އަދާނީ ޢާއިލާގެ ހަގު ދަރިފުޅުގެ ކައިވެނި ފެބްރުއަރީގައި ، އަމްބާނީ ކުރިވަރެއް ނުކުރާނެ

ދުނިޔޭގެ އެންމެ މުއްސަނދި މީހުންގެ ތެރޭގައި ހިމެނޭ އިންޑިއާގެ ވިޔަފާރިވެރިޔާ ގައުތަމް އަދާނީގެ އެންމެ ހަގު ދަރިފުޅު ޖީތް އަދާނީގެ ކައިވެނި ފެބްރުއަރީ މަހު ކުރިއަށްދާނެ ކަމަށް ވަނީ ހާމަކޮށްފައެވެ. މި ކައިވެނި ބޭއްވުމަށް ހަމަޖެހިފައިވަނީ ފެބްރުއަރީ މަހުގެ 7 ވަނަ ދުވަހުއެވެ.

މި ކައިވެނީގެ ޚަބަރު ގައުތަމް އަދާނީ ވަނީ ޕްރަޔާގްރާޖްގައި ބޭއްވުނު މަހާ ކުމްބް އަށް ޒިޔާރަތްކުރި އިރު ހާމަކޮށްފައެވެ. އޭނާ ހާމަކުރި ގޮތުގައި މި ކައިވެނި ކުރިއަށްދާނީ ވަރަށް އާދައިގެ ގޮތަކަށެވެ.

އަޅުގަނޑުމެންނަކީ އާންމު ރައްޔިތުންނެކޭ އެއްފަދަ ބައެއް. ޖީތްގެ ކައިވެނި ކުރިއަށްދާނީ އާދައިގެ އަދި އާދަކާދައާ އެއްގޮތްވާ ގޮތުގެ މަތިން

އަދާނީ 

27 އަހަރުގެ ޖީތް އަދާނީގެ ކައިވެނި ވަނީ ދުނިޔޭގެ ސަމާލުކަން ހޯދާފައެވެ. އެކި މީޑިއާތަކުން ބުނާ ގޮތުގައި މި ކައިވެނީގައި ޓޭލަރ ސްވިފްޓް، އެލޮން މަސްކް، ބިލް ގޭޓްސް، މާކް ޒަކަބާގް އަދި ޑޭނިއަލް ކްރޭގް ފަދަ މަޝްހޫރު ތަރިން ބައިވެރިވާނެއެވެ. ނަމަވެސް މި ކައިވެނީގައި 300 އަށްވުރެ ގިނަ މެހެމާނުން ބައިވެރިނުވާނެ ކަމަށް ވަނީ ބުނެފައެވެ.

ޖީތް އަދާނީ އަކީ އަދާނީ ގްރޫޕްގެ ދަށުން ހިންގާ އަދާނީ އެއަރޕޯޓްސްގެ ޑިރެކްޓަރެކެވެ. އޭނާ ކައިވެނި ކުރަން އުޅޭ  ދިވާ ޖައިމިން ޝާހް އަކީ ވިޔަފާރިވެރިއެއް ކަމުގައިވާ ޖައިމިން ޝާހްގެ ދަރިއެކެވެ

މި ކައިވެނީގެ ރަސްމިއްޔާތުތައް ކުރިއަށްދާނީ އަހްމަދާބާދުގައި ކަމަށާއި ކައިވެންޏާ ގުޅޭ އެހެނިހެން ހަފްލާތައް ފެބްރުއަރީ 5 އިން ފެށިގެން ކުރިއަށްދާނެ ކަމަށް ވަނީ ބުނެފައެވެ.