މި އަހަރުގެ ފުރަތަމަ ބައި-އިލްކްޝަން: ފުރަތަމަ 3 ގަޑިއިރުގައި ވޯޓުލީ %15 މީހުން

މި އަހަރު ކުރިއަށްދާ ފުރަތަމަ ބައި-އިލްކެޝަންގައި 3 ގަޑިއިރުގެ ތެރޭގައި ވޯޓުލާފައިވަނީ %15 މީހުންކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.

މިއަދު ކުރިއަށްދާ ލޯކަލް ކައުންސިލް  އަދި އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ ބައި-އިލެކްޝަންގައި، ވޯޓުލުމުގެ ޙައްޤު ޖުމްލަ 11،325 މީހުނަށް ލިބިފައި ވެއެވެ. ނަމަވެސް، އިލެކްޝަންސް ކޮމިޝަނުން ވިދާޅުވީ، މިއަދުގެ 11:00 އާއި ހަމައަށް ވޯޓުލާފައިވަނީ ޖުމްލަ 1725 މީހުންކަމަށެވެ. އެއީ، 798 އަންހެނުނާއި 927 ފިރިހެނުން ކަމަށް އެ ކޮމިޝަނުން މަޢުލޫމާތުދެއެވެ. 

އިލެކްޝަންސް ކޮމިޝަނުން ވިދާޅުވީ، ވޯޓުލުން ކުރިއަށްދާނީ، މިއަދު ހަވީރު 4:00 އާއި ހަމައަށް ކަމަށެވެ. އެގޮތުން، 10 ރަށެއްގެ އަންހެނުންގެ ތަރައްޤީއަށް މަސައްކަތްކުރާ ކޮމެޓީއާއި، ދެ ރަށެއްގެ ކައުންސިލްގެ ބައި-އިލެކްޝަންގެ ވޯޓުލުން ކުރިއަށްދާނެ އެވެ. މި ބައި-އިލެކްޝަންގައި މާލޭގައި ދިރިއުޅެމުންދާ އެކި ރަށްތަކުގެ ރައްޔިތުން ވޯޓުލުމަށް ހަމަޖެހިފައިވަނީ މާފަންނު މަދަރުސާގައެވެ. އިލެކްޝަންސް ކޮމިޝަނުން ވިދާޅުވީ، ވޯޓުލާ ހުރިހާ މަރުކަޒެއްތަކުގައި ވެސް މިއަދު 8:00 ގައި ވޯޓު ފޮށިތައް ބަހައްޓާ، ވޯޓުލުމުގެ ހަރަކާތް ފަށާފައިވާ ކަމަށެވެ. 

އިލެކްޝަންސް ކޮމިޝަނުން ވަނީ، ވީހާވެސް ގިނަ ބޭފުޅުން ވޯޓުލާން ދިއުމަށް އިލްތިމާސްކޮށްފައެވެ.