ރާއްޖެއިން އޯޕަން ގަވަރމަންޓް ޕާޓްނަޝިޕްގެ މެންބަރަކަށް ވެއްޖެ

ރާއްޖެއިން ރަސްމީކޮށް އޯޕަން ގަވަރމަންޓް ޕާޓްނަރޝިޕްގެ މެންބަރަކަށް ވެއްޖެއެވެ. މިކަން ހާމަކުރައްވާފައިވަނީ، ފިލިޕީންސްގެ މަނީލާގައި ބޭއްވި އޯޕަން ގަވަރމަންޓް ޕާޓްނަރޝިޕް، އޯޖީޕީ އޭޝިއާ އަދި ޕެސިފިކް ރީޖަނަލް ބައްދަލުވުމުގެ ތެރެއިންނެވެ. 

ރާއްޖެއިން އޯޖީޕީ އާއި ރަސްމީކޮށް ގުޅިވަޑައިގެންނެވިކަން އެންގެވުމުގެ ގޮތުން، ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވަޒީރު ޢާދަމް ޝަރީފް އުމަރު ވަނީ ސޯޝަލް މީޑިއާގައި ޚާއްޞަ ޕޯސްޓެއް ހިއްސާކުރައްވާފައެވެ. ވަޒީރު ވިދާޅުވީ، މި ނިންމެވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްނެންގެވުމާއި އެ މަނިކުފާނުގެ ދުރުވިސްނުންފުޅުގެ ތެރެއިން ކުރައްވާފައިވާ މަސައްކަތެއް ކަމަށެވެ. އެހެންކަމުން، ވަޒީރު ވަނީ ރައީސުލްޖުމްހޫރިއްޔާ އަށް މަރުޙަބާ ދަންނަވާފައެވެ. މީގެ އިތުރުން ވަޒީރު ވިދާޅުވީ، މި ޕާޓްނަޝިޕްގެ މެންބަރަކަށް ރާއްޖެ ވުމުގެ ސަބަބުން ރާއްޖޭގައި ހެޔޮ ވެރިކަމެއް ކުރުމުގެ މާހައުލެއް ބިނާކުރުމަށް ފަސޭހަވެގެންދާނެ ކަމަށެވެ. 

ވަޒީރު އާދަމް ޝަރީފް ވިދާޅުވީ، މި ނިންމެވުމުގެ ސަބަބުން ކޮރަޕްޝަނާއި ދެކޮޅަށް އަޅަންޖެހޭ ހަރުދަނާ ފިޔަވަޅުތައް އެޅުމަށް އެހީތެރިވެދޭނެ ކަމަށެވެ. ހަމަ އެހެންމެ، އެކިއެކި ޖަމިއްޔާތަކުގެ ބައިވެރިވުން ކުރިއަރުވާ، އެފަރާތްތަކަށް ޖަވާބުދާރީވެ، ހާމަކަން ބޮޑުގޮތެއްގައި ކަންކަން ކުރުމަށް ހިތްވަރުދޭ މާޙައުލެއް ބިނާވެގެންދާނެ ކަމަށް ވަޒީރު ވިދާޅުވިއެވެ. މީގެ އިތުރުން، އޯޕަން ގަވަރމަންޓް ޕާޓްނަޝިޕް އޭޝިއާ އަދި ޕެސިފިކް ރީޖަނަލް ބައްދަލުވުމުގެ ތެރެއިން ވަޒީރު ވަނީ އެކި ޤައުމުތަކުގެ އިސްވެރިންނާއި ބައްދަލުކުރައްވާފަ އެވެ. މީގެ ތެރޭގައި، ފިލިޕީންސްގެ އެކި ޑިޕާޓްމަންޓްތަކުގެ އިސްވެރިން ވެސް ހިމެނެއެވެ. 

މި ބައްދަލުވުމުގައި ވަޒީރު ވަނީ، ޔޫއެންޑީޕީ ގެ އިސްވެރިންނާއި ބައްދަލުކުރައްވާފައެވެ. އަދި ރާއްޖޭގައި ކުރިއަށްގެންދެވޭނެ ކަންތައްތަކާއި ބެހޭގޮތުން ދެފަރާތުން ވަނީ މަޝްވަރާކުރައްވާފައެވެ. ހަމަ އެހެންމެ މި ދަތުރުފުޅުގައި، ފިލިޕީންސްގެ ލޯކަލް ކައުންސިލްތަކުން މަސައްކަތްތައް ރާވާ، ހިންގަމުންދާގޮތް ބައްލަވާލައްވާނެކަމަށް ވަޒީރު ވިދާޅުވިއެވެ. އަދި އެ ޤައުމުގެ ލޯކަލް ގަވަރމަންޓްގެ މަސައްކަތްތައް ހިންގާ ޑިޕާޓްމަންޓާއި ބައްދަލުކުރައްވާ، މުހިންމު މަޝްވަރާތަކެއް ކުރައްވާނެކަމަށް ވެސް ވަޒީރު ވަނީ ވިދާޅުވެފައެވެ. މީގެ އިތުރުން ވަޒީރު ވިދާޅުވީ، ރާއްޖޭގެ ކައުންސިލްތަކުގެ ހިންގުން ރަނގަޅުކުރުމަށްޓަކައި ފިލިޕީންސް އާއި ގުޅިގެން ޕްރޮގްރާމެއް ހިންގުމަށް ނިންމަވާފައިވާކަމަށެވެ.

އޯޕަން ގަވަރމަންޓް ޕާޓްނަރޝިޕް ބައްދަލުވުން ފެށީ މިމަހުގެ 5 ވަނަ ދުވަހުއެވެ. މި ބައްދަލުވުމުގައި އެކި ޤައުމުތަކުގެ އިސްވެރިން ވަނީ ބައިވެރިވެވަޑައިގެންފައެވެ.