"ޑިޖިޓަލް އިންޤިލާބީ ބަދަލެއް ގެނެވިއްޖެނަމަ ސަރުކާރުގެ ސިޔާސަތުތައް ހާމަކަންބޮޑުކޮށް ފެންނާނެ" - ރައީސުލްޖުމްހޫރިއްޔާ

ދިވެހިރާއްޖޭގައި ޑިޖިޓަލް އިކޮނޮމީއެއް ޤާއިމްކުރެވިއްޖެނަމަ ކޮރަޕްޝަން ނައްތާލުމަށް ފަސޭހަވުމާއެކު، ސަރުކާރުގެ ސިޔާސަތުތައް ހާމަކަންބޮޑު ގޮތެއްގައި ރައްޔިތުންނަށް ފެންނަން ފަށާނެކަމަށް ރައީސުލްޖުމްހޫރިއްޔާ ވިދާޅުވިއެވެ. 

މި މަސައްކަތްތަކުގެ ނަތީޖާއަކަށް ވާނީ ކޮރަޕްޝަން ނައްތާލުމަށް ފަސޭހަވެގެން ދިއުން. ސަރުކާރުގެ ސިޔާސަތުތައް ހާމަކަންބޮޑު ގޮތެއްގައި މީހުންނަށް ފެންނަންފެށުން. ސިޓީތަކާއި އެހެނިހެން ފޯމުތައް ހުށަހެޅުމަށް އިސްރާފުވެ ގެއްލިގެންދާ ވަގުތުތައް ސަލާމަތްވުން. އޭރުން ވަކި ސިސްޓަމެއްގެ ތެރެއިން ކަންކަމުގެ ސްޓޭޓަސް ބަލާލެވި ސަރުކާރުން އެޓެންޑް ވަމުންދާގޮތް ވަގުތުން ފެންނަމުންދާނެ. ތިމާގެ އަމިއްލަ ރެކޯޑްސްއަށް އެއްވެސް ފަރާތަކުން އެކްސެސް ވިއަސް، ބަދަލެއް ގެނައިކަމުގައި ވިޔަސް، އޭގެ ފުރިހަމަ މަޢުލޫމާތު އެމީހަކަށް ވަގުތުން ބަލާލުމުގެ ހިތްހަމަޖެހުމާއި، ރައްކާތެރިކަން ޔަޤީންވެގެންދާނެ

ރައީސް ވިދާޅުވިއެވެ.

ރާއްޖޭގައި ޑިޖިޓަލް އައިޑީ އެއްގެ ގޮތުގައި އީ-ފާސް ތަރައްޤީ ކުރެވިފައިވީ ނަމަވެސް، ބައިނަލްއަޤްވާމީ މިންގަނޑުތަކާއި، ބެސްޓް ޕްރެކްޓިސްތަކާއި ހަމަކުރެވޭ މިންވަރަށް ޑިޖިޓަލް އައިޑީ ތަރައްޤީކޮށް އީފާސްގެ އާކިޓެކްޗަރ ހަރުދަނާ ކުރެވިފައިނުވާކަމަށާއި، މިދާއިރާ ވެސް ބައިނަލްއަޤުވާމީ ފެންވަރަށް ތަރައްޤީކުރަން ޖެހޭނެކަމަށް ރައީސުލްޖުމްހޫރިއްޔާ ވިދާޅުވިއެވެ.