުމަށް ހަމަޖެހިފައިވަނީ ޝަންހާއީ ޕުޑޮންގް އިންޓަރނޭޝަނަލް އެއަރޕޯޓަށްކަމަށް މޯލްޑިވިއަނުން ހާމަކޮށްފައި ވެއެވެ.

ޝަންހާއީއަށް ކުރި ފުރަތަމަ ދަތުރުގައި، ދިވެހީންގެ އިތުރުން ޗައިނާގެ ފަތުރުވެރިން ވެސް ދަތުރުކޮށްފައިވެއެވެ. 

ޗައިނާގެ ތިން މަންޒިލަކަށް މިހާރު މޯލްޑިވިއަންގެ ދަތުރުތައް ފަށާފައިވާއިރު، ކޮންމެ މަންޒިލަކަށް ކުރާ ފުރަތަމަ ދެ ދަތުރުގައި އަގުހެޔޮ ފެއާރއެއްގައި ޓިކެޓު ލިބޭނެކަމަށް މޯލްޑިވިއަނުން އިޢުލާންކޮށްފައި ވެއެވެ. އަދި އެ ފެއާރއަކީ މިވަގުތު މާކެޓްގައި މި މަންޒިލްތަކަށް ދަތުރުކުރާ އަގުތަކާ އާޅަބަލާއިރު 30 އާއި 50 އިންސައްތައާއި ދެމެދު ކުޑަ އަގެއްކަމަށް ވެސް މޯލްޑިވިއަނުން ހާމަކޮށްފައިވެއެވެ.

މީގެ އިތުރުން، މި ޕްރޮމޯޝަންގައި 40 ކިލޯގެ ބެގޭޖު އެލަވަންސް ވެސް ލިބެއެވެ. 

މޯލްޑިވިއަނުން މަޢުލޫމާތު ދީފައިވާ ގޮތުގައި ޗައިނާގެ ތިން މަންޒިލަކަށް އެ އެއާރލައިނުން މިހާރު ދަތުރުކުރަން ފަށާފައިވާއިރު، ކޮންމެ މަންޒިލަކަށް ވެސް ހަފްތާއަކު އެއް ދަތުރުއަޅާނެއެވެ. 

މި ދަތުރުތަކާއެކީ، ޗައިނާއިން ރާއްޖެއަށް އަންނަ ފަތުރުވެރިންގެ އަދަދު އިތުރުވެގެން ދާނެކަމަށް ވަނީ ޤަބޫލުކުރެވިފައެވެ. އަދި މިއާއެކު، އެ ޤައުމުން ކާގޯ ގެނައުމަށް ވެސް އިތުރު ފަސޭހަތަކެއް ލިބިގެން ދާނެއެވެ.

މި ލިޔުން ކިޔާލުމުން

Ads by MSS