ދަނޑުވެރިކަމުގެ ދާއިރާ ތަރައްޤީކުރެވޭނެ ގޮތްތައް ދެނެގަތުމަށް ކަމާއި ގުޅުންހުރި ވުޒާރާގެ ޓީމެއް ރިސޯޓުތަކަށް

ދަނޑުވެރިކަމުގެ ދާއިރާ މިހާރަށްވުރެ ބޮޑަށް ފުޅާކޮށް، ތަރައްޤީކުރުމަށް ރިސޯޓުތަކާއި ގުޅިގެން ކުރެވޭނެ މަސައްކަތްތައް ދެނެގަތުމަށް، ދަނޑުވެރިކަމާއި ދިރޭތަކެއްޗާއި ބެހޭ ވުޒާރާގެ ޓީމެއް ރިސޯޓުތަކަށް ދަތުރެއް ފަށައިފިއެވެ.

މި ދަތުރުފުޅުގައި، ދަނޑުވެރިކަމާއި ދިރޭތަކެއްޗާއި ބެހޭ ވަޒީރު ޑރ. މަރްޔަމް މާރިޔާ ވެސް ބައިވެރިވެވަޑައިގަންނަވައެވެ. އެގޮތުން، ވަޒީރު ވަނީ އެ ވުޒާރާގެ ޓީމާއިއެކު މިއަދު ދަ ކްރޮސްރޯޑްސް މޯލްޑިވްސްއަށް ޒިޔާރަތްކުރައްވާ، އެ ތަނުގައި ދަނޑުވެރިކަން ކުރާ ގޮތް ބައްލަވާލައްވާފައެވެ. ދަނޑުވެރިކަމާއި ބެހޭ ވުޒާރާއިން ވިދާޅުވީ، މި ދަތުރުގެ މައިގަނޑު ބޭނުމަކީ، ރިސޯޓުތަކާއި އެ ވުޒާރާ އާއި ގުޅިގެން މަސައްކަތްކުރެވޭނެ ދާއިރާތަށް ދެނެގަތުން ކަމަށެވެ. މީގެ އިތުރުން، ރާއްޖޭގެ ދަނޑުވެރިކަމުގެ ދާއިރާގައި ރިސޯޓުތަކުން މުހިންމު ދައުރެއް އަދާކުރާކަން ވެސް އެ ވުޒާރާއިން ވަނީ ފާހަގަކުރައްވާފައެވެ. އެ ވުޒާރާއިން ވިދާޅުވީ، ރިސޯޓުތަކުގައި ދަނޑުވެރިކަން ކުރާ ފަރާތްތަކުގެ ހުނަރު ދައްކާލުމަކީ މުހިންމު ކަމެއްކަމަށެވެ. 

މި ދަތުރުފުޅުގައި، ވަޒީރު ޑރ. މާރިޔާ ވަނީ އެ ރިސޯޓުގައި ތަރުކާރީ އާއި މޭވާގެ ބާވަތްތައް ހައްދާ ގޮތްތަކުގެ މަޢުލޫމާތު އޮޅުންފިލުވާފައެވެ. އަދި އެ ތަނުގައި ދަނޑުވެރިކަން ކުރުމަށް ބޭނުންކުރާ ތަފާތު އުކުޅުތަކާއި، ގަސްތައް ބެލެހެއްޓުމަށް ކުރާ މަސައްކަތްތައް ވަޒީރު ވަނީ ބައްލަވާލައްވާފައެވެ. މީގެ އިތުރުން، ރިސޯޓްތަކުގައި ގެންގުޅޭ ހަރުދަނާ އުޞޫލުތަކާއި، ތަރުކާރީ އާއި މޭވާ އުފެއްދުމުގައި ގެންގުޅޭ ތަރުތީބުކަން މި ދަތުރުން ފެނިގެންދިޔަ ކަމަށް ދަނޑުވެރިކަމާއި ބެހޭ ވުޒާރާއިން ވަނީ ވިދާޅުވެފައެވެ.

މި ވުޒާރާއިން ވިދާޅުވީ، ރާއްޖޭގެ އެކިހިސާބުތަކުގައި ދަނޑުވެރިކަން ކުރާ ގޮތް ދެނެގަތުމުގެ ސަބަބުން ރާއްޖޭގައި ދަނޑުވެރިކަން އިތުރަށް ފުޅާވެގެންދާނެ ކަމަށެވެ. ހަމަ އެހެންމެ، މިކަމުގެ ސަބަބުން ރާއްޖެއިން ބޭރުން އެތެރެކުރާ ކާނާއަށް ބަރޯސާވާން ޖެހޭ މިންވަރު ކުޑަވެ، އަމިއްލަ އުފެއްދުންތައް ބޭނުންކުރެވޭ މިންވަރު ގިނަވެގެންދާނެކަމަށް، ދަނޑުވެރިކަމާއި ބެހޭ ވުޒާރާއިން ވިދާޅުވެއެވެ.