ގދ. ފަރެސްމާތޮޑާގެ ކުޅިވަރު ހަރަކާތްތަކާ ގުޅޭ މުހިންމު މަޝްވަރާ ބައްދަލުވުމެއް ބާއްވައިފި

ގދ. ފަރެސްމާތޮޑާގައި ކުރިއަށްގެންދާ  ކުޅިވަރުގެ ޙަރަކާތްތަކާއި ބެހޭގޮތުން މަޝްވަރާކުރެއްވުމަށް ބައްދަލުވުމެއް ބާއްވައިފިއެވެ. މި ބައްދަލުވުމުގައި، ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވަނީ ގދ. ފަރެސްމާތޮޑާގެ ކައުންސިލާއި ބައްދަލުކުރައްވާފައެވެ.

މި ބައްދަލުވުމުގައި، ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވަނީ މި އަހަރުގެ ބަޖެޓުގައި ފަރެސްމާތޮޑާގައި ހިންގުމަށް ރޭވިފައިވާ މަޝްރޫޢުތަކާއި ބެހޭގޮތުން އެ ރަށުގެ ކައުންސިލަށް މަޢުލޫމާތު ދެއްވާފައެވެ. އެގޮތުން، ފަރެސްމާތޮޑާގައި މިހާރު ކުރިއަށްދާ އެންމެ ބޮޑު އެއް މަޝްރޫޢަކީ، އެ ރަށުގެ ފިޓްނެސް އެންޑް ރެކްރިއޭޝަން ސެންޓަރުގެ މަސައްކަތެވެ. ކުޅިވަރާއި ބެހޭ ވުޒާރާއިން ވިދާޅުވީ، މި ސެންޓަރުގެ މަސައްކަތް މި އަހަރުގެ ތެރޭގައި ނިންމައި ކައުންސިލާއި ހަވާލުކުރެވޭނެ ކަމަށެވެ. 

މި ބައްދަލުވުމުގައި، ފަރެސްމާތޮޑާ ކައުންސިލުން ވަނީ ކުޅިވަރުގެ ދާއިރާއިން އެ ރަށަށް ބޭނުންވާ ކަންކަން ވަޒީރާއި ހިއްސާކުރައްވާފައެވެ. މީގެ އިތުރުން، އެ ރަށުގެ ކައުންސިލުން ވަނީ، ސަރުކާރުން އެ ރަށުގައި ޤާއިމްކުރުމަށް ހަމަޖެހިފައިވާ އެކިއެކި ކުޅިވަރުގެ ވަޞީލަތްތަކާއި ބެހޭގޮތުން މަޢޫލޫމާތު ހޯއްދަވާފައެވެ.

މި ބައްދަލުވުމުގައި ކުޅިވަރާއި ހަށިހެޔޮކަމާއި ބެހޭ ވަޒީރު ޢަބްދުﷲ ރާފިޢުގެ އަރިހުގައި ގދ. ފަރެސްމާތޮޑާގެ މަޖިލިސް މެމްބަރު އަޝްރަފް ރަޝީދުވެސް ވަނީ ބައިވެރިވެވަޑައިގެންފައެވެ.