ޚަބަރު
ލެބަނާނުގެ އައު ޚާރިޖީ ވަޒީރަށް ރާއްޖޭގެ ޚާރިޖީ ވަޒީރު މަރުޙަބާ ދަންނަވައިފި

ދިވެހިރާއްޖެއާއި ލެބަނާނުގެ ދިދަ/ފޮޓޯ: ޝަޓަރސްޓޮކް
ހުލާސާ
ދެ ޤައުމުން ގުޅިގެން އެކި ދާއިރާތަކުން މަސައްކަތް ކުރެއްވުމަށް ގޮވާލެއްވި
ލެބަނާނުގައި އަލަށް އައްޔަންކުރެއްވި ޚާރިޖީ ވަޒީރު، ޔޫސެފް ރައްޖީ އަށް ރާއްޖޭގެ ޚާރިޖީ ވަޒީރު ޑރ. އަބްދުﷲ ޚަލީލް މަރުޙަބާ ދަންނަވާފި އެވެ. ވަޒީރު ވަނީ އެ ޤައުމުގެ ޚާރިޖީ ވަޒީރަށް މަރުޙަބާ ދެންނެވުމަށް ޚާއްޞަ މެސެޖެއް ފޮނުއްވާފަ އެވެ.
އެ މެސެޖުގައި ވަޒީރު ވިދާޅުވީ، ލެބަނާނުގެ ސަރުކާރަށާއި ރައްޔިތުންނަށް އުފާވެރި ދުވަސްތަކަކަށް އެދޭ ކަމަށެވެ. ހަމަ އެހެންމެ އައު ޚާރިޖީ ވަޒީރުގެ ފަރާތުން އެ ޤައުމުގެ ރައްޔިތުންނަށް ފައިދާވާނެ މަސައްކަތްތަކެއް ކުރައްވާނެކަމަށް އުންމީދު ކުރައްވާ ކަމަށް ވަޒީރު ވިދާޅުވިއެވެ. މީގެ އިތުރުން ވަޒީރު ވިދާޅުވީ، ރާއްޖެއާއި ލެބަނާނާއި ދެމެދު އޮތް ޚާރިޖީ ގުޅުން މިހާރަށް ވުރެ އިތުރަށް ވަރުގަދަކުރެއްވުމަށް މަސައްކަތް ކުރައްވާނެ ކަމަށެވެ. އަދި ދެ ޤައުމުން ގުޅިގެން، ކުރިއަށް ދެވޭނެ ދާއިރާތައް ދެނެގަނެ، ދެ ޤައުމަށް ވެސް ފައިދާވާ މަސައްކަތްތަކެއް ކުރުމަށް އުންމީދު ކުރައްވާ ކަމަށް ވަޒީރު ވަނީ ވިދާޅުވެފަ އެވެ.
ރާއްޖޭގެ ޚާރިޖީ ވަޒީރު ޑރ. އަބްދުﷲ ޚަލީލް ވަނީ، ލެބަނާނުގެ ޚާރިޖީ ވަޒީރަށް ރަނގަޅު ޞިއްޙަތެއް ދެއްވުމަށް އެދިވަޑައިގަންނަވާ ކަމަށް ވިދާޅުވެފަ އެވެ. ހަމަ އެހެންމެ، ލެބަނާނުގެ އެންމެހާ ރައްޔިތުންނާއި އެ ސަރުކާރަށް އުފާވެރި ދުވަސްތަކަކާއި ކުރިއެރުމެއް ލިބުމަށް ވަޒީރު ވަނީ އެދިވަޑައިގެންފަ އެވެ.