ބޯހިޔާވަހިކަމުގެ މައްސަލަ ހައްލުކުރުމަށް ރައީސް ގެންގުޅުއްވާ ޕްލޭނަށް ތަޢުރީފް ޙައްޤު: ވަޒީރު ޢަބްދުﷲ މުއްޠަލިބް

ބޯހިޔާވަހިކަމުގެ މައްސަލަ ޙައްކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ޕްލޭނަކީ އެކަމަށްޓަކައި ތަޢުރީފު ޙައްޤުކަމެއްކަމަށް އިމާރާތްކުރުމާއި ގެދޮރުވެރިކަމާއި ބިނާރާބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވެއްޖެ އެވެ. 

ވަޒީރު މިފަދައިން ވިދާޅުވީ، 2025 ވަނަ އަހަރަށް ރައްޔިތުންގެ މަޖިލިސް ހުޅުވުމަށް ބޭއްވި ޖަލްސާގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއްވެވި ރިޔާސީ ބަޔާނާއި ގުޅޭގޮތުން ދިވެހިރާއްޖޭގެ އިސްލާމީ ޔުނިވަރސިޓީގައި ބޭއްވި ޚާއްސަ ފޯރަމްގައެވެ. 

ވަޒީރު ވިދާޅުވީ، ރައިސުލްޖުހޫރިއްޔާ ޑރ. މުޙައްމަދު މުޢިއްޒު އަކީ އެމަނިކުފާނު ވެވަޑައިގެންފައިވާ ވަޢުދުތައް ފުއްދެވުމަށް އިޚުލާސްތެރިކަމާއި އެކު މަސައްކަތް ކުރައްވާ ވެރިއެއް ކަމަށެވެ. ހަމަ އެހެންމެ، ބޯހިޔާވަހިކަމުގެ މައްސަލަ ޙައްލުކުރެއްވުމަށް ރައީސް ގެންގުޅުއްވާ ޕްލޭނަށް ވަޒީރު ވަނި ތަޢުރީފް ކުރައްވާފައެވެ. އަދި، އެ ޕްލޭނާއި އެއްގޮތަށް ބޯހިޔާވަހިކުމަގުގެ މައްސަލައަށް ޙައްލެއް ހޯއްދަވައިދެއްވާނެ ކަމުގެ ޔަޤީންކަން އެބައޮތް ކަމަށް ވަޒީރު ވިދާޅުވިއެވެ. ވަޒީރު ވިދާޅުވީ، ބޯހިޔާވަހިކަމުގެ މައްސަލަ ޙައްލު ކުރެއްވުމަށް ގިނަ މަޝްރޫޢުތަކެއް މިއަހަރު ކުރިއަށް ގެންދަވާނެ ކަމަށެވެ. އެގޮތުން، ރައީސް ގެ ވިސްނުންފުޅަކީ ސަރުކާރުން ބޯހިޔާވަހިކަން ފޯރުކޮށްދިނުމުގެ އިތުރުން، އަމިއްލައަށް ގެދޮރު އަޅަން ބޭނުންވާ ފަރާތްތަކަށް އެ ފުރުސަތު ތަނަވަސްކޮށްދެއްވުން ކަމަށް ވެސް ވަޒީރު ވިދާޅުވިއެވެ.

ވަޒީރު ޑރ. ޢަބްދުﷲ މުއްޠަލިބު ވިދާޅުވީ، ރައީސް ޑރ. މުޢިއްޒުގެ ސަރުކާރުން ވެރިކަމާއި ހަވާލުވެ ވަޑައިގެންނެވިއިރު ރާއްޖޭގެ ޢުމްރާނީ ތަރައްޤީގެ 40 ބިލިއަން ރުފިޔާގެ މަޝްރޫޢު ކުރިއަށް ގެންދިޔުމަށް އެކި ކުންފުނިތަކާއި އެކު ސޮއި ކޮށްފައި ވާ ކަމަށެވެ. އެހެންކަމުން މިކަމުގެ ސަބަބުން، އައު މަޝްރޫޢުތައް ކުރިއަށް ގެންދިޔުމަށް ތަފާތު ދަތިތަކާއި ކުރިމަތިވި ކަމަށް ވަޒީރު ވިދާޅުވިއެވެ. ނަމަވެސް، ޚަރަދު ކުޑަކޮށް މިކަންކަން ކުރިއަށް ގެންދެވޭނެ މަގުތަކެއް ރައީސް ހޯއްދެވިކަން ވަޒީރު ވަނީ ފާހަގަކުރައްވާފަ އެވެ.

ރައީސްގެ ރިޔާސީ ބަޔާނުގައި ވަނީ، މިހާރު ކުރިއަށްދާ މަޝްރޫޢުތަކާއި، އަލަށް ފަށައި މަޝްރޫއުތައް ރައްޔިތުންނާއި ހިއްސާކުރައްވާފަ އެވެ. އަދި، މި އަހަރުގެ ތެރޭގައި މި މަސައްކަތްތަކުގެ ނަތީޖާ ނެރެދެއްވާނެ ކަމަށް ރައީސް ވަނީ ތަކުރާރުކޮށް ވިދާޅުވެފަ އެވެ.