އޭޝިއަން ރައިފަލް އެންޑް ޕިސްޓަލް ކަޕުގެ ފައިނަލްގައި ރާއްޖެ ވާދަކުރަނީ

އޭޝިއަން ރައިފަލް އެންޑް ޕިސްޓަލް ކަޕް 2025 ފައިނަލްބުރަށް ރާއްޖެ ދަތުރުކޮށްފިއެވެ. މި މުބާރާތުގެ ފައިނަލަށް ދަތުރުކޮށްފައި ވަނީ ރާއްޖޭގެ މިކްސްޑް ޓީމް ޖޫނިއަރ ބައިގެ ކުޅުންތެރިންނެވެ. 

މި މުބާރާތުގައި ރާއްޖޭގެ ފަރާތުން ފައިނަލަށް ދަތުރުކޮށްފައި ވާ ދެ ބައިވެރިންނަކީ، މޫސާ ނުޢައިމް ހުސައިން އަދި މަރްޔަމް އީޝަލް މިސްބާހުއެވެ. އޭޝިއަން ރައިފަލް އެންޑް ޕިސްޓަލް ކަޕަކީ ތައިލެންޑުގެ ބެންކޮކްގައި ކުރިއަށްދާ މުބާރާތެކެވެ. މި މުބާރާތުގައި ދެން ކުރިއަށް ދާނީ ބްރޯންޒް މެޑަލްގެ މެޗުތަކެވެ. މި މެޗުގައި ރާއްޖޭގެ ޕެއަރ ބައްދަލުކުރާނީ މެލޭޝިއާގެ ޚަދީޖާ ސައްޔެދާ އަދި ޖަސްޓިން ޖޮއޭންސް އަނަކްގެ ޕެއަރއާއެވެ.

އޭޝިއަން ރައިފަލް އެންޑް ފިސްޓަލް ކަޕުގައި މިއަހަރު އޭޝިއާގެ ޖުމްލަ 22  ޤައުމަކުން ބައިވެރިން ވަނީ ބައިވެރިވެފައެވެ. އަދި މިއީ ރާއްޖެއިން މި މުބާރާތުގައި ޖޫނިއަރ ކެޓެގަރީގެ ބައިވެރިންތަކެއް ވާދަކުރާ ފުރަތަމަ ފަހަރެވެ. ހަމަ އެހެންމެ، ރާއްޖޭގައި ފުރަތަމަ ފަހަރަށް އާންމުންނަށް ހުޅުވާލައިގެން "ނެޝަނަލް ޝޫޓިންގ ސްޕޯޓްސް ޗެމްޕިއަންޝިޕް" މިދިޔަ އަހަރު ވަނީ ކުރިއަށް ގެންގޮސްފައެވެ. އަދި މި މުބާރާތުގައި މިދިޔަ އަހަރު އަލަށް ވަނީ ޖޫނިއަރ ކެޓަގަރީއެއް ތަޢާރަފްކޮށްފައެވެ. އެގޮތުން، މި މުބާރާތުގައި ކުރިއަށް ގެންދިޔަ ޓްރަޔަލްސްތަކަކަށްފަހު މުބާރާތުގައި ވާދަކުރާނެ ކުޅުންތެރިން ވަނީ ހޮވާފައެވެ.

އެގޮތުން، ނޭޝަނަލް ޝޫޓިންގ ސްޕޯޓްސް ޗެމްޕިއަންޝިޕް ގައި ރަން ވަނަތަކެއް ހޯދި އިސްކަންދަރު ސްކޫލުގެ އުމުރުން 15 އަހަރުގެ މޫސާ ނުޢައިމް ހުސައިން އަދި މަޖީދިއްޔާ ސްކޫލުގެ މަރްޔަމް އީޝަލް މިސްބާހްއަކީ ޝޫޓިންގ ޤައުމީ މުބާރާތުން ފުރުސަތު ހޯދި ދެ އެތުލީޓުންނެވެ. މީގެ އިތުރުން، މި ދެ ބައިވެރިން ވަނީ ކުޑަ ދުވަސްކޮޅެއްގެ ތެރޭގައި ޝޫޓިންގ ދާއިރާއިން ބޮޑެތި ކުރިއެރުންތަކެއް ހޯދާފައެވެ. 

މިހާރު ކުރިއަށްދާ އޭޝިއަން ރައިފަލް އެންޑް ޕިސްޓަލް ކަޕުގައި ރާއްޖޭގެ ޕެއަރ ބައްދަލުކުރާ މެޗް އޮންނާނީ މިމަހުގެ 12 ވާ ބުދަ ދުވަހެއެވެ.