ނޭމާއާއެކު ސައުދީ ލީގުގެ އަލް-ހިލާލްއިން ހަދާފައިވާ އެއްބަސްވުން ނިމުމަކަށް ގެނަސްފި

އަނިޔާތައް ގިނަ ބްރެޒިލްގެ ތަރި ނޭމާއާއެކު ސައުދީ ޕްރޯ ލީގުގެ އަލް-ހިލާލްއިން ހަދާފައިވާ އެއްބަސްވުން ނިމުމަކަށް ގެނަސްފިއެވެ. އެއްބަސްވުން އުވާލާފައިވަނީ، ދެ ފަރާތުން މަޝްވަރާކޮށްގެންކަމަށް ވެސް ރިޕޯޓުތައް ބުނެއެވެ.

އުމުރުން 32 އަހަރުގެ ނޭމާ 2023ވަނަ އަހަރުގެ އޯގަސްޓު މަހު އަލް-ހިލާލްއާ ގުޅުނީ 77.6 މިލިއަން ޕައުންޑުގެ ޓްރާންސްފާރ ފީއަކަށެވެ. ނަމަވެސް އޭގެ ފަހުން އޭނާ އެ ޓީމުގައި ހޭދަކޮށްފައިވާ މުއްދަތުގައި، އަނިޔާގެ ސަބަބުން ކުޅެވިފައިވަނީ 7 މެޗެވެ. އޭގެ ތެރެއިން މި ސީޒަންގައި އޭނާ ކުޅެފައިވަނީ ދެ މެޗެވެ. އެއީ ވެސް ބަދަލު ކުޅުންތެރިއެއްގެ ގޮތުގައެވެ.

ބާސެލޯނާ އިން 2017 ވަނަ އަހަރު ފްރާންސްގެ ޕެރިސް ސެއިންޓް-ޖަމެއިން (ޕީއެސްޖީ)އަށް 200 މިލިއަން ޕައުންޑަށް ބަދަލުވި ނޭމާއަކީ އަދިވެސް ދުނިޔޭގެ އެންމެ އަގުބޮޑު ކުޅުންތެރިޔާއެވެ. 

ނޭމާ އާއި އަލް-ހިލާލްއާ ދެމެދު އޮތް އެއްބަސްވުން އުވާލާފައިވާއިރު، އެ އެއްބަސްވުމުގައި ގާތްގަނޑަކަށް 7 މަސް ބާކީ އޮތެވެ. އަލް-ހިލާލްއާއެކު ނޭމާ އެއްބަސްވުމަކަށް އައީ އަހަރަކު 129.2 މިލިއަން ޕައުންޑުގެ މުސާރައަކަށްކަމަށް ރިޕޯޓުތައް ބުނެއެވެ.

އަލް-ހިލާލްއާ ގުޅުނު ފަހުން ނޭމާއަށް ފުރަތަމަ އަނިޔާވީ 2023ގެ އޮކްޓޯބަރުގައި، ބްރެޒިލްއާ އުރުގުއޭ ކުޅުނު ވޯލްޑް ކަޕް ކޮލިފައިން މެޗެއްގައެވެ. އޭރު އޭނާގެ ކަކުލަށް ލިބުނު އަނިޔާއާ ގުޅިގެން ގިނަ ދުވަސްތަކެއް ވަންދެން ކުޅުމާއި ދުރުގައި ހުރުމަށްފަހު އެނބުރި އައީ މިދިޔަ އަހަރުގެ އޮކްޓޫބަރު މަހުއެވެ. އެނބުރި އައުމަށްފަހު ދެވަނައަށް ކުޅުނު މެޗުގައި ފައިގެ ފަލަމަސްގަނޑަށް ލިބުނު އަނިޔާއަކާ ގުޅިގެން އަނެއްކާ ވެސް ކުޅުމާ ދުރަށް ދާން ޖެހުނެވެ. އަދި އޭގެ ފަހުން އިތުރު މެޗެއް އޭނާ ކުޅެފައެއް ނުވެއެވެ. 

އަލް-ހިލާލްއަށްފަހު ދެން ނޭމާ ބަދަލުވާނެކަމަށް ބެލެވެނީ، އޭނާގެ ޕްރޮފެޝަނަލް ކެރިއަރު ފެށި ކްލަބް ކަމުގައިވާ، ބްރެޒިލްގެ ސަންތޯސްއަށެވެ. ނޭމާ ވަނީ އެ ކްލަބަށް ކުޅުނު 225 މެޗުން 136 ގޯލު ކާމިޔާބުކޮށްފައެވެ. 

އޭނާ ބާސެލޯނާއަށް ބަދަލުވީ 2013ވަނަ އަހަރުއެވެ. އެއަށްފަހު އެ ޓީމާއެކު ހަތަރު ސީޒަން ކުޅެފައިވެއެވެ. މި މުއްދަތުގައި އޭނާ ވަނީ ލަލީގާ އާއި ޗެމްޕިއަންސް ލީގާއި ކްލަބް ވޯލްޑް ކަޕް ކާމިޔާބުކޮށްފައެވެ. 

އަދި ދުނިޔޭގެ ރެކޯޑު ފީ އަކަށް ޕީއެސްޖީއަށް ބަދަލުވީ އުމުރުން 25 އަހަރުގައެވެ. ޕީއެސްޖީއާއެކު އޭނާ ވަނީ ފަސް ފަހަރު ލީގު ކާމިޔާބުކޮށްފައެވެ.