ކައިލް ވޯކާ އޭސީ މިލާނަށް ބަދަލުވުމަށް އެހީތެރިވެދިން ކޮންސަލްޓެންޓު ޑްރަގް ރެއިޑެއްގައި ހައްޔަރުކޮށްފި

ލޯނު އެއްބަސްވުމެއްގެ ދަށުން މެންޗެސްޓަރ ސިޓީގެ ކެޕްޓަން ކައިލް ވޯކާ އޭސީ މިލާނަށް ބަދަލުވުމަށް އެހީތެރިވެދިން ކޮންސަލްޓެންޓު ޑްރަގް ރެއިޑެއްގައި ހައްޔަރުކޮށްފިއެވެ. 

"ދަ ސަން" އިން ރިޕޯޓުކޮށްފައިވާ ގޮތުގައި، ވޯކާގެ ކޮންސަލްޓަންޓް، މައިކަލް ރެންކިން ހައްޔަރުކުރީ އޭނާ ދިރިއުޅެމުންދާ އެޕާޓްމެންޓު ރެއިޑްކުރިއިރު، އެ ތަނުން 90 ކެނަބިސް ގަސް ފެނިފައިވުމާ ގުޅިގެންނެވެ. މިތަކެތީގެ ބާޒާރުމަތީ އަގުގައި 75،000 ޕައުންޑު (1.4 މިލިއަން ރުފިޔާ) ހުންނާނެކަމަށް ވެސް އެ ނޫހުން ރިޕޯޓުކޮށްފައިވެއެވެ. 

ކެނަބިސް ގަސްތަކުގެ އިތުރުން، "ކްލާސް ބީ ޑްރަގް" އުފެއްދުމަށް ބޭނުންކުރާ އާލާތްތައް ވެސް އެ އެޕާޓްމަންޓުން ފެނިފައިވާކަމަށްވެއެވެ. 

މި އޮޕަރޭޝަން ހިންގާފައިވަނީ، ވޯކާ އޭސީ މިލާނަށް ބަދަލުވުމާ ގުޅިގެން، އޭނާއާއެކު ރެންކިން އިޓަލީގެ މިލާނަށް ޕްރައިވެޓް ޖެޓެއްގައި ދަތުރުކުރިތާ މާގިނައިރުތަކެއް ނުވަނީހެވެ. އަދި ވޯކާ އިޓަލީއަށް ދިއުމަށްފަހު އޭސީ މިލާނުގެ ސަޕޯޓަރުންނާ ފުރަތަމަ ފަހަރަށް ބައްދަލުކުރިއިރު، ރެންކިންއާ އެކީގައި ފޮޓޯ ވެސް ވަނީ ނަގާފައެވެ.

ރިޕޯޓުތައް ބުނާގޮތުން ރެންކިން އަންނަނީ ކޮންސަލްޓަންޓެއްގެ ގޮތުގައި ލަންޑަންގެ ފާމެއްކަމުގައިވާ ސީއޭއޭ ބޭސްގައި މަސައްކަތްކުރަމުންނެވެ. މި ތަނަކީ ޕްރޮފެޝަނަލް ފުޓްބޯޅަ ކުޅުންތެރިންގެ ކެރިއަރ ޑިވެލޮޕްމެންޓަށް މަސައްކަތްކޮށްދޭ ފާމްއެކެވެ. އެގޮތުން މި ތަނުގެ ކަސްޓަމަރުންގެ ތެރޭގައި ޓޮޓެންހަމްގެ ސޮން ހިއުންގް-މިން އާއި ޖޭމްސް މެޑިސަންއަކީ ހިމެނޭކަމަށް މީޑިއާ ރިޕޯޓުތައް ބުނެއެވެ.