ވިޔަފާރި

ރިޒޯޓުތަކުން ޑޮލަރު މާރުކުރަންޖެހޭ އިންސައްތަ ދަށްކުރުމަކީ މުސްތަޤުބަލުގައި ކުރެވިދާނެ ކަމެއް: ގަވަރުނަރު

ރިޒޯޓުތަކުން ޑޮލަރު މާރުކުރަންޖެހޭ އިންސައްތަ ދަށްކުރުމަކީ މުސްތަޤުބަލުގައި ކުރެވިދާނެ ކަމެއް: ގަވަރުނަރު

މަޓީގެ އަހަރީ އާންމު ޖަލްސާގައި މެންބަރުންގެ ސުވާލުތަކަށް ގަވަރުނަރު ޖަވާބު ދެއްވަނީ، ފޮޓޯ: ދައުރު

މިފްތާޙް މުޙައްމަދު

މިފްތާޙް މުޙައްމަދު

10 ފެބްރުއަރީ 2025، 07:40

10 ފެބްރުއަރީ 2025، 07:40

ހުލާސާ

ރާއްޖެއަށް ކުރިމަތިވެފައި އޮތް ބޭރު ފައިސާގެ ދަތިކަން ހައްލުކުރުމަށްޓަކައި ޤާނޫނަށް ގެނައި ބަދަލެއް.

ރިޒޯޓުތަކުން ޑޮލަރު މާރުކުރަންޖެހޭ އިންސައްތަ ދަށްކުރުމަކީ މުސްތަޤުބަލުގައި ކުރެވިދާނެ ކަމެއްކަމުގައި މޯލްޑިވްސް މަނިޓަރީ އޮތޯރިޓީގެ ގަވަރުނަރު، އަޙުމަދު މުނައްވަރު ވިދާޅުވެއްޖެއެވެ.

ގަވަރުނަރު މިހެން ވިދާޅުވީ، އިއްޔެ އޮތް މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)ގެ އަހަރީ އާންމު ޖަލްސާގައި އެ ޖަމިއްޔާގެ މެންބަރުން ކުރެއްވެވި ސުވާލުތަކަށް ޖަވާބު ދެއްވަމުންނެވެ. ގަވަރުނަރު ވިދާޅުވީ އެ ބަދަލު ގެނައުމަށް ދެތިން އަހަރު ހޭދަވެދާނެ ކަމަށާއި، ނަމަވެސް އެއީ ކުރެވިދާނެ ކަމެއް ކަމަށެވެ. 

މެންޑޭޓަރީ އެކްސްޗޭންޖަށް ބަލާ ނަމަ، %20 މާރުކުރާގޮތަށް މަޖުބޫރުކޮށްފައި އޮތުން އެއީ އެންމެ އެދެވޭ ގޮތަށް ނުވެދާނެ. ދެ އަހަރު ވަރު ބަލާފައި މައިކްރޯ ލެވެލްގައި ރިސާޗުތައް ހަދާ އެ ބަދަލު ގެނެވިދާނެ.

ގަވަރުނަރު އަޙުމަދު މުނައްވަރު ވިދާޅުވިއެވެ.

ބޭރު ފައިސާގެ ޤާނޫނަށް ގެނައި އިސްލާހާއެކު ބޭރުފައިސާގެ އާމްދަނީ ލިބޭ ވިޔަފާރިތަކުން އެ ފަރާތްތަކަށް ލިބޭ އާމްދަނީ ބޭންކުތަކަށް މާރުކުރަން ޖެހެއެވެ. މި ޤާނޫނު އެކުލަވާލާފައިވަނީ ރާއްޖެއަށް ކުރިމަތިވެފައި އޮތް ބޭރު ފައިސާގެ ދަތިކަން ހައްލުކުރުމަށެވެ.

މި އިސްލާހަށް އަލިއަޅުވާލައްވައި، މިދިޔަ މަހުގެ ފަހުކޮޅު ހއ އަތޮޅުގެ ބައެއް ރަށްރަށަށް ކުރެއްވެވި ދަތުރުފުޅުގެ ތެރެއިން ހއ. ހޯރަފުއްޓަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ރައީސުލްޖުމްހޫރިއްޔާ ޑޮކްޓަރ މުޙައްމަދު ވިދާޅުވީ، އެ ޤާނޫނު ތަންފީޒްވުމުން ރައްޔިތުންނާ ސަރުކާރަށް ފަސޭހަތަކެއް ހުންނާނެކަމަށެވެ. އެއާއެކު، ކުރިއަށް އޮތް އަހަރު ގިނަ ކަންކަން ރައްޔިތުންނަށް ފަހިވާނެކަމަށާއި، ޚާއްޞަކޮށް ރާއްޖެއިން ބޭރުގައި ދިރިއުޅޭ ދިވެހިންނާއި ކިޔަވާ ކުދިންނަށް ފައިދާކުރާނެކަމަށް އެމަނިކުފާނު ވިދާޅުވިއެވެ.

ބޭރު ފައިސާގެ ޤާނޫނަށް ގެނައި އިސްލާހާއެކު ރިސޯޓުތަކަށް ލިބޭ އާމްދަނީގެ %20 ނުވަތަ ކޮންމެ ޓުއަރިސްޓެއްގެ ބޮލަކަށް 500 ޑޮލަރު މާރުކުރަން ޖެހެއެވެ. އަދި ކެޓަގަރީ ބީގެ ތަންތަނަށް (ގެސްޓުހައުސް، ސަފާރީ އަދި ހޮޓާތަކަށް) މަހެއްގެ ތެރޭގައި އަންނަ ކޮންމެ ފަތުރުވެރިއަކަށް 25 ޑޮލަރުގެ ރޭޓުން ނުވަތަ މަހަކު ލިބޭ ބޭރު ފައިސާގެ އާމްދަނީން %20 މާރުކުރަން ޖެހެއެވެ. 

މީގެ އިތުރުން، ފަތުރުވެރިކަމުގެ ޚިދުމަތްދޭ ތަންތަނުގެ އިތުރުން މާލީ އިދާރާތައް ފިޔަވައި އެހެން ފަރާތްތަކުން ވިއްކާ ނުވަތަ ފޯރުކޮށްދޭ ޚިދުމަތާއި މުދަލަކަށް ފާއިތުވި އަހަރުގެ ތެރޭގައި ބޭރު ފައިސާއިން މަދުވެގެން 15 މިލިއަން ޑޮލަރަށް ނިސްބަތްވާ އަދަދެއް ލިބިފައިވާނަމަ، އެ ފަރާތްތަކަށް ވެސް މަހަކު ލިބޭ ބޭރު ފައިސާގެ އާމްދަނީން %20 މާރުކުރަން ޖެހޭނެކަމަށް ޤާނޫނުގައި ހާމަކޮށްފައިވެއެވެ.

މި ލިޔުން ކިޔާލުމުން

Ads by MSS