ރައީސްގެ ޕްލޭނަކީ ކުރިއަށް އޮތްތަނުގައި ރާއްޖޭގެ އިޤްތިޞާދު ފުޅާކުރެއްވުން: ވަޒީރު މޫސާ ޒަމީރު

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޕްލޭނަކީ، ކުރިއަށް އޮތް ތަނުގައި ރާއްޖޭގެ އިޤްތިޞާދު މިހާރަށް ވުރެ އިތުރަށް ފުޅާކުރެއްވުން ކަމަށް މާލީ ކަންކަމާއި ތަރައްޤީގެ ރޭވުންތެރިކަމާބެހޭ ވަޒީރު މޫސާ ޒަމީރު ވިދާޅުވެއްޖެ އެވެ.

ވަޒީރު މިފަދައިން ވިދާޅުވީ، 2025 ވަނަ އަހަރަށް ރައްޔިތުންގެ މަޖިލިސް ހުޅުވުމަށް ބޭއްވި ޖަލްސާގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއްވެވި ރިޔާސީ ބަޔާނާއި ގުޅޭގޮތުން ދިވެހިރާއްޖޭގެ އިސްލާމީ ޔުނިވަރސިޓީގައި ބޭއްވި ޚާއްސަ ފޯރަމްގައެވެ. 

ވަޒީރު ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއްވެވި ރިޔާސީ ބަޔާނަކީ، ފަހުގެ ތާރީޚެއްގައި އެންމެ ތަފްޞީލީކޮށް އިއްވެވި ރިޔާސީ ބަޔާން ކަމަށެވެ. ހަމަ އެހެންމެ، މި ރިޔާސީ ބަޔާނުގައި ރައްޔިތުންނަށް ބޭނުންވާކަންކަން ތަފްޞީލުކޮށް ހިމަނުއްވާފައިވާ ކަމަށް ވަޒީރު ވިދާޅުވި އެވެ. މީގެ އިތުރުން ވަޒީރު ވިދާޅުވީ، މި މަސައްކަތްތައް ކުރިއަށް ގެންދަވާނެ ގޮތް ވެސް ރައީސް ވަނީ ރައްޔިތުންނާއި ހިއްސާކުރައްވާފައި ކަމަށެވެ. އެގޮތުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެ ޕްލޭނަކީ ކުރިއަށް އޮތް ދުވަސްތަކުގައި ރާއްޖޭގެ އިޤްތިޞާދު މިހާރަށް ވުރެ އިތުރަށް ފުޅާކުރުން ކަމަށް ވަޒީރު ވަނީ ވިދާޅުވެފައެވެ. 

ވަޒީރު މޫސާ ޒަމީރު ވިދާޅުވީ، ފާއިތުވެ މިދިޔަ އެއް އަހަރުގެ ތެރޭގައި ރައީސުލްޖުމްހޫރިއްޔާ ކުރެއްވެވި މަސައްކަތްތައް ވަރަށް ކައިރިން ފެނިވަޑައިގެންނެވި ކަމަށެވެ. އެގޮތުން، ރައީސް ވަނީ ބައިނަލްއަޤްވާމީ ގޮތުން ކުރައްވަން ޖެހޭ މުހިންމު މަސައްކަތްތަކެއް ކުރައްވާފައިކަމަށް ވަޒީރު ވިދާޅުވި އެވެ. މީގެ އިތުރުން، ޚާރިޖީ ގުޅުންތައް ރަގަނޅު ކުރެއްވުމަށް ގިނަ މަސައްކަތްތަކެއް ކުރެއްވިކަން ވަޒީރު ވަނީ ފާހަގަކުރައްވާފަ އެވެ. ހަމަ އެހެންމެ، ރައްޔިތުންނަށް ފައިދާވާނެ ކަންކަން ހޯއްދަވައިދެއްވުމަށް އެކިއެކި ޤައުމުތަކާއި މުޢާމަލާތުކޮށް، މުހިންމު ނިންމެވުންތަކެއް ނިންމަވާފައިވާކަމަށް ވަޒީރު ވިދާޅުވިއެވެ. 

ރައީސް އިއްވެވި ރިޔާސީ ބަޔާނުގައި ވަނީ، ޤައުމު މިހާރު އޮތް ޙާލަތު ވަރަށް ތަފްޞީލު ކޮށް ބަޔާންކޮށްދެވާފަ އެވެ. ހަމަ އެހެންމެ، ޤައުމުގެ އިޤްތިޞާދަށް ހެޔޮ ބަދަލެއް ގެނެސްދެއްވުމަށް ކުރައްވާނެ މަސައްކަތްތައް ވެސް އެމަނިކުފާނު ވަނީ ރައްޔިތުންނާއި ޙިއްސާކުރައްވާފަ އެވެ.