ޚަބަރު
އައްޑޫ ހިތަދޫގައި ޤާއިމްކުރަމުންދާ އިންޑޯ ވޮލީ ކޯޓުގެ މަސައްކަތް ރޯދައިގެ ކުރިން ނިންމަނީ

ހިތަދޫ ޔޫތު ސެންޓަރުގައި ވޮލީ ކޯޓު އަޅާ ސަރަހައްދު/ފޮޓޯ: ހިތަދޫ ޔޫތު ސެންޓަރ
ހުލާސާ
ވޮލީ ކޯޓުގެ ސަަބަބުން ޒުވާނުންނަށް ފަސޭހަވެގެން ދާނެ
އައްޑޫސިޓީ ހިތަދޫގައި ޤާއިމްކުރަމުންދާ އިންޑޯ ވޮލި ކޯޓުގެ މަސައްކަތް މިއަހަރު ރަމަޟާން މަހުގެ ކުރިން ނިންމާނެ ކަމަށް އައްޑޫ ސިޓީ ކައުންސިލުން ބުނެފިއެވެ.
އައްޑޫ ސިޓީ ކައުންސިލުން ބުނި ގޮތުގައި، މި ވޮލީ ކޯޓުގެ 97 އިންސައްތަ މަސައްކަތް މިހާރު ވަނީ ނިމިފައެވެ. މި ވޮލީ ކޯޓަކީ، އެރަށުގައި ވޮލީ ކޯޓެއް ނެތުމުގެ ސަބަބުން، އައްޑޫ ސިޓީގެ މޭޔަރާއި ޑެޕިއުޓީ މޭޔަރުގެ ހާއްސަ އިސްނެންގެވުމުގެ މަތިން ހިތަދޫ ޔޫތު ސެންޓަރުގައި ޤާއިމުކުރަމުންދާ ވޮލީ ކޯޓެކެވެ. މީގެ އިތުރުން، މި ވޮލީ ކޯޓުގެ މަސައްކަތްތަކަކީ، އައްޑޫ ސިޓީ ކައުންސިލާއި، ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާއި ބެހޭ ވުޒާރާ ގުޅިގެން ކުރިއަށް ގެންދާ މަސައްކަތެކެވެ. އައްޑޫ ސިޓީ ކައުންސިލުން މަޢުލޫމާތުދޭގޮތުގައި، ހިތަދޫ ޔޫތު ސެންޓަރުގެ ގޯތިތެރޭގައި ވޮލީ ކޯޓު އެޅުމަށް ހަމަޖެހިފައިވާ ބިން ސާފުކޮށް، ވެލި އަޅާ ލެވެލު ކުރުމުގެ މަސައްކަތް މިހާރު ވަނީ އެއްކޮށް ނިމިފައި ކަމަށެވެ.
އައްޑޫ ސިޓީ ކައުންސިލުން ބުނިގޮތުގައި، މިއަހަރުގެ ރަމަޟާން މަސް ފެށުމުގެ ކުރިން މި ވޮލީ ކޯޓުގެ މަސައްކަތްތައް އެއްކޮށް ނިންމާލެވޭނެ އެވެ. އަދި، އައްޑޫ ސިޓީ ކައުންސިލްގެ ބަޖެޓުން ޚަރަދުކޮށްގެން ކުރިއަށް ގެންދާ މި މަސައްކަތަށް ޖުމްލަ 3 ލައްކައެއްހާ ރުފިޔާ ހަރަދުވާނެކަމަށް އެ ކައުންސިލުން މަޢުލޫމާތުދެއެވެ. މީގެ އިތުރުން، މި ވޮލީ ކޯޓު ތަރައްޤީކުރުމުގެ ސަބަބުން، ބައިނަލްއަޤްވާމީ މުބާރާތްތަކަށް ތައްޔާރުވުމަށް ކުޅުންތެރިން ޕްރެކްޓިސް ކުރާނެ ފުރުސަތު ފަހިވެގެންދާނެ ކަމަށް ކައުންސިލުން ބުނެއެވެ.
އައްޑޫ ސިޓީގައި ވޮލީ ބޯޅަ ތަރައްޤީކޮށް ނިމުމުން އެރަށުގައި، އެ ކުޅިވަރު ކުޅޭ ޒުވާނުންނަށް ބޮޑު ލުޔެއް ލިބިގެންދާނެ އެވެ. އަދި، ކުރިއަށް އޮތް ތަނުގައި އެސިޓީގައި ހޭންޑްބޯޅަ ކޯޓެއް އެޅުމަށް މަސައްކަތްކުރަމުންދާ ކަމަށް އެ ކައުންސިލުން ވަނީ ބުނެފައެވެ.