މަސްވެރިކަމުގެ ސިނާޢަތުގައި ތާރީޚީ ދުވަހެއް: 48 މަސް ދޯންޏަކަށް ޖުމްލަ 7 މިލިއަން ރުފިޔާ ޖަމާކޮށްފި

މިއަދަކީ މަސްވެރިކަމުގެ ސިނާޢަތުގައި ފާހަގަކޮށްލެވޭ ޚާއްޞަ، ތާރީޚީ ދުވަހެއްކަމަށް މިފްކޯއިން ވިދާޅުވެއްޖެއެވެ. މިފްކޯއިން ވިދާޅުވީ، މިއަދު 48 މަސް ދޯންޏަކަށް ޖުމްލަ 7 މިލިއަނަށް ވުރެ ގިނަ ރުފިޔާ ޖަމާކޮށްދީފައިވާ ކަމަށެވެ. 

މިފްކޯއިން ވިދާޅުވީ، މިއަދު ފައިސާ ދޫކޮށްފައިވަނީ މިދިޔަ ބުދަ ދުވަހު މަސްކިރުވި ދޯނިތަކަށް ކަމަށެވެ. މަސްވެރިންނަށް 48 ގަޑިއިރުގެ ތެރޭގައި ފައިސާ ދޫކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ވަޢުދުފުޅެކެވެ. މި ވަޢުދާއި އެއްގޮތަށް މިދިޔަ އަހަރުގެ މަސްވެރިންގެ ދުވަހުން ފެށިގެން ވަނީ، މަސްވެރިންނަށް ބަރާބަރަށް ފައިސާ ދޫކުރަން ފަށައިފައެވެ. މީގެ އިތުރުން މިފްކޯއިން ވިދާޅުވީ، މިކަމުގެ ސަބަބުން، މަސްވެރިކަމަށް ނިކުންނަ ދޯނިތަކުގެ އަދަދު އިތުރުވެފައިވާ ކަމަށެވެ. 

މިފްކޯއިން ވިދާޅުވީ، މި މަހުގެ 12 ވީ ބުދަ ދުވަހު ޖުމްލަ 48 ދޯންޏަކުން މިފްކޯގެ ސެންޓަރުތަކަށް މަސް ކިރާފައިވާ ކަމަށެވެ. އެހެންކަމުން، މި ދޯނިތަކުން ކިރާފައިވާ މަހަށް މިއަދު ހެނދުނު 10:30 އާއި 12:30 އާއި ދެމެދު ފައިސާޖަމާކޮށްދީފައިވާކަމަށް އެ ކުންފުނިން މަޢުލޫމާތުދެއެވެ. އަދި ފައިސާ ޖަމާކޮށްފައިވާ އަދަދު 7.65 މިލިއަން ރުފިޔާއަށް އަރާކަމަށް މިފްކޯއިން ވަނީ ވިދާޅުވެފައެވެ. މީގެ އިތުރުން މިފްކޯއިން ވިދާޅުވީ، ބީއެމްއެލްގެ ޚިދުމަތް ނޫން އެހެން ބޭންކް ޓްރާންސްފަރތައް އެންމެ އަވަހަށް ބޭންކިންގ ޚިދުމަތް ހުޅުވާ ދުވަހު ހަވީރު 4:30 ގެ ކުރިން ލިބޭނެކަމަށެވެ. 

މަސްވެރިކަމުގެ ސިނާޢަތަކީ ރާއްޖެއަށް އެންމެ ބޮޑު މަންފާއެއް ކުރާ ސިނާޢަތްކަމަށް ހެދުމަށް ސަރުކާރުން އަންނަނީ މުހިންމު މަސައްކަތްތަކެއް ކުރަމުންނެވެ. އެގޮތުން، މަސްވެރިކަމުގެ ސިނާޢަތަށް ދިމާވެފައިވާ މައްސަލަތައް ސަރުކާރުގެ ފުރަތަމަ 3 އަހަރުގެ ތެރޭގައި ޙައްލުކުރެއްވުމަށް ދަނީ މަސައްކަތްކުރަމުންނެވެ. އޭގެ ތެރޭގައި، މަސްވެރިކަމުގެ ފެސިލިޓީތައް ތަރައްޤީކުރުމުގެ މަސައްކަތް ހިމެނެއެވެ. މީގެ އިތުރުން، މިފްކޯގެ ހިންގުމަށް ބޮޑެތި ބަދަލުތަކެއް ގެނަސް، އެ ކުންފުންޏަކީ ފައިދާވާ، ދެމެހެއްޓެނިވި ވިޔަފާރިއަކަށް ހެދުމަށް ވެސް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ.

މަސްވެރިކަމުގެ ސިނާޢަތް ވީހާވެސް ބޮޑަށް ފުޅާކުރެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ އަމާޒެކެވެ.