އިންޑިއާގެ ނިއު ދިއްލީގެ ރޭލު ސްޓޭޝަނެއްގައި މީހުން ގިނަވެ ފިތިބާރުވެގެން 18 މީހުން މަރުވެއްޖެ

އިންޑިއާގެ ވެރިރަށް ކަމަށްވާ ނިއު ދިއްލީގައި ހުންނަ މައި ރޭލު ސްޓޭޝަންގައި މީހުން ގިނަވެ، ފިތިބާރުވުމުގެ ސަބަބުން 18 މީހުން މަރުވެއްޖެ އެވެ. 

އިންޑިއާގެ ނޫސްތަކުން މަޢުލޫމާތުދޭގޮތުގައި، މި ޙާދިސާގައި ފަސް ކުޑަކުދިން ވަނީ މަރުވެފަ އެވެ. މީގެ އިތުރުން، ހަތަރު މީހުން ފިޔަވައި މި ޙާދިސާގައި މަރުވި އެންމެންނަކީ އަންހެނުނެވެ. މި ހާދިސާގައި މަރުވެފައިވާ އެންމެ ކުޑަ ކުއްޖާގެ ޢުމުރަކީ 7 އަހަރެވެ. އަދި، އެންމެ ދޮށީ މީހާގެ ޢުމުރަކީ 79 އަހަރެވެ. ރޭލު ސްޓޭޝަންތެރޭގައި ފިތި ބާރުވުމުގެ ސަބަބުން 18 މީހުން މަރުވެފައިވާއިރު، ގިނަ އަދަދެއްގެ ބަޔަކަށް ވަނީ އެކި ވަރުގެ އަނިޔާތައް ވެފައެވެ. އަދި، މީގެ ތެރެއިން ބައެއް މީހުންނަށް ދަނީ ހޮސްޕިޓަލުގައި އެޑްމިޓްކޮށްގެން ފަރުވާ ދެމުންނެވެ.

ނިއު ދިއްލީގެ ޗީފް މިނިސްޓަރު އާތިޝީ މާރްލޭނާ ވިދާޅުވީ، ނިއު ދިއްލީގެ މައި ރޭލު ސްޓޭޝަނުގައި ޖާގައަށްވުރެ މީހުން ގިނަވެފައި ވަނީ، ބުދު ދީނުގެ އަޅުކަމެއްގައި ބައިވެރިވުމުގެ ގޮތުން އިންޑިއާގެ އެކި ކަންކޮޅުތަކުން ދިއްލީއަށް ގިނަ އަދަދެއްގެ ބަޔަކު އައުމާއި ގުޅިގެން ކަމަށެވެ. މީގެ އިތުރުން އެ ޤައުމުގެ ރޭލު ދަތުރުފަތުރާއި ބެހޭ ވަޒީރު އަޝްވިނީ ވެއިޝްނަވް ވިދާޅުވީ، މި ޙާދިސާއާއި ގުޅިގެން ފުރިހަމަ ތަހުޤީޤެއް ހިންގުމަށް ކަމާ ގުޅުންހުރި އިދާރަތަކަށް އަމުރުކޮށްފައިވާނެ ކަމަށެވެ.

މި ޙާދިސާގައި އެކި ވަރުގެ ގެއްލުންވެގެން ހޮސްޕިޓަލުގައި ފަރުވާދެމުންދާ މީހުންނަށް ދެއްލީގެ ލެފްޓިނެންޓް-ގަވަރުނަރު ވީކޭ ސަކްސޭނާ ވަނީ ޒިޔާރަތްކުރައްވާފަ އެވެ. އަދި އެމީހުންގެ ޙާލު ބައްލަވައި ވީކޭ ސަކްސޭނާ ވިދާޅުވީ، މިއީ ވަރަށް ހިތާމަވެރި ޙާދިސާއެއް ކަމަށެވެ. ހަމަ އެހެންމެ، މި ޙާދިސާގައި މަރުވި މީހުންގެ ޢާއިލާތަކަށް އޭނާ ވަނީ ހެޔޮ  ދުޢާ ދަންނަވާފަ އެވެ. 

އިންޑިޔާގައި ދާދި ފަހުން ނުރައްކާތެރި ރޭލު އެކްސިޑެންޓުތަކެއް ވަނީ ހިނގާފައެވެ. އެ ގޮތުން، 2023 ވަނަ އަހަރު ހިނގި ރޭލު އެކްސިޑެންޓެއްގައި 288 މީހުން ވަނީ މަރުވެފައެވެ. ދުނިޔޭގައި ހަތަރު ވަނައަށް އެންމެ ބޮޑު ރޭލު ދަތުރުފަތުރުގެ ވިއުގަ އޮތީ އިންޑިޔާގައެވެ. އެހެންކަމުން، އެ ވިއުގަ އިތުރަށް ތަރައްޤީ ކުރުމަށް އިންޑިއާގެ ބޮޑުވަޒީރު ނަރެންދްރަ މޯދީގެ ސަރުކާރުން ވަނީ 30 ބިލިޔަން އެމެރިކާ ޑޮލަރުގެ މަޝްރޫޢެއް ފަށާފައެވެ.

އިންޑިޔާގެ އުތުރުގެ ސަރަޙައްދެއްގައި ވެސް ދާދި ފަހުން ވަނީ ގިނަ އަދަދެއްގެ ބަޔަކު ފިތިބާރުވެގެން މަރުވެފައެވެ. އެއީ ވެސް ބުދު ދީނުގެ އަޅުކަމެއްގެ ތެރެއިން ހިނގާފައިވާ ޙާދިސާއެކެވެ.