ޞައްޙަ ވިސާއެއް ނެތި މަސައްކަތްކުރަމުންދިޔަ ބިދޭސީއެއް އިމިގްރޭޝަންގެ ބެލުމުގެ ދަށަށް ގެންގޮއްސި

ޞައްޙަ ވިސާއެއް ނެތި ހުޅުމާލޭގައި މަސައްކަތް ކުރަމުންދިޔަ ބިދޭސީއެއް އިމިގްރޭޝަންގެ ބެލުމުގެ ދަށަށް ގެންގޮސްފައިވާކަމަށް މޯލްޑިވްސް އިމިގްރޭޝަނުން ހާމަކޮށްފިއެވެ. 

އިމިގްރޭޝަނުން މިހާރު ކުރިޔަށްގެންދާ އޮޕަރޭޝަންގެ ދަށުން އެ އިދާރާގެ ޓާސްކްފޯހުން ވަނީ އިއްޔެ ހަވީރު 3 ތަނެއް ބަލައި ފާސްކޮށްފައެވެ. އެއީ، ހުޅުމާލޭގައި ހުންނަ 3 ކެފޭ/ޓޭކްއަވޭ ތަނެއްކަމަށް އިމިގްރޭޝަނުން މަޢުލޫމާތުދެއެވެ. އިމިގްރޭޝަނުން ހާމަކުރީ، މި އޮޕަރޭޝަންގައި ބަލާ ފާސްކުރެވުނު 3 ތަނުގެ ތެރެއިން އެއް ތަނުގައި ޞައްހަ ވިސާއެއް ނެތި މަސައްކަތްކުރަމުންދިޔަ ބިދޭސީއެއް ފެނިފައިވާ ކަމަށެވެ. އަދި، މި މީހާ މިހާރު ވަނީ އިމިގްރޭޝަންގެ ބެލުމުގެ ދަށަށް ގެންގޮސްފައި ކަމަށް އިމިގްރޭޝަނުން ހާމަކޮށްފައިވެއެވެ.

އިމިގްރޭޝަނުން ވަނީ މީގެ ކުރިން ވެސް، ރާއްޖޭގައި ޤަވާއިދާއި ޚިލާފަށް ދިރިއުޅެމުންދާ ބިދޭސީން ހޯދުމަށް ޚާއްޞަ ރެއިޑް އޮޕަރޭޝަންތަކެއް ހިންގާފައެވެ. މި އޮޕަރޭޝަންގެ ދަށުން މިހާތަނަށް ވަނީ، ގިނަ އަދެއްގެ ބިދޭސީންނެއް ރާއްޖެއިން ޑީޕޯޓުކޮށްލާފައެވެ. ރާއްޖޭގައި ޤަވާއިދާއި ޚިލާފަށް ދިރިއުޅެމުންދާ ބިދޭސީން ހޯދައި، އެ ފަރާތްތަކާއި މެދު އަޅަންޖެހޭ ފިޔަވަޅުތައް އެޅުމަކީ ސަރުކާރުން މުހިންމު އިސްކަމެއް ދީގެން ކުރައްވަމުން އަންނަ ކަމެކެވެ. 

ޤަވާއިދާއި ޚިލާފަށް ރާއްޖޭގައި އުޅެމުންދާ ބިދޭސީންގެ މައްސަލައަކީ ރާއްޖޭގައި ބޮޑުވެފައިވާ މައްސަލައެކެވެ. އިމިގްރޭޝަނުން މިހާރު ކުރައްވަމުން ގެންދަވާ މަސައްކަތްތަކުން މި މައްސަލައަށް ޙައްލެއް ލިބިގެންދާނެކަމަށް ބެލެވެއެވެ.