Ads by Exprox

ޚަބަރު

ފަލަސްޠީނުގެ މީހުން ސަޢުދީ ޢަރަބިއްޔާއަށް ފޮނުވައިލުމަށް ނަތަންޔާހޫ ދެއްކި ވާހަކަތައް ރާއްޖެއިން ކުށްވެރިކޮށްފި

ފަލަސްޠީނުގެ މީހުން ސަޢުދީ ޢަރަބިއްޔާއަށް ފޮނުވައިލުމަށް ނަތަންޔާހޫ ދެއްކި ވާހަކަތައް ރާއްޖެއިން ކުށްވެރިކޮށްފި

ފަލަސްޠީނުގެ ރައްޔިތުންތަކެއް/ފޮޓޯ: އަލް ޖަޒީރާ

ޙައްވާ ޒައިބާ މުޙައްމަދު

ޙައްވާ ޒައިބާ މުޙައްމަދު

09 ފެބްރުއަރީ 2025، 04:57

09 ފެބްރުއަރީ 2025، 04:57

ހުލާސާ

ޔަހޫދީން ކުރާ ޢަމަލުތަކާއި ދެކޮޅަށް ހުރިހާ ޤައުމަކުން ވެސް ތެދުވުމަށް ދިވެހި ސަރުކާރުން ވަނީ ގޮވާލައްވާފަ

ފަލަސްޠީނުގެ ރައްޔިތުން ސަޢުދީ ޢަރަބިއްޔާއަށް ފޮނުވައިލުމަށް ޔަހޫދީންގެ ބޮޑުވަޒީރު ބެންޖަމިން ނަތަންޔާހޫ ދެއްކެވި ވާހަކަތައް ދިވެހި ސަރުކާރުން ހަރުކަށި އިބާރާތުން ކުށްވެރިކޮށްފި އެވެ. މިކަން ކުށްވެރިކޮށްފައި ވަނީ ރާއްޖޭގެ ޚާރިޖީ ވުޒާރާއިން ނެރުއްވެވި ބަޔާނެއްގައެވެ. 

ނަތަންޔާހޫ ވަނީ، ސަޢުދީ ޢަރަބިއްޔާގައި ފަލަސްޠީނުގެ ދައުލަތެއް އުފެއްދުމަށް ގޮވާލައިފަ އެވެ. މިކަމާއި ގުޅިގެން ދިވެހިރާއްޖެއިން ވިދާޅުވީ، ސަޢުދީ އަރަބިއްޔާގެ މިނިވަންކަމާއި، ސިޔާދަތައް ނުރައްކާވާގޮތަށް ދައްކަމުންދާ އެއްވެސް ވާހަކައެއް ދިވެހި ސަރުކާރުން ބަލައިނުގަންނާނެ ކަމަށެވެ. އަދި، މިގޮތަށް ދައްކަވާ ވާހަކަތަކަކީ ބައިނަލްއަޤްވާމީ ޤާނޫނާއި އދ. ގެ ޗާޓަރުތަކާއި ޚިލާފު ވާހަކަތަކެއް ކަމަށް ޚާރިޖީ ވުޒާރާއިން ނެރުއްވެވި ބަޔާނުގައި ވަނީ ފާހަގަކުރައްވާފަ އެވެ. 

މީގެ އިތުރުން ދިވެހި ސަރުކާރުން ވިދާޅުވީ، ނަތަންޔާހޫ ދެއްކެވި ވާހަކަތަކަކީ ހަމައެކަނި ސަޢުދީގެ މިނިވަންކަމާއި، ސިޔާދަތާއި، އިސްތިޤުލާލާއި ޚިލާފު ވާހަކަތަކެއް ނޫން ކަމަށެވެ. ނަމަވެސް، މި ވާހަކަތަކުގެ ސަބަބުން ފަލަސްޠީނުގެ ރައްޔިތުން މެދުކެޑުމެއްނެތި މިނިވަންކަމަށްޓަކައި ކުރަމުންދާ ވަކާލާތުތަކަށް ވެސް ބުރޫއަރާނެ ކަމަށް ޚާރިޖީ ވުޒާރާގެ ބަޔާނުގައި ވަނީ ވިދާޅުވެފަ އެވެ. މީގެ އިތުރުން، ޤުދުސްއަކީ ފަލަސްޠީނުގެ ވެރިރަށް ގޮތުގައި ބަލައިގަނެ، 1967 ގެ ބޯޑަރުތަކަށް ތަބާވުމަށް ދިވެހި ސަރުކާރުން ވަނީ ގޮވާލައްވާފަ އެވެ. ހަމަ އެހެންމެ، ޔަހޫދީން ކުރާ މިފަދަ ޢަމަލުތަކާއި ދެކޮޅަށް ހުރިހާ ޤައުމަކުން ވެސް ތެދުވުމަށް ރާއްޖެއިން ވަނީ ގޮވާލާފައެވެ.

ބެންޖަމިން ނަތަންޔާހޫ  ފަލަސްޠީނުގެ ރައްޔިތުންނާއި ގުޅޭގޮތުން މި މޭރުމުން ވާހަކަދައްކާފައިވަނީ، ޔަހޫދީންގެ ޓީވީ ޗެނަލަކަށް ދިން ބަސްދީގަތުމެއްގަ އެވެ. އެ ޕްރޮގްރާމް ހުށައެޅި ފަރާތަށް އަނގައޮޅި ފަލަސްޠީނުގެ ދައުލަތޭ ބުނަން އުޅުމުގެ ތެރޭގައި ބުނެވުނީ ސަޢުދީ ދައުލަތެވެ. ނަމަވެސް، އޭނާއަށް އެހެން ބުނެވުމުން ނަތަންޔާހޫ ވަނީ ރަނގަޅު ގޮތަކީ ފަލަސްޠީނުގެ ދައުލަތް ކަމަށް ބުނެފައެވެ. ހަމަ އެހެންމެ، ސަޢުދީއަކީ ބިންބޮޑު ޤައުމެއް ކަމަށް ބުނެ އެ ޕްރޮގްރާމް ހުށައެޅި މީހާއާއި އޭނާ ވަނީ ސަމާސާ ކޮށްފައެވެ.

މިކަމާއި ގުޅިގެން، ބެންޖަމިން ނަތަންޔާހޫ ދެއްކެވި ވާހަކަތައް ސަޢުދީ ޢަރަބިއްޔާއިން ވަނީ ހަރުކަށި އިބާރާތުން ކުށްވެރިކޮށްފަ އެވެ. 

މި ލިޔުން ކިޔާލުމުން

Ads by MSS