Ads by Exprox

ޚަބަރު

މިއަހަރުގެ ރަމަޟާންމަހު ވެސް ދީނީ ހޭލުންތެރިކަން އިތުރުކުރުމަށް ގިނަ ޕްރޮގްރާމްތަކެއް

މިއަހަރުގެ ރަމަޟާންމަހު ވެސް ދީނީ ހޭލުންތެރިކަން އިތުރުކުރުމަށް ގިނަ ޕްރޮގްރާމްތަކެއް

އިސްލާމީ މަރުކަޒު/ފޮޓޯ: ސޯޝަލް މީޑިއާ

ޙައްވާ ޒައިބާ މުޙައްމަދު

ޙައްވާ ޒައިބާ މުޙައްމަދު

09 ފެބްރުއަރީ 2025، 07:34

09 ފެބްރުއަރީ 2025، 07:34

ހުލާސާ

މާލޭގައި ޖުމްލަ 8 އިޙްޔާ ފޯރަމް ބޭއްވުމަށް ވަނީ ހަަމަޖެހިފައި

މިއަހަރުގެ ރަމަޟާންމަހު ވެސް ދިވެހި ރައްޔިތުންގެ ދީނީ ހޭލުންތެރިކަން އިތުރުކުރުމުގެ މަޤްސަދުގައި ގިނަ ޕްރޮގްރާމްތަކެއް ކުރިއަށް ގެންދިޔުމަށް ހަމަޖެހިފައިވާ ކަމަށް އިސްލާމީ ކަންތައްތަކާއި ބެހޭ ވުޒާރާއިން ވިދާޅުވެއްޖެ އެވެ.

އިސްލާމީ ކަންތައްތަކާއި ބެހޭ ވުޒާރާއިން ވިދާޅުވީ، މި ޕްރޮގްރާމްތަކަކީ އިސްލާމްދީނުގެ ޞައްޚަ މަޢުލޫމާތުތައް ރައްޔިތުންނަށް ފޯރުކޮށްދިނުމުގެ މަޤްސަދުގައި ކުރިއަށް ގެންދާ ޕްރޮގްރާމްތަކެއް ކަމަށެވެ. ހަމަ އެހެންމެ، މިކަމަށް ދިވެހި ސަރުކާރުގެ ވަރަށް ބޮޑު އެއްބާރުލުމެއް ލިބޭކަމަށް އެ ވުޒާރާއިން ވަނީ ވިދާޅުވެފަ އެވެ. އެ ވުޒާރާއިން ވިދާޅުވީ، ރަމަޟާން މަސް އިޙްޔާކުރުމުގެ ގޮތުން ކުރިއަށް ގެންދާ ޕްރޮގްރާމްތަކުގެ ސަބަބުން ދިވެހި ރައްޔިތުންގެ މެދުގައި އިސްލާމްދީނުގެ ޝިޢާރު ފާޅުކޮށް، އަޅުކަންތައްތަކަށް ރައްޔިތުން އިތުރަށް ހީވާގިވެ، ހޭލުންތެރިވެގެންދާނެ ކަމަށެވެ.

އެ ވުޒާރާއިން ވިދާޅުވީ، މިއަހަރުގެ ރަމަޟާން މަހަށް މަރުޙަބާކިޔުމުގެ ގޮތުން ދެ ޕްރޮގްރާމެއް ކުރިއަށް ގެންދިޔުމަށް ހަމަޖެހިފައިވާ ކަމަށެވެ. އެއީ، މައިންޑްފުލް ރަމަޟާންގެ ނަމުގައި ކުރިއަށް ގެންދެވޭ ވޯކްޝޮޕަކާއި، މަރުޙަބާ ރަމަޟާންގެ ނަމުގައި ބާއްވާ ބޮޑު ދަރުހެއް ކަމަށް އެ ވުޒާރާއިން މަޢުލޫމާތު ދެއެވެ. މި ދަރުހަކީ، މާލެ އާޓިފިޝަލް ބީޗުގައި ކުރިއަށް ގެންދިޔުމަށް ހަމަޖެހިފައިވާ ދަރުހެކެވެ. ހަމަ އެހެންމެ، މަރުޙަބާ ރަމަޟާން ދަރުހަކީ މިދިޔަ އަހަރުވެސް ޢާންމު ރައްޔިތުންގެ ބޮޑު ތަރުޙީބެއް ލިބިފައިވާ ދަރުހެއްކަމަށް އިސްލާމީ ކަންތައްތަކާއި ބެހޭ ވުޒާރާއިން ވިދާޅުވެ އެވެ.

