ރަށު އެކްސްޕޯ ކާމިޔާބުކަމާއެކު ނިންމާލައިފި

ދިވެހިރާއްޖޭގެ ރަށްރަށުގެ ފަތުރުވެރިކަމާއި ސަޤާފަތް ޕްރޮމޯޓްކުރުމަށް ބޭއްވި "ރަށު އެކްސްޕޯ" ކާމިޔާބުކަމާއެކު ނިންމާލައިފިއެވެ.

މި އެކްސްޕޯއަކީ "ޓްރެވަލް ގާއީޒް" ގެ ފަރާތުން އިންތިޒާމްކޮށްގެން 3 ދުވަހުގެ މުއްދަތަކަށް ކުރިއަށް ގެންގޮސްފައިވާ އެކްސްޕޯއެކެވެ. ރަށު އެކްސްޕޯ ބާއްވާފައިވަނީ ހުޅުމާލެ ސެންޓްރަލް ޕާކުގައެވެ.

ރަށު އެކްސްޕޯއާއި ގުޅޭގޮތުން ވާހަކަފުޅު ދައްކަވަމުން ދަ ޓްރެވަލް ގާއީޒްގެ ޑިރެކްޓަރ ޑރ. ހުސައިން ސަނީ އުމަރު ވިދާޅުވީ، މި އެކްސްޕޯއަށް ޢާންމުންގެ ފަރާތުން ފުރިހަމަ ތަރުހީބެއް ލިބިގެންދިޔަ ކަމަށެވެ. އަދި މި ޙަރަކާތް ބޭއްވުމުގެ އެންމެ ބޮޑު އެއް މަޤްސަދު ހާސިލުވެފައިވާ ކަމަށާއި، މި  އެކްސްޕޯ ނިމިގެން ދިޔައީ ވަރަށް ކާމިޔާބުކަމާއިއެކު ކަމަށް ޑރ. ސަނީ ވިދާޅުވިއެވެ. 

ޑރ. ސަނީ ވިދާޅުވީ، މި އެކްސްޕޯއަށް ރާއްޖޭގެ އެކި ރަށްރަށުގެ ކައުންސިލްތަކުގެ ފަރާތުން ވަރަށް ބޮޑަށް ޝައުގުވެރިކަން ފާޅުކޮށްފައިވާ ކަމަށެވެ. އެހެންކަމުން، އަންނަ އަހަރުގެ ރަށު އެކްސްޕޯއަށް މިއަށްވުރެ ފުރިހަމައަށް ތައްޔާރުވުމުގެ މަސައްކަތްތައް ކުރާނެކަމަށް އޭނާ ވިދާޅުވިއެވެ.

މީގެ އިތުރުން ޑރ. ސަނީ ވިދާޅުވީ، މި އަންނަ އަހަރުގެ އެކްސްޕޯގައި މިއަހަރަށް ވުރެ ގިނަ ހަރަކާތްތައް ހިމަނައިގެން ކުރިއަށް ގެންދަވަން މަސައްކަތްކުރައްވާނެ ކަމަށެވެ. އަދި، އަންނަ އަހަރުގެ ރަށު އެކްސްޕޯ ކުރިއަށް ދާނީ ރޯދަ މަހުގެ ކުރިންކަމަށް ވެސް ޑރ. ސަނީ ފާހަގަކުރެއްވިއެވެ.

ދަ ޓްރެވަލް ގާއީޒްގެ ޑިރެކްޓަރ ޑރ. ހުސައިން ސަނީ އުމަރު ވިދާޅުވީ، މި އަހަރުގެ ރަށު އެކްސްޕޯގައި ޖުމްލަ 9 އަތޮޅަކުން 14 ރަށެއް ބައިވެރިވެފައިވާ ކަމަށެވެ. އެގޮތުން، މި އެކްސްޕޯގައި ބައިވެރިވި އެކި ރަށްރަށުގެ ކައުންސިލްތަކާއި، ގެސްޓްހައުސްތަކާއި، ރިސޯޓުތަކާއި، ކުދި އަދި މެދު ފަންތީގެ ވިޔަފާރިތަކުން ޖުމްލަ 50 އަށް ވުރެ ގިނަ ސްޓޯލް ބަހައްޓާފައިވާކަން ޑރ. ސަނީ ވަނީ ފާހަގަކުރައްވާފައެވެ. އަދި، މިއިން ކޮންމެ ސްޓޯލްއެއްގައި ވެސް އެ ރަށެއްގައި ހުރި ޚާއްސަ ކަންތައްތައް ދައްކާލާފައިވާކަމަށް ޑރ. ސަނީ ވިދާޅުވިއެވެ.

ރަށު އެކްސްޕޯއަކީ ރާއްޖޭގައި ޑޮމެސްޓިކް ފަތުރުވެރިކަމަށް ޚާއްޞަކޮށްގެން ބޭއްވި ފުރަތަމަ އެކްސްޕޯއެވެ. މި އެކްސްޕޯގައި ރާއްޖޭގެ ގިނަ ކުންފުނިތަކުން ވެސް ވަނީ ބައިވެރިވެފައެވެ.