ގުރައިދޫ ހޭންޑްބޯޅަ ކޯޓު ރަސްމީކޮށް ހުޅުވައިފި

ކ. ގުރައިދޫގެ ހޭންޑްބޯޅަ ކޯޓުގެ މަސައްކަތްތައް ނިންމާ އިއްޔެ ރަސްމީކޮށް ކޯޓު ހުޅުވައިފި އެވެ.

މި ކޯޓު ހުޅުއްވަވައިދެއްވީ، ކުޅިވަރާއި ހަށިހެޔޮކަމާއި ބެހޭ ވަޒީރު ޢަބްދުﷲ ރާފިޢު އެވެ. ކުޅިވަރާއި ހަށިހެޔޮކަމާއި ބެހޭ ވުޒާރާއިން ވިދާޅުވީ، މި ހޭންޑްބޯޅަ ކޯޓަކީ 1.5 މިލިއަން ރުފިޔާ ހޭދަވި ޕްރޮޖެކްޓެއް ކަމަށެވެ. މީގެ އިތުރުން އެ ވުޒާރާއިން ވިދާޅުވީ، ހޭންޑްބޯޅަ ކޯޓު ހަދާފައިވަނި ހޭންޑްބޯލް މޯލްޑިވްސް އިން ޤަބޫލުކުރާ ސައިޒަށް ކަމަށެވެ. އަދި، މި ކޯޓުގެ ހުރިހާ މަސައްކަތްތަކެއް ނިންމުމަށް އަހަރެއްހާ ދުވަސް ހޭދަވެފައިވާ ކަމަށް އެ ވުޒާރާއިން މަޢުލޫމާތު ދެއްވައެވެ.

ގުރައިދޫގެ ހޭންޑްބޯޅަ ކޯޓުގެ މަސައްކަތަކީ މި ސަރުކާރުން ވެރިކަމާއި ހަވާލުވީ އިރު ހުއްޓިފައި އޮތް ޕްރޮޖެކްޓެކެވެ. އެގޮތުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ހުއްޓިފައިވާ ކުޅިވަރުގެ މަޝްރޫޢުތައް ފުރިހަމަ ކުރެއްވުމަށް ވަޢުދުވެވަޑައިގެންފައެވެ. އެހެންކަމުން، ގުރައިދޫގެ ހޭންޑްބޯޅަ ކޯޓުގެ މަސައްކަތަކީ ވެސް މި ސަރުކާރުން ނިންމަވައިދެއްވި ޕްރޮޖެކްޓެކެވެ. މި ކޯޓުގެ މަސައްކަތް މި ސަރުކާރުން ފެއްޓެވީ 2023 ވަނަ އަހަރުގެ ތެރޭގައެވެ.     

ކ. ގުރައިދޫއަކީ ކުޅިވަރަށް ލޯބިކުރާ ގިނަ ޒުވާނުންތަކެއް ދިރިއުޅެމުން އަންނަ ރަށެކެވެ.