Ads by Exprox

ޚަބަރު

މިއަހަރު އައްޑޫއަށް ބަނދަރުކުރި ފުރަތަމަ ކްރޫޒް ޝިޕްގައި 100 އަށް ވުރެ ގިނަ ފަތުރުވެރިން

މިއަހަރު އައްޑޫއަށް ބަނދަރުކުރި ފުރަތަމަ ކްރޫޒް ޝިޕްގައި 100 އަށް ވުރެ ގިނަ ފަތުރުވެރިން

އައްޑޫ ސިޓީއަށް ޒިޔާރަތްކުރި ފަތުރުވެރިންނަށް މަރުޙަބާ ކިޔުން/ފޮޓޯ: ޕީއެސްއެމް

ޙައްވާ ޒައިބާ މުޙައްމަދު

ޙައްވާ ޒައިބާ މުޙައްމަދު

08 ފެބްރުއަރީ 2025، 06:09

08 ފެބްރުއަރީ 2025، 06:09

ހުލާސާ

އައްޑޫގައި ފަތުރުވެރިކަން ތަރައްޤީކުރުމަކީ ރައީސުލްޖުމްހޫރިއްޔާ ގެ މުހިންމު ވަޢުދުފުޅެއް

މި އަހަރު އައްޑޫ ސިޓީ މަރަދޫއަށް ބަނދަރުކުރި ފުރަތަމަ ކްރޫޒް ޝިޕްގައި 100 އަށް ވުރެ ގިނަ ފަތުރުވެރިން އެ ރަށަށް ޒިޔާރަތްކޮށްފިއެވެ. މި ފަތުރުވެރިން އެރަށަށް އައިސްފައިވަނީ، ނޮބެލް ކެލެޑޯނިއާ ނަމަކަށް ކިޔާ ކްރޫޒް ޝިޕެއްގައެވެ.

ނޮބެލް ކެލެޑޯނިއާ މަރަދޫއަށް ބަނދަރުކޮށްފައި ވަނީ މިދިޔަ ހުކުރު ދުވަހުގެ ހެނދުނުގެ ވަގުތެއްގައެވެ. މި ކްރޫޒް ޝިޕަކީ "މަންތާ ޓްރަސްޓް" ގެ އެހީގައި ރާއްޖެ އައިސްފައިވާ ކްރޫޒްޝިޕެކެވެ. މި ކްރޫޒްޝިޕުން މަރަދޫއަށް ޒިޔާރަތްކުރި ފަތުރުވެރިންނަށް މަރަދޫ ބަނދަރު ސަރަޙައްދުން ވަނީ ސަޤާފީ ހަރަކާތްތަކާއިއެކު މަރުޙަބާ ކިޔާފައެވެ. މި ދަތުރުގައި، ފަތުރުވެރިން ވަނީ އައްޑޫގެ އެކި ސަރަޙައްދުތަކަށް ޒިޔާރަތްކޮށްފައެވެ. އޭގެ ތެރޭގައި، އައްޑޫ ނޭޗަރ ޕާކާއި އައްޑޫގައި ފާހަގަކޮށްލެވޭ ބައެއް ތާރީޚީ ތަންތަން ވެސް ހިމެނެއެވެ. އައްޑޫ އަކީ، މީގެ ކުރިން ވެސް ކްރޫޒްޝިޕްތައް އަންނަ ރަށެކެވެ. ނަމަވެސް، ކޮވިޑް-19 ގެ ޙާލަތަށް ފަހު އެ ރަށަށް ކްރޫޒްޝިޕްތައް ބަނަދަރުކުރާ އަދަދު ވަނީ ބޮޑުތަނުން މަދުވެފައެވެ.

އައްޑޫ ސިޓީގައި، ފަތުރުވެރިކަން ފުޅާކޮށް ކުރިއެރުވުމަށް އަދުގެ ސަރުކާރުން ވެސް ދަނީ ގިނަ މަސައްކަތްތަކެއް ކުރަމުންނެވެ. އެގޮތުން އައްޑޫއަތޮޅު ގަމުގެ އިންޓަރނޭޝަނަލް އެއަރޕޯޓުގެ މަސައްކަތް މި އަހަރު ތެރޭގައި ނިންމުމަށް ވަނީ ހަމަޖެހިފައެވެ. ހަމަ އެހެންމެ، އެއަރޕޯޓުގެ މަސައްކަތް ނިމުމުން އައްޑޫއަށް ބައިނަލްއަޤްވާމީ އެއަރލައިންތަކުގެ ދަތުރުތައް ފެށުމަށްވެސް ސަރުކާރުން ދަނީ ކަމާގުޅޭ ފަރާތްތަކާއިއެކު މަޝްވަރާތައް ކުރަމުންނެވެ. މީގެ އިތުރުން، ސަރުކާރުން ދަނީ އައްޑޫގައި އިންޓަގްރޭޓެޑް ފަތުރުވެރިކަން ތަރައްޤީކުރުމަށް ހަންކެޑެ ތަރައްޤީގެ މަސައްކަތް ވެސް ކުރަމުންނެވެ. އަދި، އެތަނުގައި 560 ކޮޓަރި ތަރައްޤީކުރުމަށް މިދިޔަ އަހަރުގެ އޮކްޓޫބަރު މަހު ވަނީ ސޮއިކޮށްފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ވަނީ އައްޑޫގައި ފަތުރުވެރިކަން ކުރިއެރުވުމަށް ޓުއަރިޒަމް ޒޯންތަކުން ބިންތައް ދޫކޮށްފައެވެ. ހަމަ އެހެންމެ، މި ބިންތައް ދޫކުރި ފަރާތްތަކަށް އިތުރު ލޯނެއް ލިބޭނެގޮތް ހަމަޖެއްސެވުމުގެ މަސައްކަތް ވެސް ސަރުކާރުން ކުރަމުން ގެންދަވާ ކަމަށް ވިދާޅުވިއެވެ. މީގެ އިތުރުން، އައްޑޫގައި ފަތުރުވެރިކަން ތަރައްޤީކުރުމަށްޓަކައި "އައްޑޫ އައްސޭރި ޓޫރިޒަމް ޑިވަލޮޕްމެންޓް ޕްލޭން"ގެ ދަށުން 6000 އެނދު އައްޑޫގައި ތަރައްޤީކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ރިޔާސީ ވަޢުދެކެވެ.

އައްޑޫ އިން ދަނީ ފަތުރުވެރިކަން އިޝްތިހާރުކުރުމަށް ގިނަ މަސައްކަތްތަކެއް ކުރައްވަމުންނެވެ. އެގޮތުން، މިދިޔަ އަހަރުގެ ނޮވެމްބަރު މަހުގައި އިންގިރޭސިވިލާތުގައި ބޭއްވި ވޯލްޑް ޓްރެވެލް މާކެޓް ފެއަރގައި ކައުންސިލުން ވަނީ އެމްއެމްޕީއާރްސީއާއިއެކު ބައިވެރިވެފަ އެވެ.

މި ލިޔުން ކިޔާލުމުން

Ads by MSS