ވޯލްޑް ގަވަމަންޓް ސަމިޓްގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާގެ ނައިބު ޔޫއޭއީ އަށް

ވޯލްޑް ގަވަމަންޓް ސަމިޓް 2025 ގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ނައިބު، އަލްއުސްތާޛު ޙުސައިން މުޙައްމަދު ލަޠީފް ރަސްމީ ދަތުރުފުޅެއްގައި ޔުނައިޓެޑް އެރެބް އެމިރޭޓްސް، ޔޫއޭއީ އަށް ފުރާވަޑައިގެންފި އެވެ.

ވޯލްޑް ގަވަމަންޓް ސަމިޓް ބޭއްވުމަށް ހަމަޖެހިފައިވަނީ، މި ހިނގާ ފެބްރުއަރީ މަހުގެ 11 ވަނަ ދުވަހުން ފެށިގެން 13 ވަނަ ދުވަހުގެ ނިޔަލަށެވެ. މިއަހަރުގެ ސަމިޓްގެ ޝިޢާރަކަށް ކަނޑައަޅާފައިވަނީ، "ޝޭޕިންގ ފިއުޗަރ ގަވަމަންޓްސް" އެވެ. މި ސަމިޓްގެ އެންމެ ބޮޑު އެއް މަޤްސަދަކީ، މި ސަރަޙައްދުގެ ޤައުމުތަކާއި، ބައިނަލްއަޤްވާމީ ޖަމާޢަތްތަކާއި، ވަކިވަކި ފަރުދުންގެ މެދުގައި އެކުވެރިކަމާއި އެއްބާރުލުން އިތުރުކުރުމެވެ. އަދި، ތަރައްޤީގެ ރޮނގުންނާއި، އެކި ދާއިރާތަކުން ދިމާވާ ގޮންޖެހުންތަކަށް އެކަށޭނެ ޙައްލެއް ހޯދުމަށް ވެސް މި ސަމިޓުގައި މަޝްވަރާކުރެވިގެން ދާނެއެވެ. 

މިއަހަރުގެ ވޯލްޑް ގަވަމަންޓް ސަމިޓްގައި، ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވާހަކަފުޅު ދެއްކެވުމަށް ވަނީ ހަމަޖެހިފަ އެވެ. އެގޮތުން، އެމަނިކުފާނު ވާހަކަދައްކަވާނީ މި ސަމިޓްގެ މޫސުމީ ބަދަލުތަކާއި ބެހޭ ފޯރަމްގަ އެވެ. މީގެ އިތުރުން، މި ސަމިޓްގެ ބައެއް ބައިވެރިންނާއި ބައްދަލުކުރައްވާ، އެކިއެކި ދާއިރާތަކާއި ގުޅޭގޮތުން އެ ބައިވެރިންނާއި އެކީ މަޝްވަރާކުރެއްވުމަށް ވަނީ ހަމަޖެހިފަ އެވެ. 

ވޯލްޑު ގަވަމަންޓް ސަމިޓް 2024 ގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ބައިވެރިވެވަޑައިގެންފަ އެވެ. އަދި، އެމަނިކުފާނު ވަނީ، ރާއްޖޭގެ ކުރިމަގުގެ ތަސައްވުރާއި، އެ ތަސައްވުރުގައި ދެމެހެއްޓެނިވި ތަރައްޤީގެ ދައުރާއި ބެހޭގޮތުން ވާހަކަފުޅު ދައްކަވާފައެވެ.