Ads by Exprox

ޚަބަރު

ނިމިދިޔަ ޖެނުއަރީ މަހު ވޭޕްގެ 14 މައްސަލައެއް: 12 މީހުން ޖޫރިމަނާކުރި

ނިމިދިޔަ ޖެނުއަރީ މަހު ވޭޕްގެ 14 މައްސަލައެއް: 12 މީހުން ޖޫރިމަނާކުރި

މަގުމަތީގައި ފުލުހުންތަކެއް ޙަރަކާތްތެރިވަނީ/ފޮޓޯ: ސޯޝަލް މީޑިއާ

ޙައްވާ ޒައިބާ މުޙައްމަދު

ޙައްވާ ޒައިބާ މުޙައްމަދު

05 ފެބްރުއަރީ 2025، 01:49

05 ފެބްރުއަރީ 2025، 01:49

ހުލާސާ

ދުންފަތް ކޮންޓްރޯލްކުރުމުގެ ޤާނޫނަށް ތަބާވުމަށް ފުލުހުން ވަނީ އިލްތިމާސްކުރައްވާފައި

ނިމިދިޔަ ޖަނަވަރީ މަހު ވޭޕް ބޭނުންކޮށްގެން 14 މައްސަލައެއް ފުލުހުން ބަލާފައިވާކަމަށް ފުލުހުންގެ ޚިދުމަތުން ވިދާޅުވެއްޖެއެވެ. އަދި މި 14 މައްސަލައިގެ ތެރެއިން ޖުމްލަ 12 މީހަކު ޖޫރިމަނާކޮށްފައިވާކަމަށް ވެސް ފުލުހުން ވިދާޅުވިއެވެ.

ވޭޕްގެ އެކި ބާވަތްތައް ރާއްޖޭގައި ބޭނުންކޮށް، މިތަކެތި ރާއްޖެ އެތެރެކުރުމާއި ހިލޭ ބެހުމާއި، ވިއްކުން މަނާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މިދިޔަ އަހަރުގެ އޮކްޓޫބަރު މަހުގެ 14 ވަނަ ދުވަހު ނިންމަވާފައެވެ. އެހެންކަމުން، ދުންފަތް ކޮންޓްރޯލްކުރުމާއި ބެހޭ ޤާނޫނު އިސްލާޙުކޮށް، އެ ޤާނޫނަށް މިދިޔަ އަހަރުގެ ނޮވެމްބަރު މަހުގެ 15 ވަނަ ދުވަހުން ފެށިގެން ވަނީ ޢަމަލުކުރަން ފަށައިފައެވެ. މީގެ އިތުރުން، ރާއްޖޭގައި ވޭޕްކުރުމަށް ބޭނުންކުރާ އާލާތްތަކާއި، އިލެކްޓްރޯނިކް ސިނގިރޭޓާއި، ވޭޕާއި އެކި ބޭނުންކުރާ އެހެނިހެން އުފެއްދުންތައް ހިލޭ ބެހުމާއި ވިއްކުން މަނާކޮށްފައިވަނީ، މިދިޔަ އަހަރުގެ ޑިސެންބަރު މަހުގެ 15 ވަނަ ދުވަހުން ފެށިގެންނެވެ. ނަމަވެސް، މިދިޔަ ޑިސެންބަރު މަހުގައި ވެސް ދުންފަތް ކޮންޓްރޯލްކުރުމާބެހޭ ޤާނޫނާ ޚިލާފުވި 20 މައްސަލައެއްގައި 17 މީހަކު ޖޫރިމަނާކޮށްފައިވާ ކަމަށް ފުލުހުންގެ ޚިދުމަތުން ވިދާޅުވިއެވެ. 

ދުންފަތް ކޮންޓްރޯލް ކުރުމާއި ބެހޭ ޤާނޫނުގައި ވާ ގޮތުން، ރާއްޖެއަށް ވޭޕްގެ ބާވަތްތަކާއި އެއާއެކު ބޭނުންކުރުމަށް ތައްޔާރުކޮށްފައި ހުންނަ ބާވަތްތައް އެތެރެކޮށްފިނަމަ 50،000 ރުފިޔާއިން ޖޫރިމަނާ ކުރެވޭނެ އެވެ. ހަމަ އެހެންމެ، ރާއްޖެއަށް އެތެރެކުރާ ކޮންމެ އީ-ސިގިރޭޓަކަށް 10،000 ރުފިޔާގެ އިން ޖޫރިމަނާކުރާނެ އެވެ. މީގެ އިތުރުން، ވޭޕްކުރަން ބޭނުންކުރާ އެއްވެސް އާލާތެއް ވިއްކައިފިނަމަ، 20،000 ރުފިޔާއިން ޖޫރިމަނާކުރާނެ އެވެ. އަދި، މިތަކެތި ހިލޭ ބަހައިފި ނަމަ ނުވަތަ ވިއްކާ ނަމަ، ވިއްކި ކޮންމެ އެއްޗަކަށް 10،000 ރުފިޔާގެ މަގުން ޖޫރިމަނާކުރާނެ އެވެ. ހަމަ އެހެންމެ، މި ޤާނޫނުގައި ވާ ގޮތުން ވޭޕް ކުރުމަށް ބޭނުންކުރާ އެއްވެސް އެއްޗެއް ކުޑަ ކުއްޖަކަށް ވިއްކައިފިނަމަ ނުވަތަ، ހިލޭ ބަހައިފި ނަމަ، އެފަދަ އާލާތްތައް ވިއްކުމުންނާއި ހިލޭ ބެހުމުންކުރާ ޖޫރިމަނާގެ އިތުރަށް 50،000 ރުފިޔާއިން އެމީހަކު ޖޫރިމަނާ ކުރާނެއެވެ.

ފުލުހުން ވިދާޅުވީ، ޖޫރިމަނާ ދެއްކުމަށް ވާރު ޕޭގެ ޕޭމަންޓް ލިންކެއް ހިމަނާފައިވާ މެސެޖެއް ފުލުހުން ފޮނުވާނެ ކަމަށެވެ. އަދި ދުންފަތް ކޮންޓްރޯލްކުރުމުގެ ޤާނޫނަށް ފުރިހަމައަށް ޢަމަލުކުރުމަށް ފުލުހުން ވަނީ އެދިވަޑައިގެންފައެވެ. 

މި ލިޔުން ކިޔާލުމުން

Ads by MSS