ޚަބަރު
ރައީސް ޑރ. މުޢިއްޒުގެ ޒަޢާމަތުގައި މަސްވެރިކަމުގެ ދާއިރާއަށް އިންޤިލާބީ ބަދަލުތަކެއް ގެނެވޭނެ: ވަޒީރު ޝިޔާމް

މަސްވެރިކަމާއި ކަނޑުގެ ވަޞީލަތްތަކާބެހޭ ވަޒީރު އަޙްމަދު ޝިޔާމް 2025 ވަނަ އަހަރުގެ ރިޔާސީ ބަޔާން ފޯރަމުގައި/ފޮޓޯ: ޕީއެސްއެމް ނިއުސް
ހުލާސާ
މަސްވެރިންނަށް ފައިދާ ވާނެ ލުއިފަސޭހަ ގޮތްތައް ހައްދަވައިދެއްވުމަށް ގެންދަވަނީ މަސައްކަތް ކުރައްވަމުން
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޒަޢާމަތުގައި މަސްވެރިކަމުގެ ދާއިރާއަށް އިންގިލާބީ ބަދަލުތަކެއް ގެނެސްދެއްވާނެ ކަމަށް މަސްވެރިކަމާއި ކަނޑުގެ ވަޞީލަތްތަކާބެހޭ ވަޒީރު އަޙްމަދު ޝިޔާމް ވިދާޅުވެއްޖެ އެވެ.
ވަޒީރު މިފަދައިން ވިދާޅުވީ، 2025 ވަނަ އަހަރަށް ރައްޔިތުންގެ މަޖިލިސް ހުޅުވުމަށް ބޭއްވި ޖަލްސާގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއްވެވި ރިޔާސީ ބަޔާނާއި ގުޅޭގޮތުން ދިވެހިރާއްޖޭގެ އިސްލާމީ ޔުނިވަރސިޓީގައި ބޭއްވި ޚާއްސަ ފޯރަމްގައެވެ.
ވަޒީރު ވިދާޅުވީ، މަސްވެރިކަމުގެ ސިނާޢަތް މިހާރަށް ވުރެ ބޮޑަށް ފުޅާކޮށް، ކުރިއެރުވުމަށް ފައިދާހުރި ރަނގަޅު ޕްލޭންތަކެއް ހަދާފައިވާ ކަމަށެވެ. އަދި، މިއަހަރުގެ ތެރޭގައި މިކަންކަން ތަންފީޒުވެގެންދާނެ ކަމަށް ވަޒީރު ވިދާޅުވި އެވެ. މީގެ އިތުރުން ވަޒީރު ވިދާޅުވީ، މަސްވެރިކަމުގެ ދާއިރާގައި ރައިސުލްޖުމްހޫރިއްޔާ ދުރު ވިސްނުންފުޅެއް ގެންގުޅުއްވާ ކަމަށެވެ. އެހެންކަމުން، މަސް ޕްރޮސެސިންގ އާއި މަސް ރައްކާކުރެވޭނެ ނިޒާމު އިތުރުކުރުމުގެ މަސައްކަތް ކުރައްވަމުން ގެންދަވާ ކަމަށް ވަޒީރު ވިދާޅުވި އެވެ. ހަމަ އެހެންމެ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެ ޒަޢާމަތުގައި މަސްވެރިކަމުގެ ދާއިރާއަށް އިންޤިލާބީ ހެޔޮ ބަދަލުތަކެއް ގެންނަވާނެކަން ވަޒީރު ވަނީ ފާހަގަކުރައްވާފަ އެވެ.
ވަޒީރު އަޙްމަދު ޝިޔާމް ވިދާޅުވީ، މަސްދޯނިތަކަށް ބޭނުންވާ އައިސް ހޯދުމަށް އޮޑިދޯނި ފަހަރު ދުއްވާ ދުއްވުމަކީ ބޮޑު ހޭދައެއް ކަމަށެވެ. އެހެންކަމުން މިކަމަށް ވެސް މިހާރު ޙައްލެއް ހޯއްދަވާދެއްވާފައި ވާކަން ވަޒީރު ވަނީ ފާހަގަކުރައްވާފަ އެވެ. އެގޮތުން، މަސްދޯނިތަކުގައި މަސް ފިނިކުރެވޭނެ ނިޒާމު ފަސޭހައިން ޤާއިމްކުރެވޭނެ ގޮތެއް މިހާރު ހަމަޖައްސަވައިދީފައި ވާ ކަމަށް ވަޒީރު ވިދާޅުވިއެވެ. އަދި، މި ނޫން ވެސް މަސްވެރިންނަށް ފައިދާ ވާނެ ލުއިފަސޭހަ ގޮތްތައް ހައްދަވައިދެއްވުމަށް ގިނަ މަސައްކަތަކެއް ރައީސުލްޖުމްހޫރިއްޔާގެ އިރުޝާދުގެ ދަށުން ކުރައްވަމުން ގެންދަވާ ކަމަށް ވަޒީރު ވިދާޅުވިއެވެ.
ރައީސް ގެ ރިޔާސީ ބަޔާން 2025 ފޯރަމްގައި، އެމަނިކުފާނުގެ ކެބިނެޓުގައި ހިމެނިވަޑައިގަންނަވާ 4 ވަޒީރުން ވަނީ ބައިވެރިވެވަޑައިގެންފަ އެވެ. އެއީ، މާލީ ކަންކަމާއި ތަރައްޤީގެ ރޭވުންތެރިކަމާބެހޭ ވަޒީރު މޫސާ ޒަމީރާއި، އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދާއި، މަސްވެރިކަމާއި ކަނޑުގެ ވަޞީލަތްތަކާބެހޭ ވަޒީރު އަޙްމަދު ޝިޔާމްގެ އިތުރުން، އިމާރާތްކުރުމާއި ގެދޮރުވެރިކަމާއި ބިނާރާބެހޭ ވަޒީރު ޑރ. ޢަބްދުﷲ މުއްޠަލިބް އެވެ.
މި ފޯރަމްގައި ބައިވެރިވެވަޑައިގެންނެވި 4 ވަޒީރުން ވެސް ވަނީ، އެބޭފުޅުންނާއި ގުޅުން ހުރި ދާއިރާތަކުން ކުރައްވަމުން ގެންދަވާ މަޝްރޫޢުތަކުގެ ވާހަކަ ހިއްސާކުރައްވާފަ އެވެ.