ކުރިޔަށް އޮތް ރަމަޟާން މަހު ބާޒާރުގެ އަގުތައް ހިފެހެއްޓުމުގެ މަސައްކަތް ފަށައިފިން: ރައީސުލްޖުމްހޫރިއްޔާ

ކުރިޔަށް އޮތް ރަމަޟާން މަހު ބާޒާރުގެ އަގުތައް ހިފެހެއްޓުމުގެ މަސައްކަތް މިހާރު ފަށާފައިވާކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

މި ކަމަށް އެ މަނިކުފާނު އަލިއަޅުވާލެއްވީ މި އަހަރަށް ރައްޔިތުންގެ މަޖިލީސް ހުޅުވައިދެއްވުމަށް ބޭއްވެވި ޖަލްސާގައި ރިޔާސީ ބަޔާން އިއްވަވަމުންނެވެ. 

ރައީސުލްޖުމްހޫރިއްޔާ ވިދާޅުވީ، ރައްޔިތުންގެ ފުދުންތެރިކަން އިތުރުކުރުމާއި ބާޒާރުގެ އަގުތައް އެއްހަމައެއްގައި ހިފެހެއްޓުމަކީ އިޤްތިޞާދީ ސިޔާސަތުގެ އެއް ބައިކަމަށާއި، އެގޮތުން މިދިޔަ އަހަރު އެކަން އެކަށައެޅުމަށް ގިނަ މަސައްކަތްތަކެއް ކުރެއްވެވިކަމަށެވެ.

އަދި ޒަރޫރީ ކާބޯތަކެތި، ޙާއްސަކޮށް ރަމަޟާން މަހުގައި ކޮންމެހެން ބޭނުންވާ ތަކެތީގެ އަގުތައް ބޮޑުވިޔަނުދީ  ހިފެހެއްޓުމަކީ ރާއްޖޭގެ ތާރީޙުގައި އަލަށް ހިނގިކަމެއް ކަމަށް ވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ. 

މިގޮތުން، ރާއްޖޭގެ ބާޒާރުގެ އަގުތައް، އެވްރެޖްކޮށް އެއް މިންވަރެއްގައި ހިފެހެއްޓުމަށް، މިދިޔަ އަހަރު މުހިންމު މަސައްކަތްތަކެއް ކުރެވުނު. ވަކިން ޚާއްޞަކޮށް، ރާއްޖޭގައި ފުރަތަމަ ފަހަރަށް، ރަމަޟާން މަހުގައި ކޮންމެހެން ބޭނުންވާ ތަކެތީގެ އަގުތައް ބޮޑުވިޔަނުދީ ހިފަހައްޓާ، ރައްޔިތުން ބޭނުންވާ މުދާ މެދުކެނޑުމެއްނެތި ލިބެން ހުންނާނެކަން، މިދިޔަ 1445 ވަނަ އަހަރުގެ ރަމަޟާން މަހު ވާނީ ކަށަވަރުކޮށްދީފައި.

ރައީސުލްޖުމްހޫރިއްޔާ ވިދާޅުވިއެވެ.

އެގޮތުން 2023 ވަނަ އަހަރު 2.9 އިންސައްތައިގައި އިންފްލޭޝަން ހުރިއިރު، އެ އަދަދު 2024 ގައި ވަނީ 0.8 އިންސައްތައަށް ކުޑަކުރެވިފައިކަމަށް ވެސް ރައީސުލްޖުމްހޫރިއްޔާ ވިދާޅުވިއެވެ.

މިދިޔަ އަހަރު ރާއްޖޭގެ އިންފްލޭޝަން، ނުވަތަ ތަކެތީގެ އަގުތައް އެވްރެޖްކޮށް އިތުރުވެފައި ވަނީ 0.8 އިންސައްތައިން. މިއީ 2023 ވަނަ އަހަރު އިންފްލޭޝަން ހުރި މިންވަރު ކަމަށްވާ 2.9 އިންސައްތައަށްވުރެ ދަށް މިންވަރެއް.  

ރައީސުލްޖުމްހޫރިއްޔާ ވިދާޅުވިއެވެ

އަދި މި އަހަރުވެސް ރާއްޖޭގެ އިންފްލޭޝަން މަތިވިޔަ ނުދީ ހިފެހެއްޓުމަށް މިހާރު މަސައްކަތް ފައްޓަވާފައިވާކަމަށް ވެސް ވަނީ ވިދާޅުވެފައެވެ.