ސިވިލް ކޯޓަށް ހާޒިރުނުވާ ފަރާތެއް ހޯދަން ފުލުހުން މަސައްކަތް ފަށައިފި

ބަންދުގައި ބަހައްޓައިގެން ކޯޓަށް ހާޒިރުކޮށްދިނުމަށް ފުލުހުންގެ މައްޗަށް ކޮށްފައިވާ އަމުރަކާ ގުޅިގެން ދިވެހި ފިރިހެނަކު ހޯދަން ފުލުހުން ވަނީ މަސައްކަތް ފަށައިފައެވެ.

ފުލުހުންގެ ޚިދުމަތުން މިއަދު ހާމަކުރި ގޮތުގައި، މި ފަރާތް ހޯދަމުންދަނީ ސިވިލް ކޯޓަށް ހުށަހަޅާފައިވާ މައްސަލައަކާ ގުޅިގެން އެ ކޯޓަށް ހާޒިރުކުރަން ބޭނުންވެ ހާޒިރުކުރެވިފައިނުވާތީއެވެ. މި އަމުރާ ގުޅިގެން ހޯދަމުންދާ ފަރާތަކީ ޒައިދާން މުޙައްމަދު ހާޝިމް، ގ. ސިނަމާލެ 1، 05-13 / މާލެ (28އ) އެވެ.

ފުލުހުންގެ ޚިދުމަތުން އިތުރަށް ބުނީ، ޒައިދާން މުޙައްމަދު ހާޝިމް ހޯދަމުންދަނީ އޭނާގެ މައްޗަށް ސިވިލް ކޯޓަށް ހުށަހެޅިފައިވާ ޙުކުމް ތަންފީޒްކުރުމުގެ މައްސަލައަކާ ގުޅިގެން ކަމަށެވެ. މި މަހުގެ 20ވަނަ ދުވަހުގެ 10:30އަށް ސިވިލް ކޯޓަށް ހާޒިރުކޮށްދިނުމަށް ފުލުހުންގެ މައްޗަށް ވަނީ އަމުރުކޮށްފައެވެ.

ޒައިދާން މުޙައްމަދު ހާޝިމްއާ ބެހޭ އެއްވެސް މަޢުލޫމާތެއް ލިބިފައިވާ ފަރާތްތަކުން ފުލުހުންގެ ކަސްޓޯޑިއަލް ނަންބަރު 9991442އަށް ގުޅުއްވައި އެ މަޢުލޫމާތު ހިއްސާކުރުމަށް ފުލުހުން ވަނީ އާންމުންނަށް ގޮވާލާފައެވެ.

މި މައްސަލައާ ގުޅިގެން ފުލުހުން ދެއްވި މަޢުލޫމާތުގައި، ޒައިދާން ހޯދުމުގެ މަސައްކަތް ފެށުމާއެކު، އޮޅުވާލައިގެން މުދަލާއި ފައިސާ އިތުރު ބައެއްގެ އަތުން އޭނާ ނަގާފައިވޭތޯވެސް 2023ވަނަ އަހަރު ބަލާފައިވާ ކަމަށް ބުންޏެވެ. އަދި 2022ވަނަ އަހަރުވެސް ގިނަ ބައެއްގެ އަތުން އޮޅުވާލައިގެން މުދަލާއި ފައިސާ ހޯދާފައިވާކަމަށް ތުހުމަތު ކުރެވިގެން ޒައިދާން ވަނީ ބަންދުކޮށްފައެވެ.

ކްރިމިނަލް ކޯޓުން ކުރިން ނެރުނު އަމުރެއްގައި ބަޔާންކޮށްފައިވާ ގޮތުން، ޒައިދާނަކީ  ކުށުގެ ރެކޯޑު އޮތް މީހެއް ކަމަށާއި އޭނާގެ އެފަދަ އެހެން މައްސަލަތައް ވެސް ތަޙްޤީޤު ކުރަމުންދާ ކަމަށް ފާހަގަކޮށްފައިވެއެވެ.