ކެސެމީރޯ ސައުދީ ލީގަށް ގެންދަން ރޮނާލްޑޯ ބޭނުންވޭ؟

އަލް-ނަސްރުން ސައުދީ ޕްރޯ ލީގުގައި ނެރެމުންދާ ނަތީޖާތައް އިތުރަށް ރަގަޅު ކުރުމުގެ ގޮތުން، އެ ޓީމުގެ ތަރި، ކްރިސްޓިއާނޯ ރޮނާލްޑޯއާއެކު ސްޕެއިންގެ ރެއާލް މެޑްރިޑުގައި ގިނަ މެޗުތަކެއް ކުޅެފައިވާ، ބްރެޒިލްގެ ކެސެމީރޯ ގެނައުމަށް ރޮނާލްޑޯ ބޭނުންވާކަމަށް މީޑިއާ ރިޕޯޓުތައް ބުނެއެވެ. 

މެންޗެސްޓަރ ޔުނައިޓެޑަށް މިހާރު ކުޅެމުން އަންނަ ކެސެމީރޯއަށް، އެ ޓީމުގެ އައު ކޯޗު، ރޫބެން އަމޮރިމްގެ ރޭވުންތަކުގައި ނެތުމުން، އޭނާއަށް މިހާރު ކުޅުމުގެ ފުރުސަތު ހޯދުމަކީ އުނދަގޫ ކަމެކެވެ. އެގޮތުން ޔުނައިޓެޑު އެންމެ ފަހުން ކުޅުނު ލީގު ތިން މެޗުގައި އެއްވެސް ވަރަކަށް އޭނާ ބޭނުންކޮށްފައި ނުވާއިރު، ޔޫރޮޕާ ލީގުގައި 2-1 އިން ރޭންޖާސް ބަލިކުރި މެޗުގައި ބަދަލު ކުޅުންތެރިއެއްގެ ގޮތުގައި ބޭނުންކޮށްފައިވެއެވެ. 

ކެސެމީރޯ ޔުނައިޓެޑު ދޫކޮށްލުމުގެ ޙުއްދަ ދީފައިވާކަމަށް ވެސް މީޑިއާ ރިޕޯޓުތައް ބުނެއެވެ. އޭނާގެ ރިލީޒް ފީއެއްގެ ގޮތުގައި ޔުނައިޓެޑުން ކަނޑައަޅާފައިވަނީ 37.4 މިލިއަން އެމެރިކާ ޑޮލަރެވެ. 

ރިޕޯޓުތައް ބުނާގޮތުން، ރޮނާލްޑޯ ވަނީ އަލް-ނަސްރުގެ ކަމާބެހޭ ފަރާތްތަކަށް ކެސެމީރޯ އެ ޓީމަށް ގެނައުމުގެ ކަންކަން ކުރިޔަށް ގެންދިއުމަށް ބުނެފައެވެ. އަދި މިއީ ލީގު ރޭހުގައި އެ ޓީމުން ކުރަމުންދާ މަސައްކަތަށް މުހިންމު ޓްރާންސްފަރއަކަށް ވާނެކަމަށް ވެސް ރޮނާލްޑޯ ޤަބޫލުކުރެއެވެ. 

ރެއާލް މެޑްރިޑުގެ އިތުރުން، ޔުނައިޓެޑުގައި ވެސް މި ދެ ކުޅުންތެރިން އެއްކޮށް ކުޅެފައިވެއެވެ. އެގޮތުން ޖުމްލަ 122 މެޗުގައި މި ދެ ކުޅުންތެރިން ވަނީ އެއް ޓީމަކަށް ކުޅެފައެވެ. 

ސައުދީ ޕްރޯ ލީގުގައި ކުޅުންތެރިން ގަނެވިއްކުމަށް ހުޅުވާލާފައިވާ މުއްދަތު ޖެނުއަރީ 30 އަށް ހަމަވާއިރު، ދެން ބާކީ މިއޮތީ މަދު ދުވަސްކޮޅެކެވެ. 

ރޮނާލްޑޯއާއެކު އަލް-ނަސްރުން ހަދާފައިވާ އެއްބަސްވުން އާކޮށްފައިވާއިރު، ކުޅުންތެރިން އެ ޓީމަށް ގެންނަނީ ރޮނާލްޑޯއާ މަޝްވަރާކުރުމަށްފަހުއެވެ.