ޚަބަރު
ޚާރިޖީ ވަޒީރު ޖަޕާނު ސަރުކާރުން ދިވެހިރާއްޖެއަށް އަލަށް ކަނޑައެޅުއްވި ސަފީރާއި ބައްދަލުކުރައްވައިފި

ޚާރިޖީ ވަޒީރު ޖަޕާން ސަރުކާރުން ދިވެހިރާއްޖެއަށް ކަނޑައެޅުއްވި ސަފީރާއި ބައްދަލުކުރެއްވުން|ފޮޓޯ: ޚާރިޖީ ވުޒާރާ
ހުލާސާ
ދިވެހި ސަރުކާރާއި ގާތުން އަބަދުވެސް މަސައްކަތް ކުރައްވާނެކަމަށް ސަފީރު ވިދާޅުވި
ދިވެހިރާއްޖޭގެ ޚާރިޖީ ވަޒީރު ޑރ. ޢަބްދުﷲ ޚަލީލް ޖަޕާނު ސަރުކާރުން ދިވެހިރާއްޖެއަށް އަލަށް ކަނޑައެޅުއްވި ސަފީރު އިޝިގާމީ ރުމީކޯއާ ބައްދަލުކުރައްވައިފި އެވެ.
މި ބައްދަލުވުމުގައި ވަޒީރު ވަނީ ސަފީރު އިޝިގާމީ ރުމިކޯއަށް މަރުޙަބާ ދަންނަވާފައެވެ. މީގެ އިތުރުން، ވަޒީރު ވަނީ ދިވެހިރާއްޖެއާއި ޖަޕާނާއި ދެމެދު އޮތް ގާތް ވަރުގަދަ ގުޅުން ފާހަގަކުރައްވާފައެވެ. ހަމަ އެހެންމެ، ޖަޕާނުގެ ސަރުކާރުން ދިވެހިރާއްޖެއަށް އެކިއެކި ގޮތްގޮތުން ވެދެއްވާ އެހީތެރިކަން ފާހަގަކޮށް ވަޒީރު ވަނީ އެކަމަށް ޝުކުރު ދަންނަވާފައެވެ. ވަޒީރު ވިދާޅުވީ، ޖަޕާނު ސަރުކާރަކީ އެކިއެކި ދާއިރާތަކުން ދިވެހިރާއްޖެއަށް އެހީތެރިކަން ފޯރުކޮށްދެއްވާފައިވާ ސަރުކާރެއް ކަމަށެވެ. އެގޮތުން، ދިވެހިންގެ ކުރިއެރުމަށާއި، ދުޅަހެޔޮކަމާއި، އަދި ޖަޕާނު ސަރުކާރުގެ އޮފިޝަލް ޑިވެލޮޕްމަންޓް ޕްރޮގުރާމުގެ ދަށުން ދީފައިވާ އެހީތައް ވަޒީރު ވަނީ ފާހަގަކުރައްވާފަ އެވެ.
މި ބައްދަލުވުމުގައި، ޖަޕާން ސަފީރު ވަނީ ދެ ޤައުމުގެ ގުޅުން އިތުރަށް ބަދަހިކުރެވޭނެ ގޮތްތަކާއި ގުޅޭގޮތުން މަޝްވަރާ ކުރައްވާފައެވެ. މީގެ އިތުރުން، އެކިއެކި ދާއިރާތަކުން ކުރިއަށް ދިއުމަށް ކުރެވޭނެ މަސައްކަތްތަކަށް އަލިއަޅުވާލައި ސަފީރު ވިދާޅުވީ، އަބަދުވެސް ދިވެހި ސަރުކާރާއި، ރާއްޖޭގެ ރައްޔިތުންނާއި ގާތުން މަސައްކަތް ކުރައްވާނެ ކަމަށެވެ.
މިބައްދަލުވުމުގައި ފޮރިން ސެކްރެޓަރީ ފާޠިމަތު އިނާޔާއާއި ޚާރިޖީ ވުޒާރާގެ ސްޓޭޓް މިނިސްޓަރ ޝެރީނާ ޢަބްދުއް ސަމަދުގެ އިތުރުން ސެކްރެޓަރީ ބައިލެޓެރަލް ޑރ. ޙާލާ ހަމީދު ވަނީ ބައިވެރިވެވަޑައިގެންފަ އެވެ.
ދިވެހިރާއްޖެއާއި ޖަޕާނާ ދެމެދު ސިޔާސީ ގުޅުން ޤާއިމުކުރީ 1967ވަނަ އަހަރުގެ ނޮވެންބަރު މަހުގެ 14ވަނަ ދުވަހުއެވެ.