ރަމަޟާން މަހު ކެފޭތަކާއި ފިހާރަތައް ހުޅުވާފައި ބެހެއްޓޭނެ ވަޤުތުތައް ޢާންމުކޮށްފި

މިއަހަރުގެ ރަމަޟާން މަހު ކެފޭތަކާއި، ރެސްތޯރެންޓްތައް އަދި މުދާ ވިއްކުމަށް ޚާއްސަ ތަންތަން ހުޅުވާފައި ބެހެއްޓޭނެ ގަޑިތައް އިޤްތިޞާދީ ތަރައްޤީއާއި ވިޔަފާރިއާބެހޭ ވުޒާރާއިން ޢާއްމުކުރައްވައިފިއެވެ.

ކޮންމެ އަހަރެއްގެ ވެސް ރަމަޟާން މަހު މުދާ ވިއްކާ ތަންތަނާއި، ކެފޭ، އަދި ރެސްޓޯރެންޓްތައް ހުޅުވާފައި ބެހެއްޓޭނެ ވަގުތުތައް ސަރުކާރުން އިޢުލާންކުރައްވައެވެ. އެގޮތުން، އިޤްތިޞާދީ ތަރައްޤީއާއި ވިޔަފާރިއާބެހޭ ވުޒާރާއިން ވިދާޅުވީ، މި ހިނގާ ފެބްރުއަރީ މަހުގެ 15 ވަނަ ދުވަހުން ފެށިގެން މުދާ ވިއްކާ ތަންތަން ފަތިހު 5:30 އިން ފެށިގެން މެންދަމު 1:00 އާއި ހަމައަށް ހުޅުވާފައި ބެހެއްޓޭނެ ކަމަށެވެ. ހަމަ އެހެންމެ، އަންނަ ރޯދަމަހާއި ޝައްވާލްމަހުގެ ފުރަތަމަ 7 ދުވަހުވެސް މުދާ ވިއްކާ ތަންތަން މި ވަޤުތުތަކުގައި ހުޅުވާފައި ބެހެއްޓޭނެ ކަމަށް އެ ވުޒާރާއިން ވިދާޅުވެއެވެ.

އިޤްތިޞާދީ ތަރައްޤީއާއި ވިޔަފާރިއާ ބެހޭ ވުޒާރާއިން ވިދާޅުވީ، ރަމަޟާން މަހުގައި ކެއިންބުއިމުގެ ޚިދުމަތްދޭ ކެފޭތަކާއި ރެސްޓޯރެންޓްތައް ހުޅުވާފައި ބެހެއްޓޭނީ، ހަވީރު 5:30 އިން ފެށިގެން މެންދަމު 3:00 ޖެހުމާއި ހަމައަށް ކަމަށެވެ. މީގެ އިތުރުން، ޝައްވާލް މަހުގެ ފުރަތަމަ 7 ދުވަހު މިފަދަ ޚިދުމަތްދޭ ތަންތަން ހުޅުވާފައި ބެހެއްޓޭނީ ފަތިހު 4:30  އިން ފެށިގެން މެންދަމު 3:00 އާއި ހަމައަށް ކަމަށް އެ ވުޒާރާއިން ވިދާޅުވެއެވެ. މި ވުޒާރާއިން ވިދާޅުވީ، މީހުން ދިރިއުޅޭ ރަށްތަކުގައި 24 ގަޑިއިރު ކެއިންބުއިމުގެ ޚިދުމަތް ދިނުމުގެ ހުއްދަ އޮތް ނަމަވެސް، ރަމަޟާން މަހާއި ޝައްވާލް މަހުގެ ފުރަތަމަ 7 ދުވަހު ޢަމަލުކުރަންޖެހޭނީ މި އުޞޫލުގެ ދަށުން ކަމަށެވެ.

ކޮންމެ އަހަރެއްގެ ރަމަޟާން މަހާއި ދިމާކޮށް ސަރުކާރުން މި ވަގުތުތައް ކަނޑައެޅި ނަމަވެސް، މި ނިންމެވުމާއި ޚިލާފުވާ ބައެއް ފަރާތްތައް މީގެ ކުރިން މަދުން ނަމަވެސް ވަނީ ފާހަގަވެފަ އެވެ.