ޚަބަރު
ލ. އިސްދޫގައި ފެނުގެ ނިޒާމު ޤާއިމްކުރުމުގެ މަޝްރޫޢު ނިންމާލައިފި

އިސްދޫގައި ޤާއިމްކުރި ފެން ޕްލާންޓް/ފޮޓޯ: އިމާރާތްކުރުމާއި ގެދޮރުވެރިކަމާއި ބިނާރާބެހޭ ވުޒާރާ
ހުލާސާ
މި މަޝްރޫޢުގެ ދަށުން ވަނީ 25 ކިލޯވޮޓުގެ ސޯލަރ ޕެނަލްވެސް ޤާއިމުކޮށްފައި
ލ. އިސްދޫގައި ޤާއިމްކުރަން ފެށި ފެނުގެ ނިޒާމުގެ މަޝްރޫޢު ނިންމާލައިފި އެވެ. މި މަޝްރޫޢަކީ، އިންޑިއާގެ އެގްޒިމް ބޭންކުގެ މާލީ އެހީތެރިކަމާއެކު، 2023 ވަނަ އަހަރު ފެށި މަސައްކަތެކެވެ.
އިމާރާތްކުރުމާއި ގެދޮރުވެރިކަމާއި ބިނާރާބެހޭ ވުޒާރާއިން ވިދާޅުވީ، މި މަސައްކަތުގެ ދަށުން 55 ޓަނުގެ 2 އާރްއޯ ޕްލާންޓާއި 60 ޓަނުގެ ވާރޭ ފެން ޕްލާންޓެއް ބަހައްޓާފައިވާ ކަމަށެވެ. ހަމަ އެހެންމެ، ވާރޭ ފެން ރައްކާކުރާ 400 ޓަނުގެ ޓޭންކަކާއި، 415 ޓަނުގެ ބޯފެން ރައްކާކުރެވޭ 2 ޓޭންކު ބަހައްޓާފައިވާ ކަމަށް އެ ވުޒާރާއިން ވިދާޅުވިއެވެ. މީގެ އިތުރުން، ފެނުގެ ނިޒާމުގެ މަޝްރޫޢުގެ ދަށުން 25 ކިލޯވޮޓުގެ ސޯލަރ ޕެނަލްވެސް ޤާއިމުކޮށްފައިވާކަމަށް އިމާރާތްކުރުމާއި ގެދޮރުވެރިކަމާއި ބިނާރާބެހޭ ވުޒާރާއިން ވިދާޅުވި އެވެ.
މީގެ އިތުރުން އެ ވުޒާރާއިން ވިދާޅުވީ، އެރަށުގައި ފެނުގެ ނިޒާމު ޤާއިމްކުރުމުގެ މަޝްރޫޢު ނިންމެވުމަށް ފަހު މިހާރު ވަނީ އޮޕަރޭޓަރާއި ހަވާލުކޮށްފައި ކަމަށެވެ. އަދި، އިސްދޫގައި 245 ގޭބީސީއެއްގައި ފެނުގެ ޚިދުމަތް ޤާއިމްކޮށްފައިވާ ކަމަށް އެ ވުޒާރާއިން މަޢުލޫމާތުދެއެވެ. ހަމަ އެހެންމެ، މި ގޭބީސީތަކަށް ޑިފެކްޓްސް ލައިބިލިޓީ ޕީރިއަޑްގެ ދަށުން މިހާރު ޚިދުމަތް ދެމުން ގެންދާކަމަށް އެ ވުޒާރާއިން ވަނީ ވިދާޅުވެފަ އެވެ. އިސްދޫގައި ފެނުގެ ނިޒާމު ޤާއިމްކުރުމުގެ މަޝްރޫޢު ކުރިއަށް ގެންދިޔައީ އެސް.އެމް.ސީ އިންފްރާސްޓްރަކްޗަރސް ޕްރައިވެޓް ލިމިޓެޑް ނަމަކަށް ކިޔާ ކުންފުންޏަކުންނެވެ. ހަމަ އެހެންމެ، މި ކުންފުނިން ވަނީ އެރަށުގެ ނަރުދަމާ ނިޒާމުގެ މަސައްކަތްތައް ވެސް ކުރިއަށްގެންގޮއްސަ އެވެ.
ލ. އިސްދޫގައި ކުރިއަށް ގެންދިޔަ މި މަޝްރޫޢުތަކަކީ، އިންޑިޔާގެ އެގްޒިމް ބޭންކުގެ މާލީ އެހީތެރިކަމާއެކު ކުރިއަށް ގެންގޮސްފައިވާ މަޝްރޫޢުތަކެކެވެ.