ސިވިލް ސަރވިސްއާއި ކައުންސިލްތަކުގެ މުވައްޒަފުންގެ މުސާރަ މިއަހަރު ބޮޑުވާނެ: ރައީސް މުޢިއްޒު

ސިވިލް ސަރވިސް އާއި ކައުންސިލްތަކުގެ މުވައްޒަފުންގެ މުސާރަ މިއަހަރު ބޮޑުވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ. މިކަން އެމަނިކުފާނު ހާމަކުރެއްވީ މިއަދު ރައްޔިތުންގެ މަޖިލީހުގައި އިއްވެވި ރިޔާސީ ބަޔާނުގައެވެ.

ރައީސް މުޢިއްޒު ވިދާޅުވި ގޮތުގައި، ޕޭހަމަނައިޒޭޝަން މަސައްކަތުގެ ތެރެއިން ސިވިލް ސަރވިސްއާއި ޖުޑީޝަރީގެ މުވައްޒަފުންނާއެކު ކައުންސިލްތަކުގެ މުވައްޒަފުންގެ މުސާރަވެސް ހާމަނައިޒްކުރެވި ބޮޑުކުރެވޭނެއެވެ. މިކަމަށްޓަކައި މިއަހަރުގެ ބަޖެޓުގައި 500 މިލިއަން ރުފިޔާ ވަނީ ކަނޑައަޅާފައެވެ.

އަޅުގަނޑު ވަޢުދުވެފައިވާ ފަދައިން ކައުންސިލްތަކުގެ މުވައްޒަފުންގެ މުސާރައަށްވެސް ހެޔޮ ބަދަލެއް ގެންނަން ޖެހޭނެކަމަށްވެސް ޤަބޫލްކުރަން. އިރާދަކުރެއްވިއްޔާ މިއަހަރު ޕޭ ހާމަނައިޒް ކުރެވިގެން މުސާރަ ބޮޑުވެގެންދާ ސިވިލް ސަރވިސް މުވައްޒަފުންނާ ޖުޑިޝަރީގެ މުވައްޒަފުންނާއެކު ކައުންސިލްތަކުގެ މުވައްޒަފުންގެ މުސާރަވެސް ހާމަނައިޒްކުރެވި ބޮޑުކުރާނެ

 ރައީސް މުޢިއްޒު 

މީގެ އިތުރުން، ލާމަރުކަޒީ ނިޒާމު ހަރުދަނާ ކުރުމަށް ސަރުކާރުން ގިނަ މަސައްކަތްތަކެއް ކުރަމުންދާ ކަމަށް ރައީސް ފާހަގަކުރެއްވިއެވެ. އެގޮތުން، 55 ކައުންސިލް އިދާރާ ބިނާކުރުމުގެ މަޝްރޫޢު ކޮންޓްރެކްޓްކޮށްފައިވާ ކަމަށާއި، ޗައިނާގެ ހިލޭ އެހީގައި އިތުރު 50 ކައުންސިލް އިދާރާ އިމާރާތް ކުރުމުގެ މަސައްކަތް ފެށުމަށް ތައްޔާރުވަމުންދާ ކަމަށް ވިދާޅުވިއެވެ.

އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީތައް ބާރުވެރިކުރުމަށްޓަކައި ވަޒީފާއާބެހޭ ޤާނޫނާއި ލާމަރުކަޒީ ޤާނޫނަށް އިސްލާހުތަކެއް މިމަހު ހުށަހަޅުއްވާނެ ކަމަށްވެސް ރައީސް މުޢިއްޒު ވިދާޅުވިއެވެ. މި އިސްލާހުތަކުގެ ސަބަބުން، މި ކޮމިޓީތަކުގެ މެންބަރުންނަށް މުސާރައިގެ ދަރަޖަ ލިބި، ރޯދަ އެލަވަންސް ލިބުމާއި، ބޭންކުން ލޯނު ނެގުމަށް މަގުފަހިވެ، ވިހެއުމުގެ ޗުއްޓީގެ ކަންކަންވެސް ހައްލުވެގެންދާނެ ކަމަށް އެމަނިކުފާނު ވިދާޅުވިއެވެ.