ކުޅިވަރު
ޔުވެންޓަސް އަތުން ބަލިވެ ލީގުގެ އެއްވަނައަށް އެރުމަށް ލިބުނު ފުރުސަތު އިންޓާއަށް ގެއްލިއްޖެ

މެޗުން މޮޅުވި ގޯލު ކާމިޔާބުކުރުމަށްފަހު ކޮންސެސާއޯ އުފާފާޅުކުރަނީ، ފޮޓޯ: ގެޓީއިމޭޖަސް
އިޓާލިއަން ސިރީ އޭގެ އެއްވަނައަށް އެރުމަށް ލިބުނު ފުރުސަތު، ޔުވެންޓަސް އަތުން 1-0 އިން ބަލިވުމާ ގުޅިގެން އިންޓަ މިލާނަށް ގެއްލިއްޖެއެވެ.
އިންޓަ މިލާން މި މެޗަށް ނިކުތްއިރު، ލީގުގެ އެއްވަނައިގައި އޮތް ނަޕޯލީ ހޮނިހިރު ދުވަހު ލާޒިއޯއާ ކުޅުނު މެޗުން 2-2 އިން އެއްވަރުވުމުން، އިންޓަ މިލާނަށް ތިން ޕޮއިންޓާއެކު ސެޕްޓެންބަރު މަހަށް ފަހުން ލީގުގެ އެއްވަނައަށް އެރުމުގެ ފުރުސަތު އޮތެވެ.
ނަމަވެސް ޔުވެންޓަސްގެ ފްރާންސެސްކޯ ކޮންސެސާއޯ 74ވަނަ މިނެޓުގައި ކާމިޔާބުކުރި ގޯލާއެކު، ޓިއުރިންގައި ކުޅުނު މި މެޗު ނިމުނީ، މީގެ އެއް ސީޒަން ކުރިން ލީގު ކާމިޔާބުކުރި ނަޕޯލީއަށް ވުރެން ދެ ޕޮއިންޓު ފަހަތުގައި އިންޓަ މިލާން އޮވެއެވެ.
މިއީ މި ސީޒަނުގައި އިންޓަ މިލާން ބަލިވި ތިންވަނަ މެޗެވެ. އަދި މިއީ އެންމެ ފަހުން ކުޅުނު ތިން މެޗުގެ ތެރެއިން އެ ޓީމު ބަލިވި ދެވަނަ މެޗު ވެސް މެއެވެ. ފާއިތުވި ހަތަރު މެޗަށް ބަލާނަމަ، އެ ޓީމު މޮޅުވެފައިވަނީ އެންމެ މެޗަކުންނެވެ.
އަނެއްކޮޅުން މި ކާމިޔާބާއެކު ޔުވެންޓަސް މިވަނީ ލީގުގެ ހަތަރުވަނައަށް ކުރިޔަށް ޖެހިލާފައެވެ. ޔުވެންޓަސް އާއި ލާޒިއޯ ޕޮއިންޓުގެ ގޮތުން ހަމަހަމަ ނަމަވެސް، ޔުވެންޓަސް ހަތަރުވަނައިގައި އޮތީ ގޯލު އެޑްވާންޓޭޖުންނެވެ.
ކޮންސެސާއޯ ކާމިޔާބުކުރި ގޯލަކީ، އެ ޓީމުގެ ރޮންޑޮލް ކޮލޯ މުއާނީ އިންޓަ މިލާނުގެ ޕެނަލްޓީ އޭރިއާ ތެރެއިން ގިނަ ކުޅުންތެރިންތަކެއް ކައިރިން ނައްޓާލުމަށްފަހު ކޮބްސެސާއޯގެ ކުރިމައްޗަށް ކުޅެލި ބޯޅައެކެވެ. ކޮންސެސާއޯއަށް ހަމައެކަނި ކުރަން ޖެހުނު ކަމަކީ ގޯލުގެ ކުރިމަތީގައި ހުރެފައި ގޯލުގެ ރަގަޅު ތަނަށް ބޯޅަ ފޮނުވާލުމެވެ.
ޔުވެންޓަސްއިން މި ގޯލު ކާމިޔާބުކުރީ އިންޓަ މިލާންގެ މާކަސް ތުރާމް ފޮނުވާލި ހަމަލާއެއް، ޔުވެންޓަސްގެ ގޯލުކީޕަރ މިޝެލް ޑި ގްރެގޮރިއޯ ދިފާއުކުރިތާ މިނެޓެއް ފަހުންނެވެ.
މި މެޗުގައި އިންޓަ މިލާނަށް ލީޑު ނަގައިދިނުމަށް ރަގަޅު ހަމަލާތަކެއް އުފެއްދި އެ ޓީމުގެ ކަނާތްފަރާތުން ފަހަތަށް ކުޅޭ ޑެންޒެލް ޑަމްފްރީޒް ވަނީ، ޖުވެންޓަސްގެ ނުރައްކާތެރި ހަމަލާއެއް ގޯލު ލައިން މަތިން ވެސް ދިފާއުކޮށްފައެވެ.
މިއީ ޖެހިޖެހިގެން ޔުވެންޓަސް މޮޅުވި ތިންވަނަ މެޗެވެ. އެ ޓީމު މި ސީޒަނުގައި ބަލިވެފައިވަނީ އެންމެ މެޗަކުންނެވެ. ޕޮއިންޓު ޓޭބަލްގައި އެ ޓީމު ފަހަތަށް ޖެހުނީ އެއްވަރުވާ މެޗުތައް ގިނަކަމުންނެވެ. ލީގުގައި ކުޅުނު 25 މެޗުގެ ތެރެއިން 13 މެޗަކުން ޔުވެންޓަސް ވަނީ އެއްވަރުވެފައެވެ.