ދެ އަހަރުގެ ކުޑަ ކުއްޖާއަށް ޖިންސީ ގޯނާކުރި ކާފަ މަރުވެއްޖެ

އުމުރުން 2 އަހަރުގެ ކުޑަ ކުއްޖަކަށް ޖިންސީ ގޯނާ ކުރިކަމުގެ ތުހުމަތުގައި ހައްޔަރުކޮށް، އެ ކުށުގެ ހުކުމް ތަންފީޒުކުރަމުންދިޔަ އެކުއްޖާގެ ކާފަ މަރުވެއްޖެއެވެ.

މި މީހާއަކީ، ހުޅުމާލޭ ޖަލުގައި 25  އަހަރުގެ ޖަލު ޙުކުމެއް ތަންފީޒުކުރަމުން ދިޔަ  މީހެކެވެ. ގއ. ކަނޑުހުޅުދޫ، ރިހިވެލި، އިބްރާހިމް ދީދީ (67 އަހަރު) މަރުވެފައިވަނީ ރޭ ދަންވަރުގެ ވަގުތެއްގައިކަމަށް މޯލްޑިވްސް ކަރެކްޝަނަލް ސާރވިސަސްއިން ވިދާޅުވެއެވެ. 

މޯލްޑިވްސް ކަރެކްޝަނަލް ސާވިސެސްއިން ހާމަކޮށްފައިވާ ގޮތުގައި، އިބްރާހީމް ދީދީ ވަނީ ރޭގެ ވަގުތެއްގައި ހޭލާ އުޅެނިކޮށް ކުއްލިއަކަށް ވެއްޓިފައެވެ. އެހެންކަމުން މި ކަމާއި ގުޅިގެން، މެޑިކަލް ޓީމުން ބަލައި އަފަސް  ފަރުވާ ދިނުމަށް މަސައްކަތް ކުރިކަމަށް ކަރެކްޝަންސްއިން މަޢުލޫމާތުދެއެވެ. ނަމަވެސް، މި ފަރުވާއަށްފަހު ވެސް އޭނާ އެއްވެސް ހަރަކާތެއް ނުކުރާތީ އެމަޖެންސީކޮށް ހުޅުމާލޭ ހޮސްޕިޓަލަށް ގެންދިޔަކަމަށް ކަރެކްޝަންސްއިން މަޢުލޫމާތު ދެއެވެ. އަދި ހޮސްޕިޓަލަށް ގެންގޮސް ފަރުވާ ދިނުމުން ވެސް އޭނާގެ އެއްވެސް ޙަރަކާތެއް ނެތެވެ. އެހެންކަމުން، އޭނާ މަރުވެފައިވާކަމަށް ހޮސްޕިޓަލުން ކަނޑައަޅާފައިވަނީ، ރޭ ދަންވަރު 2:40 ހާއިރުކަމަށް ކަރެކްޝަންސްއިން ވިދާޅުވިއެވެ.

ކަރެކްޝަނަލް ސާވިސަސްއިން ވިދާޅުވީ، އިބްރާހިމް ދީދީއަކީ ހައި ބަލްޑް ޕްރެޝަރ، ކޮލެސްޓްރޯލް އަދި ޓްރެމަރސް، ފަދަ ބަލިތަކަށް ބޭސްކުރަމުން އަންނަ މީހެއް ކަމަށެވެ. މީގެ އިތުރުން މޯލްޑިވްސް ކަރެކްޝަނަލް ސާވިސަސް އިން ވިދާޅުވީ، އިބްރާހިމް ދީދީ މަރުވެފައިވާކަން އޭނާގެ ޢާއިލާއަށާއި، އިންސްޕެކްޓަރ އޮފް ކަރެކްޝަނަލް ސަރވިސްއަށާއި، މޯލްޑިވްސް ޕޮލިސް ސަރވިސްއަށާއި، ހިއުމަން ރައިޓްސް ކޮމިޝަން އޮފް ދަ މޯލްޑިވްސްއަށާއި، ނެޝަނަލް އިންޓެގްރިޓީ ކޮމިޝަން އަށް އަންގަވާފައިވާ ކަމަށެވެ.

ގއ. ކަނޑުހުޅުދޫގައި އުމުރުން 2 އަހަރުގެ ކުޑަކުއްޖަކަށް ޖިންސީ ގޯނާކުރި މައްސަލައިގައި  އިބްރާހިމް ދީދީ (ކާފަ) ގެ އިތުރުން އެ ކުޑަ ކުއްޖާގެ މުނިކާފަވެސް ވަނީ ހައްޔަރުކޮށް އުމުރަށް ޖަލަށް ލާފައެވެ. އެ ކުއްޖާގެ މުނިކާފަ ހަސަން މޫސާ ދީދީ (85 އަހަރު) ވަނީ 2023 ވަނަ އަހަރުގެ ސެޕްޓެމްބަރު މަހު މަރުވެފައެވެ. އޭނާ ވެސް މަރުވެފައި ވަނީ، ހުޅުމާލެ ޖަލުގައިި ހުކުމް ތަންފީޒުކުރަމުން ދަނިކޮށެވެ.