ވިޔަފާރި

އެމްޓީސީސީގެ މިދިޔަ އަހަރުގެ އާމްދަނީ %32 ދަށަށް

އެމްޓީސީސީގެ މިދިޔަ އަހަރުގެ އާމްދަނީ %32 ދަށަށް

އެމްޓީސީސީގެ މުވައްޒަފުންތައް ޕްރޮޖެކްޓެއްގެ މަސައްކަތުގައި، ފޮޓޯ: އެމްޓީސީސީ

މިފްތާޙް މުޙައްމަދު

މިފްތާޙް މުޙައްމަދު

14 ފެބްރުއަރީ 2025، 03:54

14 ފެބްރުއަރީ 2025، 03:54

ހުލާސާ

2024ވަނަ އަހަރު ލިބުނީ  2023ވަނަ އަހަރަށްވުރެން 1.1 ބިލިއަން މަދު އަދަދެއް.

މޯލްޑިވްސް ޓްރާންސްޕޯޓް އެންޑް ކޮންރެކްޓިންގް ކޮމްޕެނީ، އެމްޓީސީސީއަށް 2024 ވަނަ އަހަރު ލިބުނު އާމްދަނީ، އޭގެ ކުރީ އަހަރަށް ވުރެން %32.1 ދަށްކަމަށް، އެ ކުންފުނީގެ މާލީ ހިސާބުތަކުން ދައްކައިފިއެވެ.

އެމްޓީސީސީން ހާމަކޮށްފައިވާ މާލީ ހިސާބުތަކުން ދައްކާގޮތުން، މިދިޔަ އަހަރު އެ ކުންފުންޏަށް އާމްދަނީގެ ގޮތުގައި ލިބިފައިވަނީ 2.1 ބިލިއަން ރުފިޔާއެވެ. މި އަދަދަކީ އެ ކުންފުންޏަށް 2023 ވަނަ އަހަރު ލިބުނު 3.2 ބިލިއަން ރުފިޔާއަށް ވުރެން 1.1 ބިލިއަން ރުފިޔާ މަދު އަދަދެކެވެ.

މީގެ އިތުރުން، މިދިޔަ އަހަރުގެ ފަހުކުއާޓާގައި އެމްޓީސީސީގެ އާމްދަނީ، އޭގެ ކުރީއަހަރާ ބަލާއިރު %37.2 ދަށެވެ. އެގޮތުން 2023 ވަނަ އަހަރުގެ ފަހު ކުއާޓާގައި ކުންފުނި ހިންގައިގެން 336.7 މިލިއަން ރުފިޔާ ލިބުނުއިރު، މިދިޔަ އަހަރުގެ އެ މުއްދަތުގައި ލިބިފައިވަނީ 211.2 މިލިއަން ރުފިޔާއެވެ.

ހަމައެއާއެކު، 2024 ވަނަ އަހަރު އެ ކުންފުންޏަށް ސާފުފައިދާގެ ގޮތުގައި ލިބުނު އާމްދަނީ %41 ދަށެވެ. އެގޮތުން އެ އަހަރު ޓެކުހަށް ކެނޑުމުގެ ކުރިން އެ ކުންފުންޏަށް ސާފު ފައިދާގެ ގޮތުގައި ލިބިފައިވަނީ 99.1 މިލިޔަން ރުފިޔާއެވެ. އަދި ޓެކުހަށް ކެނޑުމަށްފަހު، މިދިޔަ އަހަރު ސާފު ފައިދާގެ ގޮތުގައި އެމްޓީސީސީއަށް ލިބިފައިވަނީ 84.2 މިލިޔަން ރުފިޔާއެވެ.

މިދިޔަ އަހަރުގެ ތިންވަނަ ކުއާޓާއާއި ހަތަރުވަނަ ކުއާޓާއަށް ބަލާއިރު، އާމްދަނީ ދަށްވީ %28.8 އެވެ. މިދިޔަ އަހަރުގެ ތިންވަނަ ކުއާޓާގައި 587.1  މިލިޔަން ރުފިޔާގެ އާމްދަނީއެއް ލިބުނުއިރު، ފަހު ކުއާޓާގައި ލިބުނީ 418.2  މިލިޔަން ރުފިޔާގެ އާމްދަނީއެކެވެ.

އެމްޓީސީސީއަކީ ސަރުކާރު ހިއްސާވާ ކުންފުންޏެކެވެ. އަދި މި ކުންފުނިން އަންނަނީ ރާއްޖޭގެ ރަށްރަށުގައި ޢުމްރާނީ ތަރައްޤީއާ ގުޅުންހުރި ގިނަ މަޝްރޫޢުތަކެއް ހިންގަމުންނެވެ. ކުންފުނީގެ ތަފާސްހިސާބުތައް ދައްކާގޮތުގައި މިދިޔަ އަހަރުގެ ފަހު ކުއާޓަރުގައި އެމްޓީސީސީއިންވަނީ 189 މަޝްރޫޢެއްގެ މަސައްކަތްކުރިއަށް ގެންގޮސްފައެވެ. އަދި 9 މަޝްރޫއެއްގެ މަސައްކަތް ނިންމާލާފައިވާއިރު، އަލަށް 3 މަޝްރޫޢުގެ މަސައްކަތް އެ ކުއަރޓަރުގައި ފަށާފައިވާކަމަށް އެމްޓީސީސީން ހާމަކޮށްފައިވެއެވެ. 

މި ލިޔުން ކިޔާލުމުން

Ads by MSS