އޯޓިޒަމް ހުންނަ ކުދިންނަކީ މުޖްތަމަޢަށް ފައިދާހުރި ބައެއްގެ ގޮތުގައި ބިނާކުރަންޖެހޭ: މެޑަމް ސާޖިދާ

އޯޓިޒަމް ހުންނަ ކުދިންނަކީ މުޖުތަމަޢަށް ފައިދާހުރި ބަޔަކަށް ހަދަންޖެހޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެ އަނބިކަބަލުން މެޑަމް ސާޖިދާ މުޙައްމަދު ވިދާޅުވެއްޖެ އެވެ. އެކަމަނާ މިފަދައިން ވިދާޅުވީ، މޯލްޑިވްސް އޯޓިޒަމް އެސޯސިއޭޝަންގެ 15 ވަނަ އަހަރީ ޖަލްސާ ޝަރަފުވެރިކޮށްދެއްވައި ވާހަކަދައްކަވަމުންނެވެ.

މެޑަމް ސާޖިދާ ވިދާޅުވީ، އޯޓިޒަމް ހުންނަ ފަރާތްތަކަށް ދިމާވާ ދަތިތަކާއި، އެފަރާތްތަކުގެ އިޙުސާސްތަކަށް ދިވެހި މުޖްތަމަޢުން ވަރަށް ބޮޑަށް ސަމާލުކަންދޭން ޖެހޭ ކަމަށެވެ. އަދި، އެ ފަރާތްތަކަކީ މުޖުތަމަޢަށް ހޭލުންތެރި ބަޔަކަށް ހެދުމަށް އެންމެން ވެސް މަސައްކަތް ކުރައްވަން ޖެހޭ ކަން އެކަމަނާ ވަނީ ފާހަގަކުރައްވާފަ އެވެ. މެޑަމް ސާޖިދާ ވިދާޅުވީ، އޯޓިޒަމް ހުންނަ ކުދިންނަކީ ސިކުނޑި މަސައްކަތް ކުރާ ގޮތް ތަފާތު ކުދދިންތަކެއް ކަމަށެވެ. ނަމަވެސް، މުޖްތަމަޢުގައި އެ މީހުނާއި އެކު އުޅޭއިރު ޢަމަލުތައް ބަހައްޓާގޮތް ތަފާތުކުރުމަކީ ރަނގަޅު ކަމެއް ނޫންކަމަށް އެކަމަނާ ވަނީ ފާހަގަކުރައްވާފަ އެވެ. ހަމަ އެހެންމެ، އެ މީހުން ކިބައިގައި ވެސް ޚާއްޞަ ހުނަރުތަކެއް ހުންނާނެ ކަމަށް މެޑަމް ވިދާޅުވިއެވެ. އެހެންކަމުން، އެ ފަރާތްތަކުގެ ހުނަރުތައް ދެނެގަނެ، މުޖްތަމަޢުގައި ކުރާ ކަންކަމުގައި އެމީހުން ބައިވެރިކުރުމަކީ މުހިންމު ކަމެއް ކަމަށް އެކަމަނާ ވިދާޅުވިއެވެ.

މެޑަމް ސާޖިދާ ވިދާޅުވީ، އޯޓިޒަމަކީ ޞިއްޙީ ގޮތުން އިންސާނާ ތަޖުރިބާ ކުރާ ޚާއްޞަ ޙާލަތެއް ކަމަށެވެ. އަދި މިކަމަށް ޚާއްޞަ ފަރުވާއެއް ދެވިއްޖެ ނަމަ ހީވެސް ނުކުރާ ވަރުގެ އާދަޔާޚިލާފު، އުފާވެރި ނަތީޖާތަކެއް ނެރެވޭނެ ކަމަށް އެކަމަނާ ވިދާޅުވި އެވެ. ހަމަ އެހެންމެ، މިފަދަ ކުދިންނަށް އަމިއްލަ ޙައްޤުތަކަށް ވަކާލާތުކުރެވޭނެ މާހައުލެއް ޤާއިމްކޮށްދިނުމުގެ މުހިންމުކަން އެކަމަނާގެ ވާހަކާގައި ވަނީ ފާހަގަކުރައްވާފަ އެވެ. މީގެ އިތުރުން، މެޑަމް ސާޖިދާ ވަނީ، އޯޓިޒަމް ހުންނަ ކުދިންގެ ބެލެނިވެރިންނަށް ޚާއްޞަ މެސެޖެއް ދެއްވާފައެވެ. އެކަމަނާ ވިދާޅުވީ، ކުއްޖާގެ އޯޓިޒަމް ހުންނަކަން އެނގުމުން މާޔޫސްވުމުގެ ބަދަލުގައި އެ ކުއްޖެއްގެ ކިބައިގައި ހުންނަ ހުނަރުތައް ދެނެގަތުމަކީ މުހިންމު ކަމެއް ކަމަށެވެ. އަދި، އެ ހުނަރުތައް ތަރައްޤީކުރުމަށް އެހީތެރިވެދީ، އެ ކުދިންނަށް ވީހާވެސް ގިނަ ފުރުސަތުތަކެއް ހޯދައިދިނުމަށް އެކަމަނާ ވަނީ އެދިވަޑައިގެންފައެވެ. 

މޯލްޑިވެސް އޯޓިޒަމް އެސޯސިއޭޝަނަކީ، 2010 ވަނަ އަހަރު އުފެދުނު އެސޯސިއޭޝަނެކެވެ. މި އެސޯސިއޭޝަނަށް 15 އަހަރު ފުރުމުގެ ގޮތުން ބޭއްވި ޖަލްސާގައި، އެ އެސޯސިއޭޝަނަށް 10 އަހަރަށްވުރެ ގިނަ ދުވަހު ޚިދުމަތްކޮށްދީފައިވާ މުވައްޒަފުންނަށް ވަނީ ހަނދާނީ ފިލާ ދީފައެވެ. އަދި، އެކިއެކި ގޮތްގޮތުން އެ އެސޯސިއޭޝަނަށް އެހީތެރިކަން ފޯރުކޮށްދީފައިވާ ފަރާތްތަކަށް ސެޓްފިކެޓުވެސް ދީފައިވެއެވެ. މި އެސޯސިއޭޝަނުގެ މައިގަނޑު މަޤްސަދަކީ ރާއްޖޭގައި ދިރިއުޅޭ އޯޓިޒަމް ހުންނަ ކުދިންނަށް ބޭނުންވާ އެކި ކަހަލަ އެހީތައް ފޯރުކޮށްދިނުމެވެ. ހަމަ އެހެންމެ، އެ ކުދިންނަށް ދިރިއުޅުމުގެ ތަފާތު ކަންކަން އުނގަންނައިދީ، އެ ދަރިވަރުން މަދަރުސީ މާޙައުލަށް ތައްޔާރުކޮށް، އެކުދިންގެ ހުނަރުތައް ދެނެގަތުމަކީ ވެސް މި އެސޯސިއޭޝަނުން ކުރަމުން ގެންދާ މުހިންމު މަސައްކަތެކެވެ. 

ފާއިތުވެ ދިޔަ 15 އަހަރުގެ ތެރޭގައި، މި އެސޯސިއޭޝަނުން ވަނީ 1800 އެއްހާ ކުދިންނަށް ޚިދުމަތް ދީފައެވެ. އަދި، މިވަގުތު އެ އެސޯސިއޭޝަނުން 168 ކުދިން އަންނަނީ ޚިދުމަތް ހޯދަމުންނެވެ.