ރިޔާސީ ބަޔާން: އައްޑޫ ސިޓީ ބްރިޖްގެ ސަރވޭ އާއި އިންޖިނިއަރިންގ ޑިޒައިންކުރާނެ ފަރާތެއް ހޯދުމަށް މިމަހު އިޢުލާނު ކުރާނެ

އައްޑޫ ސިޓީ ބްރިޖުގެ މަސައްކަތަށް ބޭނުންވާ ޑީޓެއިލްޑް ސަރވޭ އާއި އިންޖިނިއަރިންގ ޑިޒައިންކުރާނެ ފަރާތެއް ހޯދުމަށް މިމަހުގެ ތެރޭގައި ޢިއުލާންކުރާނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ. މިއަދު ބޭއްވި ރިޔާސީ ބަޔާނުގައި ރައީސް ވަނީ އައްޑޫ ސިޓީގެ ކުރިއެރުމަށް ހުރި މަޝްރޫޢުތަކަށް އަލިއަޅުވާލާފައެވެ. 

ރައިސުލްޖުމްހޫރިއްޔާގެ މި އަހަރުގެ ރިޔާސީ ބަޔާނުގައި އިންޑިއާގެ ލައިން އޮފް ކްރެޑިޓްގެ ދަށުން އައްޑޫ ސިޓީގައި ކުރިއަށްގެންދާ މަގުހެދުމުގެ މަޝްރޫޢު ނިމުމަކަށް އައިސްފައިވާކަން ފާހަގަކުރައްވާފައިވެއެވެ. ރައީސް ވިދާޅުވީ މިމަޝްރޫޢުގެ ދެވަނަ ފިޔަވަހީގެ ދަށުން، އައްޑޫ ލިންކް ރޯޑާއި އެހެނިހެން މުހިންމު މަގުތައް ރަނގަޅު ފެންވަރަށް ހެދުމުގެ މަސައްކަތް މިއަހަރު ފެށޭނެކަމަށެވެ. އަދި އައްޑޫ ސިޓީ ބްރިޖްގެ މަސައްކަތްކުރުން އަވަސްކުރުމަށްޓަކައި، ޑީޓެއިލްޑް ސަރވޭ އާއި އިންޖިނިއަރިންގ ޑިޒައިން ކުރާނެ ފަރާތެއް ހޯދައި ޓެކްނިކަލް މަސައްކަތް ކުރިއަށް ގެންދިއުމަށް މިމަހުގެ ތެރޭގައި އިޢުލާން ކުރައްވާނެކަމަށް އެމަނިކުފާނު ވިދާޅުވިއެވެ.

އައްޑޫ ބްރިޖުގެ މަސައްކަތް ކުރިއަށް ގެންދިއުން އަވަސްކުރުމަށް ޑީޓެއިލްޑް ސަރވޭ އަދި އިންޖިނިއަރިންގ ޑިޒައިން ކުރާނެ ފަރާތެއް ހޯދައި ޓެކްނިކަލް މަސައްކަތް ކުރިއަށް ގެންދިއުމަށް ސަރުކާރުން މިމަހުގެ ތެރޭގައި އިޢުލާން ކުރާނަން.

ރައީސް ވިދާޅުވިއެވެ.

ޢިޤުތިޞާދީ ގޮތުން ޤައުމަށް ނަފާވާނެ ފަދަ ޕްރޮޖެކްޓުތަކަށް ބަލާލާއިރު، އައްޑޫ ސިޓީ ގަން އިންޓަރނޭޝަނަލް އެއަރޕޯޓު މިއަހަރުގެ ތެރޭގައި ހުޅުވާނެކަންވަނީ ޢިއުލާންކުރައްވާފައެވެ. ހަމައެހެންމެ، އައްޑުއަށް ދިމާވެފައިވާ ފެނުގެ ނިޒާމުގެ މައްސަލަ ޙައްލުކުރުމަށް މި ސަރުކާރުން ފެށި 282 މިލިއަން ރުފިޔާގެ މަޝްރޫޢުގެ މަސައްކަތް ނިމި އޭގެ ފަސޭހަކަން މިއަހަރު ތެރޭގައި އައްޑޫގެ ރައްޔިތުންނަށް ލިބިގެންދާނެކަމަށް ރައީސުލްޖުމްހޫރިއްޔާ ވިދާޅުވެފައިވެއެވެ. 

އައްޑޫ ސިޓީގެ 6 ރަށެއްގައި ޖުމްލަ 1100 ޔުނިޓު، ބޯހިޔާވަހިކަމުގެ ޕްރޮޖެކްޓުތަކެއްގެ ގޮތުގައި ތަރައްޤީކުރުމަށް ކޮންޓްރެކްޓަރުން ހޯދުމަށް ވާނީ އިޢުލާންކޮށްފައިވާކަމަށް ޑރ. މުޙައްމަދު މުޢިއްޒު ވިދާޅުވެފައިވެއެވެ. އައްޑޫ ސިޓީ ފޭދޫގައި ތަރައްޤީކުރާ "އިސްރަށްވެހިންގެ ހިޔާވަހި" ޕަބްލިކް ޕްރައިވެޓް ޕާޓްނަރޝިޕްގެ ދަށުން ކުރިއަށްގެންދިޔުމަށް ޢިއުލާން ކުރައްވާފައިވާކަމާއި، ރާއްޖޭގެ 3 ސަރަޙައްދެއްގައި ޤާއިމުކުރާ ޑޮމެސްޓިކް ވަޔަލަންސް ޝެލްޓަރތައް ޤާއިމުކުރުމަށް ކުރަމުންދާ މަސައްކަތުގެ ދަށުން ފުރަތަމަ ޝެލްޓަރގެ މަސައްކަތް އައްޑޫ ސިޓީގައި ފެށުމަށް މިމަހު ޢިއުލާންކުރާނެކަމަށް ވެސް ރައީސް ވިދާޅުވިއެވެ.