ރިސޯޓުތަކުގައި މަސައްކަތްކުރާ ބިދޭސީންގެ ބަޔޯމެޓްރިކްސް ނެގުމުގެ މަސައްކަތް ފަށައިފި

ރާއްޖޭގެ ރިސޯޓުތަކުގައި މަސައްކަތްކުރާ ބިދޭސީންގެ ބަޔޯމެޓްރިކްސް ނެގުމުގެ މަސައްކަތް  ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާއިން ފަށައިފިއެވެ. 

ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާއިން ވިދާޅުވީ، ޤަވާއިދާއި ޚިލާފަށް ރާއްޖޭގައި އުޅެމުންދާ ބިދޭސީންގެ މައްސަލަ ހައްލުކުރުމަށްޓަކައި ކުރިއަށްގެންދާ "އޮޕަރޭޝަން ކުރަނގި" ގެ ދަށުން 13 ރިސޯޓެއްގައި މަސައްކަތްކުރާ ބިދޭސީންގެ މަޢުލޫމާތު އެއްކުރުމުގެ މަސައްކަތް ކުރަމުންދާ ކަމަށެވެ. އެގޮތުން މި މަސައްކަތުގައި، އެ ވުޒާރާގެ 56 މުވައްޒަފުން ހަރަކާތްތެރިވާނެކަމަށް އެ ވުޒާރާއިން ވިދާޅުވިއެވެ. އަދި ރިސޯޓުތަކުގައި މި މަސައްކަތް ކުރިއަށްދާނީ، ހޮނިހިރު ދުވަހާއި ހަމައަށްކަމަށް އެ ވުޒާރާއިން މަޢުލޫމާތުދެއެވެ.

ރާއްޖޭގައި ޤަވާއިދާއި ޚިލާފަށް މަސައްކަތްކުރަމުންދާ ބިދޭސީންގެ މަޢުލޫމާތު އެއްކުރުމަށް ކުރިއަށްގެންދާ "އޮޕަރޭޝަން ކުރަނގި" ގެ ދަށުން މިހާތަނަށް ވަނީ 52،495 ބިދޭސީއެއްގެ ބަޔޯމެޓްރިކްސް ނަގާފައިކަމަށް ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާއިން ވިދާޅުވެއެވެ. އޭގެ ތެރޭގައި، މާލެ ސަރަޙައްދުގައި ދިރިއުޅެމުންދާ  30،426 ބިދޭސީންނާއި އަތޮޅުތެރޭގައި އުޅޭ 22،069 ބިދޭސީން ހިމެނެއެވެ. ރާއްޖޭގައި ޤަވާއިދާއި ޚިލާފަށް އުޅޭ ބިދޭސީންގެ މައްސަލައަށް ދާޢިމީ ޙައްލެއް ހޯދުމަށް މި އޮޕަރޭޝަން ފަށާފައިވަނީ މިދިޔަ އަހަރުގެ މެއި މަހުގެ 2 ވަނަ ދުވަހު އެވެ.

އޮޕަރޭޝަން ކުރަނގި ގެ ދަށުން ރާއްޖޭގައި ވަޒީފާ އަދާކުރާ ބިދޭސީންގެ އާންމު މައުލޫމާތު ނެގުމާއި، އިނގިލީގެ ނިޝާން ނެގުމުގެ އިތުރުން، ބިދޭސީން ރާއްޖޭގައި މަސައްކަތްކުރަނީ ރާއްޖޭގައި ހެދިފައިވާ ޤާނޫނާއި ޤަވާއިދުގެ ދަށުންތޯ ބަލައި ޔަޤީންކުރާނެއެވެ. މި އޮޕަރޭޝަންގެ ދަށުން ބިދޭސީންގެ ބަޔޯމެޓްރިކްސް ނެގުމުގެ އިންތިޒާމު ކައުންސިލް އިދާރާތަކުގައި ޤާއިމުކުރާނެ އެވެ. މީގެ އިތުރުން، ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާއިން ވިދާޅުވީ، އެއްކުރެވޭ މަޢުލޫމާތުތަކަށް ބިނާކޮށް ބިދޭސީންގެ މައި ދަފްތަރެއް އެކުލަވާލާނެ ކަމަށެވެ.

ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާއާއި މޯލްޑިވްސް އިމިގްރޭޝަނުން ގުޅިގެން ކުރާ މި މަސައްކަތުގެ ސަބަބުން ރާއްޖޭގައި ބޮޑުވެފައި އޮތް ބިދޭސީންގެ މައްސަލައަށް ޙައްލެއް ލިބިގެންދާނެކަމަށް ބެލެވެއެވެ.