ޚަބަރު
މޯލްޑިވްސް ޙައްޖު ކޯޕަރޭޝަނުގެ "މުވައްޒަފުންގެ ސްކީމް" ގައި އީސީ އިން ބައިވެރިވެއްޖެ

މޯލްޑިވްސް ޙައްޖު ކޯޕަރޭޝަނާއި އިލެކްޝަންސް ކޮމިޝަނުނާއި ދެމެދު އެއްބަސްވުމުގައި ސޮއިކުރެއްވުން|ފޮޓޯ: އީސީ
މޯލްޑިވްސް ޙައްޖު ކޯޕަރޭޝަނުގެ ފަރާތުން ތަޢާރަފުކޮށްފައިވާ "މުވައްޒަފުންގެ ސްކީމް" ގައި އިލެކްޝަންސް ކޮމިޝަން، އީސީ އިން ބައިވެރިވެއްޖެއެވެ.
ޙައްޖު ކޯޕަރޭޝަންގެ އިސްނެންގެވުމުގެ މަތިން ތަޢާރަފްކޮށްފައިވާ މި ސްކީމްގައި ބައިވެރިވުމަށް އެ ކޯޕަރޭޝަނާއިއެކު އިލެކްޝަންސް ކޮމިޝަނުން މިއަދު ވަނީ އެއްބަސްވުމެއްގައި ސޮއިކޮށްފައެވެ.
މި އެއްބަސްވުމުގައި ސޮއިކުރެއްވުމަށް، މިއަދު ވަނީ އިލެކްޝަންސް ކޮމިޝަނުގެ މައިއިދާރާގައި ބައްދަލުވުމެއް ބާއްވާފައެވެ. މި އެއްބަސްވުމުގައި، އިލެކްޝަންސް ކޮމިޝަންގެ ފަރާތުން ސޮއިކުރެއްވީ އެ ކޮމިޝަނުގެ ސެކްރެޓަރީ ޖެނެރަލް އަލްފާޟިލް ޢަބްދުﷲ އުނައިސްއެވެ. އަދި މޯލްޑިވްސް ޙައްޖު ކޯޕަރޭޝަންގެ ފަރާތުން މި އެއްބަސްވުމުގައި ސޮއި ކުރެއްވީ އެ ކުންފުނީގެ މެނޭޖިންގް ޑިރެކްޓަރ އަލްފާޟިލް މުޙައްމަދު ޝަކީލްއެވެ.
އިލެކްޝަންސް ކޮމިޝަނުގައި ބޭއްވި މި ބައްދަލުވުމުގައި، މޯލްޑިވްސް ޙައްޖު ކޯޕަރޭޝަންގެ ހެޑް އޮފް ސިވިކް އެފެއަރޒް ޑރ. އިސްމާޢީލް ޔާމީން ވަނީ ބައިވެރިވެވަޑައިގެންފައެވެ. މީގެ އިތުރުން، އިލެކްޝަންސް ކޮމިޝަނުގެ ފަރާތުން އެ ކޮމިޝަނުގެ މެންބަރުންނާއި، އިސް މުވައްޒަފުން ވަނީ ބައިވެރިވެވަޑައިގެންފައެވެ.