މީގެ އިތުރުން އެ ވުޒާރާއިން ވިދާޅުވީ، މިއަހަރުގެ ރަމަޟާން މަހުގެ ތެރޭގައި މާލޭގައި 8 އިޙްޔާ ފޯރަމް ކުރިއަށް ގެންދިޔުމަށް ހަމަޖެހިފައިވާ ކަމަށެވެ. މި ފޯރަމް ކުރިއަށް ދާނީ، ޖުމްލަ 7 ސިޓީ/ރަށެއްގައި ކަމަށް އެ ވުޒާރާއިން މަޢުލޫމާތުދެއެވެ. މީގެ އިތުރުން، އިޙްޔާ ފޯރަމް ބާއްވާނެ ރަށެއް ކަނޑައަޅާފައިވަނީ ކައުންސިލްތަކުން އެކަމަށް އެދި ހުށައެޅި ޕްރޮޕޯސަލް ވިލަރެސް ކުރުމަށްފަހު، އެންމެ ރަނގަޅު ޕްރޮޕޯސަލް އެއް ހުށައެޅި ރަށްތަކަށް ބަލައިގެންކަމަށްވެސް އެ ވުޒާރާއިން ވަނީ ވިދާޅުވެފަ އެވެ. ހަމަ އެހެންމެ، މި ރަމަޟާން މަހުގައި ސްކޫލް ދަރިވަރުންނަށް އަމާޒުކޮށްގެން ދަރިވަރުންގެ މެދުގައި 6 އިޙްޔާ ފޯރަމެއް ކުރިއަށް ގެންދިޔުމަށް ހަމަޖެހިފައިވާ ކަމަށް އިސްލާމީ ކަންތައްތަކާއި ބެހޭ ވުޒާރާއިން ވިދާޅުވިއެވެ. 

އިސްލާމީ ކަންތައްތަކާއި ބެހޭ ވުޒާރާއިން ގިނަ ހަރަކާތްތަކެއް ހިންގުމަށް ހަމަޖެހިފާވާއިރު، ރަމަޟާން މަހުގެ ކޮންމެ ހޮނިހިރު ދުވަހެއްގައި މާލޭގައި އައުޓްރީޗް ޕްރޮގްރާމެއް ވެސް ހިންގާނެއެވެ. މި ޕްރޮގްރާމުގައި، ކުޑަކުދިން ޝައުޤުވެރިވާނެ ކުޅިވަރު ހަރަކާތްތަކާއި، ދީނީ ކައުންސެލިންގ ދިނުމާއި، މުސްޙަފް އަދި ދީނީ ފޮތް ހިމެނޭ ސްޓޯލްތައް ހެދުމަށް ނިންމަވާފައިވާކަމަށް އެ ވުޒާރާއިން މަޢުލޫމާތުދެއެވެ. މީގެ އިތުރުން، ރޯދަ މަހުގެ ކޮންމެ ދުވަހަކު އަޞުރު ނަމާދަށްފަހު މާލެ ސަރަޙައްދުގެ މިސްކިތްތަކުގައި "އަޞްރު ދަރުސް" ބޭއްވުމަށް ވަނީ ހަމަޖެހިފަ އެވެ.

އިސްލާމީ ކަންތައްތަކާއި ބެހޭ ވުޒާރާއިން ވިދާޅުވީ، ދީނީ މަޢުލޫމާތުތައް ފޯރުކޮށްދޭ އެކިއެކި ޕޯސްޓުތައް ސޯޝަލް މީޑިއާ މެދުވެރިކޮށްވެސް ގެނެސްދެއްވުމަށް އެ ވުޒާރާއިން ގެންދަވަނީ މަސައްކަތްކުރައްވަމުން ކަމަށެވެ.

މި ލިޔުން ކިޔާލުމުން

Ads by MSS