އެންމެ ހެޔޮކަން ބޮޑީ ދެމިހުންނަނިވި ގޮތުގައި ކުރެވޭ ހެޔޮ ޢަމަލު: ޚުޠުބާ

މާތް ނަބިއްޔާ މުޙައްމަދު صـلّى الله علـيـه وسـلّم ގެ އިރުޝާދުފުޅުތަކަށް ބަލާއިރު، މާތް ﷲގެ ޙަޟްރަތުގައި، ހެޔޮ ޢަމަލުތަކުގެ ތެރެއިން އެންމެ ހެޔޮކަން ބޮޑީ، ދެމިހުންނަނިވި ގޮތުގައި ކުރެވޭ ހެޔޮ ޢަމަލުކަމުގައި މިއަދުގެ ހުކުރު ޚުޠުބާގައި ހަނދާންކޮށްދީފިއެވެ.

އެގޮތުން ކީރިތި ރަސޫލާ صـلّى الله علـيـه وسـلّم ޙަދީޘްކުރެއްވި ބަސްފުޅެއްގެ މާނައިގައިވެއެވެ.

މާތް ﷲގެ ޙަޘްރަތުގައި އެންމެ ލޮބުވެތިކަން ބޮޑު ޢަމަލަކީ، ކިތަންމެ މަދުން ނަމަވެސް ދާއިމީ ގޮތެއްގައި ކުރެވޭ ޢަމަލެވެ.

ޚުޠުބާގައި ހާމަކުރިގޮތުން، ގިނަގިނައިން ހެޔޮ ޢަމަލުކުރުމަކީ، ނޭންގުމުގެ ތެރޭގައި ކުރެވޭ ފާފަތަކުން މާތްﷲ މުސްލިމު އަޚުން ސަލާމަތްކުރައްވާނެކަމެކެވެ. އެގޮތުން ޝަޢުބާންމަހުގެ ރޯދައަކީ މިފަދަ ބަރަކާތްތެރި ރޯދަތަކެއް ކަމަށާއި، މި މަހަކީ އެހެން މައްސަރެއްގައި ސުންނަތް ރޯދަ ނުހިއްޕަވާ މިންވަރަށް ރަސޫލާ صـلّى الله علـيـه وسـلّم ރޯދަ ހިއްޕެވި މައްސަރެއްކަމަށް ވާރިދުވެފައިވެއެވެ. 

އެއީ ރަމަޟާން މަހާއި ރަޖަބު މަހާއި ދެމެދުގައިވާ، އަދި މީސްތަކުން އެ މަހަކާ މެދު ޣާފިލުވާ މަހެކެވެ. އެއީ ޢާލަމްތަކުގެ ވެރިރަސްކަލާންގެ ހަޟްރަތަށް މީސްތަކުންގެ ޢަމަލުތައް އުފުއްލެވޭ މަހެކެވެ. އެހެންވެ ތިމަން ކަލޭގެފާނު ރޯދައަށް ހުންނަވަނިކޮށް ތިމަން ކަލޭގެފާނުގެ ޢަމަލުތައް އުފުއްލެވުމަކީ، ތިމަން ކަލޭފާނު ލޯބިކުރައްވާ ކަމެކެވެ.

ޝަޢުބާންމަހުގެ ރޯދައާ ގުޅިގެން އުސާމާ ބުން ޒަޢިދު ރަޟިޔަﷲ ޢަންހުމާ، ރަސޫލާ صـلّى الله علـيـه وسـلّم އާ ސުވާލުކުރެވުމުން އެކަލޭގެފާނު ޙަދީޘްކުރެއްވިއެވެ.

މި މައްސަރުގައި ރޯދަ ހިއްޕަވާ ބޭފުޅުން ކޮންމެހެން ސަމާލުކަން ދޭންޖެހޭ ކަންކަން ވެސް ހުކުރު ޚުޠުބާގައި ހަނދާންކޮށްދެއްވިއެވެ. 

އެގޮތުން ޝަޢުބާން މަސް ދެބައިވެއްޖެނަމަ، އާންމުކޮށް ހިފަމުންދާ ސުންނަތް ރޯދަ ފިޔަވައި، މި ދުވަސްތަކުގައި ސުންނަތް ރޯދަ ނުހިފުމަށް ޢަމުރުކުރައްވާފައިވާކަމަށް ހާމަކުރިއެވެ. ނަމަވެސް، ފާއިތުވި ރަމަޟާން މަހުގެ ރޯދައެއް ޤަޟާކުރަން ޖެހިފައިވާ މީހަކުނަމަ، ނުވަތަ ނަދުރު ރޯދައެއް ހިފަންޖެހިފައިވާ މީހަކުނަމަ، ނުވަތަ އާންމުކޮށް ކޮންމެ ހަފްތާއެއްގެ ހޯމަ ދުވަހާއި ބުރާސްފަތިދުވަހު ރޯދަ ހިފައި، މެދުފޮއި ރޯދަ ހިފުމަށް އާދަވެފައިވާ މީހެއްނަމަ، ނުވަތަ އާދަކޮށް، ދެދުވަހުން އެއް ދުވަހު ރޯދަހިފާ މީހަކުނަމަ، ޝަޢުބާން މަސް ދެބައިވުމުން ވެސް އެފަދަ ރޯދައެއް ހިފުން މަނާވެގެން ނުވާކަމަށް، ޚުޠުބާގައި ޙިއްސާކުރިއެވެ.