ސަޢުދީ ތަޖުރިބާ ދަތުރުގެ ބައިވެރިން އިސްލާމީ ތަޢުލީމުދޭ އެންމެބޮޑު ޔުނިވަރސިޓީއަށް ޒިޔާރަތްކޮށްފި

ދިވެހިރާއްޖޭގެ އިސްލާމީ ކަންތައްތަކާ ބެހޭ ވުޒާރާއާއި ވޯލްޑް އެސެމްބްލީ އޮފް މުސްލިމް ޔޫތު (ވަމީ) ގުޅިގެން ކުރިއަށްގެންދާ ސަޢުދީ ތަޖުރިބާ ދަތުރުގެ ބައިވެރިން، އިސްލާމީ ދުނިޔޭގައި އިސްލާމީ ތަޢުލީމުދޭ އެންމެ ބޮޑު ޔުނިވަރސިޓީ ކަމަށްވާ މަދީނާ އިސްލާމީ ޔުނިވަރސިޓީއަށް މިއަދު ޒިޔާރަތްކޮށްފިއެވެ.

މި ޒިޔާރަތުގައި ދަތުރުގެ ބައިވެރިން ވަނީ ޔުނިވަރސިޓީގެ ކަންކަން ކުރިއަށްދާ ގޮތް ބަލައިލުމުގެ އިތުރުން ޔުނިވަރސިޓީގެ މިސްކިތަށްވެސް ޒިޔާރަތްކޮށްފައެވެ. އަދި މީގެ އިތުރުން މަސްޖިދުއްނަބަވީއަށާއި، މަދީނާގެ ބައެއް އިސްލާމީ ޚާއްޞަ ތަންތަނަށްވެސް ޒިޔާރަތްކޮށްފައިވެއެވެ. މިގޮތުން ޤުބާ މިސްކިތަށާއި، އުޙުދުގެ މައިދާނުގެ އިތުރުން މަދީނާގައި ހުންނަ އިސްލާމީ މައުރަޒަށް ޒިޔާރަތްކޮށް، ނަބިއްޔާގެ ޙަޔާތްޕުޅާ ގުޅޭ ވާހަކަތަކާއި، މަސްޖިދުއްނަބަވީއަށް އައިސްފައިވާ ބަދަލުތަކުގެ މަޢުލޫމާތު ބައިވެރިން ވަނީ ހޯދާފައެވެ.

މި މަހުގެ 14 އިން 21 އަށް ކުރިއަށްދާ މި ދަތުރުގައި ދިވެހިރާއްޖޭގެ އެކި މަރުކަޒުތަކުން ދަރިވަރުންނާއި ޒުވާން ޚަޠީބުން ބައިވެރިވެފައިވެއެވެ. މީގެ ތެރޭގައި ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން، އިސްލާމިކް ޔުނިވަރސިޓީގެ ދަރިވަރުންގެ ޔޫނިއަން، ސީއެޗް.އެސް.ސީ، ވިލާ ކޮލެޖު، ޒިކުރާ ކޮލެޖު، ހިރާ ސްކޫލް، އަދި އަޙްމަދިއްޔާ އިންޓަނޭޝަނަލް ސްކޫލްގެ ބައެއް ދަރިވަރުން ހިމެނެއެވެ.

މި ދަތުތަކީ ރައީސް ޑރ. މުހައްމަދު މުޢިއްޒު މިއަހަރުގެ ރިޔާސީ ބަޔާނުގައި އިއުލާން ކުރައްވާފައިވާ އިސްލާމިކް ލީޑާރޝިޕް ޕްރޮގްރާމްގެ ދަށުން ކުރިއަށްދާ ދަތުރެއްކަން ފާހަގަކޮށްލެވެއެވެ.