Ads by Exprox

ޚަބަރު

މަސްތުވާތަކެތި ބޭނުންކުރާ 100 އަށް ވުރެ ގިނަ މީހުން ފަރުވާގެ ނިޒާމަށް ވައްދައިފި

މަސްތުވާތަކެތި ބޭނުންކުރާ 100 އަށް ވުރެ ގިނަ މީހުން ފަރުވާގެ ނިޒާމަށް ވައްދައިފި

ނެޝަނަލް ޑްރަގް އެޖެންސީ/ފޮޓޯ: އެޑިޝަން އެމްވީ

ޙައްވާ ޒައިބާ މުޙައްމަދު

ޙައްވާ ޒައިބާ މުޙައްމަދު

05 ފެބްރުއަރީ 2025، 10:37

05 ފެބްރުއަރީ 2025، 10:37

ހުލާސާ

މިއީ މަސްތުގެ ޙާލަތުގައި މުޖްތަމަޢުގެ ތެރޭގައި އުޅޭ މީހުންނަށް ޙާއްޞަކޮށްގެން ފެށި އޮޕަރޭޝަނެއް

މަސްތުވާތަކެތި ބޭނުންކުރާ 100 އަށް ވުރެ ގިނަ މީހުން މިހާރު ވަނީ ފަރުވާގެ ނިޒާމަށް ވައްދާފައި ކަމަށް ނެޝަނަލް ޑްރަގް އެޖެންސީ އިން ވިދާޅުވެއްޖެ އެވެ. މަސްތުވާތަކެއްޗާއި ދެކޮޅަށް ނެޝަނަލް ޑްރަގް އެޖެންސީއާއި ފުލުހުން ގުޅިގެން، މިދިޔަ އޮކްޓޯބަރު މަހު ވަނީ ޚާއްޞަ އޮޕަރޭޝަނެއް ފަށައިފައެވެ. 

ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާގެ ސްޓޭޓް މިނިސްޓަރ އަލްއުސްތާޛާ ލުބުނާ މުޙައްމަދު ޒާހިރު ހުސައިން ވިދާޅުވީ، މި އޮޕަރޭޝަންގެ ދަށުން އެންމެ ފުރަތަމަ މަސައްކަތް ފެށީ ހަމައެކަނި މާލެގައި ކަމަށެވެ. ނަމަވެސް، މިހާރު މި އޮޕަރޭޝަން ފުޅާކޮށް މާލެއާއި އަތޮޅުތެރޭގެ ރަށްތައް ހިމެނޭހެން މަސްތުވާތަކެތީގެ ވަބާގައި ޖެހިފައިވާ، ޖުމްލަ 100 އަށް ވުރެ ގިނަ މީހުން ފަރުވާގެ ނިޒާމަށް ވައްދާފައިވާ ކަމަށް ސްޓޭޓް މިނިސްޓަރު ވިދާޅުވިއެވެ. މީގެ އިތުރުން، ފަރުވާގެ ތެރެއިން ކޮންމެ މީހެއްގެ ވެސް މެޑިކަލް ފަރުވާއާއި، ނަފްސާނީ އިވެލުއޭޝަންތައް ހެދުމުގެ އިތުރުން، ކައުންސިލިން ބަރާބަރަށް ދެމުން ގެންދާ ކަން ސްޓޭޓް މިނިސްޓަރ ލުބްނާ ވަނީ ފާހަގަކުރައްވާފައެވެ. 

މި އޮޕަރޭޝަންގެ ދަށުން ފަރުވާގެ ނިޒާމަށް ވެއްދުމުގައި އިސްކަން ދެނީ، މަސްތުގެ ޙާލަތުގައި މުޖުތަމަޢުގެ ތެރޭގައި އުޅޭ މީހުންނަށެވެ. އެގޮތުން، ވައްކަމާއި ފޭރުމުގެ ކަންކަމުގައި ހަރަކާތްތެރިވާ މަސްތުވާތަކެތި ބޭނުންކުރާ މީހުންނާއި، މަގުމަތީގައި މަސްތުގެ ޙާލަތުގައި ސަލާން ޖަހަން ތިބޭ މީހުން ވަނީ މި ފަރުވާގެ ނިޒާމުގެ ތެރެއަށް ވައްދާފައެވެ. މީގެ އިތުރުން، މަގުމަތިވެފައިވާ،  މިސްކިތްތަކުގައި ނިދާ މީހުނަށް ވެސް މި ފަރުވާގެ ނިޒާމުގެ ދަށުން އަންނަނީ އެހީތެރިކަން ފޯރުކޮށްދެމުންނެވެ. މީގެ ތެރޭގައި، ރެސިޑެންޝަލް ފަރުވާ އަދި ކޮމިއުނިޓީ ފަރުވާގެ ނިޒާމު ހިމެނެއެވެ.

މަސްތުވާތަކެތީގެ ކޭސްތައް ވީހާވެސް އަވަހަކަށް ނެޝަނަލް ޑްރަގް އެޖެންސީ ގެ ހޮޓްލައިން ނަންބަރު 1410 އަކަށް ގުޅުއްވާ ރިޕޯޓުކުރެއްވުމަށް ސްޓޭޓް މިނިސްޓަރ ވަނީ އެދިވަޑައިގެންފައެވެ. ހަމަ އެހެންމެ، ފަރުވާއަށް ފަހު މުޖުތަމަޢަށް ދޫކޮށްލާ ފަރާތްތަކަށް އެހީތެރިވުމަށް ލުބްނާ ވަނީ އިލްތިމާސްކުރައްވާފައެވެ.

މި ލިޔުން ކިޔާލުމުން

Ads by MSS